吉吉點 (已結業)

見Openrice 呢度D食評都唔錯, 而且有D特色點心. 我今日就同朋友特登黎試下.佢D點心有一半係普通傳統個D, 有一半係加入咗新元素. 我地兩個人食得唔多, 叫咗幾款傳統又叫咗幾款新點心試下. 傳統方面我地覺得個蝦腸粉做得好好, 皮夠簿同夠滑, 而且夾上手唔會爛, 餡料亦都豐富. 非常有水準! 而燒賣就好夠大粒, 豬肉彈牙, 味道亦都做得幾適中!新派點心方面, 我地叫咗個"青芥鮮牛肉饅頭漢堡", 原來係用啱啱炸起的饅頭, 切開兩邊, 夾住牛扒同埋芥抺醬, 加埋生菜做成一個迷你漢堡包! 賣相好吸引, 細細個用支牙簽拮住好靚. 食落去口感鬆脆, 裏面芥抹醬有種清新同刺激的感覺. 都算幾特別幾有創意! 另一款就係木魚燒汁虎皮椒, 我平時食開呢隻魚肉虎皮椒都會用鼓油點黎食. 而今次就反傳統用咗木魚同埋燒汁 (有D似日本做法) 黎食, 估唔到又幾夾喎! 甜甜地脆脆地, 青椒又夠清新, 好味!

記得細細個樓下D舖頭全部都係小店, 個個老闆員工都好親切. 但慢慢香港就被連鎖式大集團攻佔了. 而家D小店都只能係舊區搵到.自己鍾意幫襯小店, 喜歡佢個度有人情味, 有誠意的出品. 因為大部份小店都無大量資金頂住, 可以生存到的其實大部份都係靠本身食物質素同埋服務.今日比我搵到間有誠意又敢創新的點心店. 位於宜安街街市旁斜路, 雖然位於食街, 但因為在斜巷, 不易發現, 但今日下午去幫襯都坐滿客人都是街坊, 心想應該不錯舖面乾淨企理, 似係茶餐廳格調. 點心方面, 有傳統蝦餃燒賣, 仲有比較特別的新派點心. 我地叫咗幾樣野:頂級鮮牛肉腸粉 ($22) – 用鮮牛肉製成, 一點雪味都沒有, 而且好彈牙同埋好滑, 腸粉皮薄薄一層, 夾上黎又唔會爛, 非常有水準! 鮑片冬菇鴨胸荷香籠仔飯 ($26) – 個名好長 XD 鮑片同鴨胸都大大片, 用荷葉包住黎蒸, 每粒飯都沾上咗荷葉清香, 鮑片同鴨胸的味道, 而且飯粉分明. 好爽口! 青芥鮮牛肉饅頭漢堡 ($31) – 用饅頭做漢堡皮, 脆脆地感覺得意. 相比起其它點心, 呢款比較Heavy, 但創意滿分! 其餘仲叫咗蝦餃, 燒賣, 鳳爪