小糖鈕 (已結業)

係武漢肺炎既影響下已經好少機會出街食飯，難得出去消費緊係要幫襯返黃店。呢到雖然出名既係甜品，但今次我係黎食正餐的。工業風裝修，燈光柔和，坐落舒服。尖沙咀黎講價錢唔算貴，而且份量都幾大份。小食叫左份桂花蜜炸雞翼，香脆可口，桂花蜜比較清香而且唔太黏，入口輕盈，中和左炸物既熱氣感，算是比較清新既炸物。香煎比目魚，煎得岩岩好，肉質嫩滑，薯菜有驚喜，好快就清哂。比想像大碟既鰻魚炒飯，偏濕炒，鰻魚肉都比得幾足，每啖都可以食到。感覺上呢到既食物都好適合一班朋友share食，可惜依家一黎唔敢share，二黎都唔會聚到一班朋友，只能獨享美食。

呢間餐廳我同細妹之前已經慕名黎過兩次，但兩次都full booking入唔到去食。今日專登打左去book枱，終於都成功食到！（佢地仲好細心咁問有冇人生日或者要慶祝！）Book左8點，7點9左右去到都入到座。（可能因為肺炎而少左好多人）咁我地兩姊妹就係去食晚飯唔係食甜品嘅。家姐嗌左個日式鰻魚炒飯（HK$139）個飯好大碟，女仔可能會食唔晒一碟。啲飯一粒粒唔會太乾又唔會太濕、有啲鰻魚汁甜甜地咁好正！入面有蛋、青豆、蘿蔔，不過鰻魚粒唔算多。另外細妹就嗌左香煎比目魚扒伴薯菜（HK$159）呢個份量啱啱好，因為係魚扒唔會太飽，但如果食肉可能要多人share了。成碟嘅香草味都好重，一上菜已經聞到好香！個魚扒好食煎得啱唔好，魚肉夠嫩！細妹好鍾意，但家姐就覺得有少少太鹹，大家可以自己斟酌一下。薯仔好raw似係新鮮嘅而唔係加工野，不過薯仔皮就有少少厚。最後比多張相大家睇：總結係呢間嘅食物都係中上好食，價錢係尖沙咀嘅晚餐黎講唔算貴，性價比高。但因為份量都算多，如果多幾個朋友黎食就可以嗌幾樣野share，抵啲又可以試多啲野。埋單HK$328，人均HK$164。