影片
更多
2023-01-19
2235 浏览
參觀完「鞍山探索館」，再晌「礦工Cafe」磨咗成個幾鐘，啲雨仲喺落唔停，上昂平無望，就只好提早落山，返回馬鞍山。順道食個早鳥晚餐，就嚟咗由朋友介紹值得一試嘅「WM Cafe & Bar」。 由於嚟得早嘅關係，都未有客，變相包場咁。睇唔出原來餐廳都幾大，先喺兩邊巨型皮梳化嘅卡位，座位做得較闊落。配上大型木餐枱，牆上嘅磁磚畫，亦好有心思，加上昏黃嘅小燈，感覺頗有情調。行入啲，落幾級，仲有另一個用餐區，呢度就有啲農村小咖啡店嘅感覺，因為幾面都喺仿磚牆，襯以木枱木櫈，整體地方整潔企理。 主餐牌有非常多選擇，由前菜、湯品、沙律、小食、漢堡、三文治、薄餅、意大利麵、意大利飯、主菜、甜品、飲品……等等都一應俱全。此外，主食類，另加$33就可以轉為套餐，多了是日餐湯、前菜及餐飲，頗為划算。 餐具、基本調味品、開水都放晌枱邊，自由取用。店員亦好醒目，送嚟兩杯熱水俾我哋浸浸餐具。蕃茄湯、龍蝦湯是日餐湯好快送到，兩款都喺「紅湯」，難得揀龍蝦湯都唔需要額外加錢。蕃茄湯裡面有唔少蕃茄肉，味道酸香醒神；而龍蝦湯飲得出真材實料，就算裡面無蝦肉，但個湯嘅蝦味極之濃郁，質感又夠滑身。佐以黑麥包，暖暖哋，好軟熟。 廚師沙
由於嚟得早嘅關係，都未有客，變相包場咁。睇唔出原來餐廳都幾大，先喺兩邊巨型皮梳化嘅卡位，座位做得較闊落。配上大型木餐枱，牆上嘅磁磚畫，亦好有心思，加上昏黃嘅小燈，感覺頗有情調。
行入啲，落幾級，仲有另一個用餐區，呢度就有啲農村小咖啡店嘅感覺，因為幾面都喺仿磚牆，襯以木枱木櫈，整體地方整潔企理。
主餐牌有非常多選擇，由前菜、湯品、沙律、小食、漢堡、三文治、薄餅、意大利麵、意大利飯、主菜、甜品、飲品……等等都一應俱全。此外，主食類，另加$33就可以轉為套餐，多了是日餐湯、前菜及餐飲，頗為划算。
餐具、基本調味品、開水都放晌枱邊，自由取用。店員亦好醒目，送嚟兩杯熱水俾我哋浸浸餐具。
蕃茄湯、龍蝦湯是日餐湯好快送到，兩款都喺「紅湯」，難得揀龍蝦湯都唔需要額外加錢。蕃茄湯裡面有唔少蕃茄肉，味道酸香醒神；而龍蝦湯飲得出真材實料，就算裡面無蝦肉，但個湯嘅蝦味極之濃郁，質感又夠滑身。佐以黑麥包，暖暖哋，好軟熟。
廚師沙律、吉列炸蠔前菜可揀沙律或炸蠔，我哋兩個，自不然各樣要一客。沙律喺煙鴨胸田園沙律，鴨胸幾有煙燻香，沙菜夠新鮮爽脆，淋咗少少油醋，戈食味唔錯；炸蠔亦好食，雖然蠔肉唔算大，但炸得金黃，唔太油膩，非常香口。
黑松露大啡菇牛肝菌意大利飯 $108小弟一向喜歡揀意大利飯，因為好能夠試到師傅手勢。賣相睇落都幾吸引，巨型嘅大啡菇就放咗上面，而且，灑咗好多巴馬臣芝士碎，非常香噴噴。先試件菇，煎得剛好，保留好多菇汁，而飯粒煙韌有咬口，帶微微菌香，喺略嫌乾身咗少少，再濕潤啲就更加正喇。
香煎香茅盲鰽魚配烤茄子 $198魚類嘅主菜一向喺老婆心頭好，所以，一見到呢款菜式就唔再睇其他選項。不過，是日盲鰽無晒，取而代之喺石班，佢都無乜所謂。老實講，賣相就差咗少少，被茄子搶咗個焦點，但味道又真喺唔錯，魚柳煎得金香，有啲脆邊位，魚肉好嫩滑；茄子烤到軟綿綿，混上半溶嘅芝士，不俗，再者，啲薯蓉亦打得夠滑，似喺加咗牛油去打，有點點鹹鹹哋嘅油香味。
熱檸水、熱咖啡餐飲就簡簡單單要杯熱咖啡而已，即磨貨色，杯面仲有一層咖啡油，飲落幾醇香，唔帶酸味，幾合我個人心水；老婆就要杯熱檸水，消消滯，又可以清清味蕾。
其實，餐廳都幾近馬鞍山海濱長廊，食完大可以行過去散散步，如果日頭嚟嘅話，走到去烏溪沙碼頭，除壯闊海景之外，更可以遠眺八仙嶺，何其賞心。
张贴
