廳2 (已結業)

我好鐘意周圍食野同試新野，如果試到一間服務好、食物好令食得開心，再幫襯機會都大啲。我對Tang2的整體評語都好好，尤其係食物同飲料都好特別。熱玫瑰咖啡個味好得意呀，真係有幾塊玫瑰花瓣喺上面架！女仔見到一定超開心、影相又靚，又fresh，好有草園氣息。但我稍為覺得有啲啲甜，如果可以俾客人自己調返個甜度會較好。另外個香辣炸雞好滋味，原來係用雞翼似釀返條骨入去，啖啖都係雞肉。表皮脆之外有少少辣辣地，十分惹味，令人好開胃，引起食慾。擺碟呈X型咁，下面放兩件洋蔥圈，構圖不錯。雖然洋蔥圈唔係主角，不過都好搶眼下，亦保持到熱度、鮮甜同埋水份。我見到鮑魚魯肉飯真係好精緻，但只係88蚊，100蚊都唔洗竟然有咁大隻鮑魚！鮑魚一啲都唔硬，好入味。好欣賞個汁，滷水味好出，不過多少少肉粒更佳。一個人食一碟剛剛飽。最後係水晶蝦好似係招牌菜之一，爽口爽口。好開心唔洗自己去蝦腸…蝦身又雪白彈牙。龍蝦湯襯蝦球一流！橙橙黃黃好吸引，好重海鮮味，蝦大隻到可以當扒据。推介呀！