陳漢記 (已結業)

突然凱彤話收工一齊去食宵夜，梗係娘飯應啦 ﹗開心死我咩 ﹗原本想去大鹿鳴居食架，但未夠兩點鐘關左門，唯有搭的士去陳漢記食囉。我已經爆醉，叫左一大堆食物呢，哈哈 ﹗今晚又撞到教頭老闆，您好嗎？Sorry 呀，我太醉又太開心，把口講唔停呢，都係食野穩陣喇。叉燒腸粉，您返左黎喇？仲咩唔通知我一聲呢？熱燙燙送到勁好味，叉燒非常香甜又足料，腸粉皮滑溜白裡透紅又唔會油淋淋，大埔 top 1 位置無人能及。齋腸粉，凱彤話只食齋腸，唔要有餡呢，無緊要，要幾多有幾多。就算係齋腸都同樣係即拉，非常熱辣辣、滑溜、米香濃厚，添上芝麻另佢更香口無咁單調。加埋混醬三寶，辣椒醬、甜醬、豉油，就更開胃啦。牛腸牛膀河走蔥，好正啊 ﹗香料及滷水已完全滲入牛腸牛膀之中，每一口都充滿濃郁香甜醬汁味道。牛腸牛膀同樣外彈內滑又有咬口，牛膀如海棉一樣索盡湯既精華令人食唔停口呢 ﹗牛腸牛膀河走蔥，極濃郁既腩汁湯底配上淡口既河粉非常之夾，一咸一淡剛剛好 ﹗棉滑河粉夾住湯汁再混上大量辣椒墜進口中，美味極了 ﹗最討厭硬屈屈既河粉。凱彤食唔晒碗魚蛋河，咁我食埋啲魚蛋去唔好浪費。魚蛋麻麻地，不鮮不彈不香不濃，黎陳漢記都係食牛最好啦。