漁港艇仔粉 (鴨脷洲大街) (已搬遷) 新店位置

今日去開鴨脷洲，見時間已經兩點幾，本身想去熟食中心食下午茶，點知上到去見到個個都係食緊海鮮同小菜，唯有再行吓鴨脷洲大街睇吓有乜嘢好食。成條街得呢間艇仔粉有人排隊，睇到個Menu，見到艇仔粉都幾吸引，於是排咗10分鐘就坐低試吓。艇仔粉配料好豐富，有叉燒，燒鴨，紅腸，魚片，魚蛋，魚皮同埋生菜，將燒味同魚蛋粉嚟過Crossover😂，亦一次過滿足晒我多個願望，可以試晒唔同配料。除咗魚蛋，每樣配料最少都有兩舊，食完都幾飽下。配料質素幾平均，但係冇乜特別，唔算好有驚喜。艇仔粉最吸引當然係個魚湯。魚湯呈奶白色，幾重胡椒味，而且有魚味得嚟又唔覺得好腥，索晒啲魚湯嘅河粉，加埋咁豐富嘅配料，$46都值得一試嘅。