船皇 (謝斐道) (已結業)

係香港食過幾間船麵都覺得麻麻，有d為左迎合香港人口味而失去正宗船麵應有風味，今晚等我黎到呢間過江龍船皇睇下搵唔搵到泰國原味。餐牌簡而精，湯麵、撈麵、小食同飲品一眼睇晒，反轉就可揀埋食咩麵。泰式粉麵店必備調味架，辣椒粉、辣椒醋、魚露。最初以為泰式炸蝦卷係普通脆皮包住隻蝦，上菜一望覺得好似蘿蔔絲酥餅幾特別，咬開發現外層係薯仔絲，外脆內軟，勁香口。串燒雞肉無燒到過火，幾香，肉唔鞋，點埋沙嗲幾正。講下船麵ge靈魂湯底先，入口充滿牛味，亦帶點藥材味，微辣香甜，貼近泰國當地食到ge味道，正。船皇湯麵集豬、雞、牛於一碗，肉香滑軟腍，丸十分彈牙，用左泰國貨，遠勝街市雪藏丸，炸豬皮好脆，一d油膉味都無。傳統船麵係細細碗一連食幾碗，船皇都可以咁叫，但香港地秒秒鐘幾廿萬上落，所以我揀左大碗河粉，好闊身，掛湯一流，份量又多，飽啊！凍泰仔奶茶用泰國銀碗裝住，由於預先沖好再雪，無得叫少甜，但比起「泰國甜」已經相當留手，香滑好飲。