金泰子泰國餐廳 (已搬遷) 新店位置

今日帶老表去試泰國餐廳，行嚟行去，點解會有咁多間舖嘅？於是揀咗最多人坐嗰間就坐。牆上貼滿menu，想食嘅泰國菜色應有盡有，最重要係唔貴！星期一至日12點至5點都有午市特價套餐，由$39至$42不等，仲要送例湯，抵呀！例湯係紅蘿蔔湯，清甜唔鹹仲要有湯渣食，好味！雞肉炒金邊粉 ($45)份量算好大，雞肉都多，旁邊有花生碎及乾辣椒碎。我只係將乾辣椒碎撥走，之後再用支羹撈一撈啲粉，都已經辣到癲咗！雖然對我嚟講真係好辣，但金邊粉口感彈牙，炒得夠乾身，感覺唔油膩，調味適中唔會過鹹(真係好重要！)海南雞飯 ($39)雞脾肉嫩滑，皮下嗰層透明嘅膏超肥美正到爆！不過老表有啲唔舒服，所以冇點辣汁食，但都已經好好味！就咁睇個飯好似冇乜特別，白飯咋喎，但原來食落係好有雞油味，一啲都唔乾，軟硬度適中，超級好味！！！！！$39抵食到喊！香茅雞翼 ($48)熱辣辣嘅雞翼，外脆內juicy，食落仲有香茅嘅清香，好好味，老表病咗咯，我蝕底啲食晒6隻都無難度！非常抵食嘅泰國餐，下次要叫多啲人嚟食多啲菜式！

落足成個星期雨，真係落到好煩！濕濕笠笠！所以都懶得行，就近近地去試吓金泰子泰lunch。午餐都好多選擇，有炒粉麵飯，全部送例湯，加錢有飲品。一坐底就送上熱湯。是日靚湯係蓮耦湯，飲落好似有味精，但飲曬成碗下晝都無口渴喎。揀咗雞肉炒金邊粉。wow 都幾大碟，碟邊有辣粉同花生碎。配料除咗有雞仲有豆腐乾，炒得有鑊氣之餘又唔會太乾身，味道調得剛剛好，唔會偏酸甜。枱上亦有辣魚露同辣醋。地點近地鐵，冷氣夠涼，座位都OK, 會再來！