莆田 (已結業)

又到哆頭蟶子嘅季節，以前食過莆田嘅藥膳蟶子一直對其鮮味念念不忘，今日經過馬鞍山莆田，就入去尋鮮啦⋯⋯坐低先黎壺菊花茶，清香而無硫黃味，上品；跟碟菜脯小食，味道淡淡的，呢餐飯唯一有食淨嘅就係佢！兩條友仔叫左八樣野，原本坐二人枱，後尾張枱放唔晒拉埋隔離張枱俾我地用。講返d野食，叫左扁肉湯，好似超迷你版嘅魚皮餃，皮有點煙un，餡有肉嘅鮮香，好味！四小併（豬腸好味唔肥，豬皮凍略嫌有點淋身，紫菜酸酸地好開胃，豆腐略遜滷得過咸）小人食可以叫嘅。跟住就係今晚主角莆。田。蟶。子。，看圖就知道佢嘅肥美，鐵板鹽焗嘅做法保留到蟶子最原有嘅鮮味，真心推介！冰爽酒糟做法係好食嘅但個人較喜歡鐵板鹽焗。咸香黃花魚可以用七個字形容，皮脆肉嫩骨鬆化，除左粒魚石食唔到外，全部皮骨肉都食晒。半生熟嘅醉蚶，蒜頭加埋c蚶真係好正，處理得好好有鮮味又唔會血淋淋，冒著肚痾嘅風險都值得。紫菜燜飯，食完一輪鮮味野難免比下去，相信單獨叫係好食的。最後發現無叫菜咪又叫多個蝦苗伴頭水紫菜，上菜至醒覺四小併已有，哈！雖然好味但每碟份量真係太少！

成日話馬鞍山係美食沙漠，冇野好食，今次就入去行一轉睇下有幾惡劣。 今日去咗新港城行下，行過就比莆田d宣傳吸引我，原來蟶子有咁多種食法， 我淨係食過豉椒蟶子。行到入去地方好寬敞， 侍應揀咗個二人枱畀我哋坐， 可能我哋晚市剛開， 室温比較熱， 侍應見到我 我哋坐低後，立即將溫度調返好， 讓我哋舒舒服服食晚餐。宣傳話$198 2份蟶子， 熱辣辣嘅我哋就揀咗冰爽酒糟蟶子同埋鐵板鹽焗蟶子。今次真係有冰火感覺，先上左冰爽酒糟蟶子，菜如其名，蟶子係凍，肉脹卜卜，加上酒香，味道好似食醉雞咁，但配上肥美蟶子又出奇地夾。跟住就到鐵板鹽焗蟶子， 佢哋上菜都好精美， 未開始食都覺得好享受。 一層厚厚嘅鹽加上新鲜蟶子放喺鐵板上面焗， 熱辣辣，賣相十足。食落去好鲜甜， 感覺食出海水味， 值得推介。食完蟶子都唔飽， 我哋叫咗賣相好靚嘅，百秒黃花魚， 上菜巳經流口水， 食落去就覺得肉質好滑， 少食鱼嘅朋友就略嫌多骨。最後叫左頂肚嘅興化米粉，佢比一般米粉幼同輕身， 食落去好滑同鬆化，加上配左蝦同蜆，都幾配合主題。食飽後繼續行新港城，雨天去商埸揾食，可以去试下呢度嘅蟶子。