影片
更多
2013-09-04
106 浏览
「難逃厄運」就比較負面，唔吉利，不過今回嘅「藍屠」就絕對唔喺咩厄運。將自己放逐咗晌大草原之上兩個多星期，返到嚟香港依個石屎森林，多抖一日就要開工，面對似喺多到無底嘅工作，只有埋頭苦幹做做做。晌旅行期間已從面書收到食友LT嘅試食邀請，老實講真喺好想嚟，不過日子就定咗晌開番工嘅第一日，殘念！但喺食友真喺好有心，當日再多次作出邀請，就算晏啲嚟飲吓嘢都話無所謂喎，咁鬼有誠意，即刻開拫（音：痕）副渦輪增壓器，即喺乜？咪個Turbo囉，清咗啲急嘢，拖得嘅就梗喺拖啦，趕到盡，最後以15分鐘嘅時間由中環舊政總跑去上環荷李活道近尾嘅藍屠夫，雖然未必快過打的，但以中環區咁塞嘅狀況，敢講快過搭巴士，結果仲比食友早到幾分鐘，真喺一額汗，喺真正嗰種「一額汗」。「屠夫」嘅入口被夾晌Classified及The Press Room之間，唔算太顯眼，所以初初行過都唔知。地下位置有個小酒吧區，上去二樓先喺用餐地方，環境頗有情調，枱櫈不拘一格，絕對唔會似個「屠房」。一列吧位之後，就喺開放式廚房，亦喺全場唯一最光嘅地方，晌咁有氣氛、咁昏暗嘅環境，絕對喺「恰死」跟咗小弟多年嘅傻瓜DC仔，所以啲相影得唔好請見諒。一紙雞尾酒餐
「屠夫」嘅入口被夾晌Classified及The Press Room之間，唔算太顯眼，所以初初行過都唔知。地下位置有個小酒吧區，上去二樓先喺用餐地方，環境頗有情調，枱櫈不拘一格，絕對唔會似個「屠房」。一列吧位之後，就喺開放式廚房，亦喺全場唯一最光嘅地方，晌咁有氣氛、咁昏暗嘅環境，絕對喺「恰死」跟咗小弟多年嘅傻瓜DC仔，所以啲相影得唔好請見諒。
一紙雞尾酒餐牌，有成10款之多，各人隨個人喜好各自揀選，款款單睇名字已感到非常特別，極具心思創意，好有話題性，絕對喺非一般嘅雞尾酒，例如同枱食友所揀嘅Fig & Cheese, Pork Chop and Apple Sauce, Horse’s Head……，睇名都唔知佢葫蘆賣咩葯，初時仲以為喺咩菜式名稱，不過餐牌已有簡單介紹及詳細列明成份，好似Pork Chop and Apple Sauce咁，用上Bacon washed blended scotch, Housemade sour mix, Apple Schnapps, 及Fresh apple jam混合，味道如何？試吓你咪知囉！
Apple Pie Moonshine $140
小弟對酒唔算熱衷，但趁高興飲少少亦無妨。依款酒喺公關推介，因為酒精度低，啱我依啲「淺嚐」嘅人，以雞皮紙袋包住玻璃瓶喺其特色，皆因1920年美國通過法例禁酒，當時私釀烈酒嘅人就以此方法遮遮掩掩繼續賣酒。酒味果然唔濃烈，加上蘋果嘅清甜、原條肉桂嘅甘香，令酒更易入口，咁嘅組合當然稱之為「蘋果批」啦。
麵包籃一籃法包理應無甚特別，但配上香草牛油、橄欖油、黑椒粒、海鹽，會唔會多咗少少亮點呢？香草牛油拼黑椒粒搽晌包面，原來都唔錯喎。
主餐牌分為4大類別，稱為：Small Plates to Share、Larger Plates、Larger Plates to Share及Butcher’s Cuts。由於店方已安排好晒所有試菜菜式，所以難得安心等食。先嚟一輪5款餐前「小碟」，跟住就喺兩道「大盤」及1款「屠夫切肉」，期間仲有數款伴菜Sides，真喺豐富到不得了！Organic Smoked Beetroot / Feta / Cucumber / Pistachio Vinaigrette $120
雖然菜名睇落有啲複雜，但正正讓食客清楚有咩食材成份，可避免點咗一啲唔啱食嘅食材。依道煙燻紅菜頭頗特別，鋪面嘅青瓜令人睇落清爽，而入口爽脆，鋪底嘅紅菜頭帶點煙燻又帶點甜，幾有趣；加上面面散落唔少羊奶芝士、開心果仁碎，令味道及口感層次更多重，配合上開心果跟油醋打成青綠色嘅醬汁，真喺挺有驚喜喎！
Compressed Organic Tomato / Burrata Cheese / White Balsamic / Basil $190義大利番茄夾水牛芝士喺經典前菜之一，而香草羅勒又好似喺佢哋嘅必然配搪。是夜「屠夫」要更「進擊」，以醃漬過嘅番茄、意大利軟芝士、白葡萄醋及羅勒作為組合，做出此道意式芝士番茄沙律。番茄果肉清甜帶微酸，感覺清怡，而意大利軟芝士Burrata以水牛芝士加忌廉製成，半溶嘅質感，無水牛芝士咁柔韌，但口感更軟滑，散發淡淡芝士幽香；將羅勒葉樁碎加入意大利白葡萄醋，雖未知有幾多年陳，但嗒落唔嗆喉，頗醇厚，確喺幾令人開胃嘅前菜。
Norwegian Salmon Tartar / Avocado / Burnt Lemon Vinaigrette / Horseradish $125分層明顯，由下而上有牛油果蓉、挪威三文魚他他及沙律菜，賣相幾精緻。牛油果含豐富維生素，三文魚成日被強調含不飽和脂肪酸奧米加3，營養豐富，所以撇開味道唔講，依道絕對喺非常有益健康嘅菜式。況且牛油果味道獨特又柔滑，三文魚他他魚油十足，配合檸檬醋及辣根芥末，味道真喺唔錯，題外話，似乎「屠夫」都幾喜愛做綠色嘅醬汁哩。
Spanish Ham & Egg / Asparagus / Mushroom / Thyme $125以薄薄嘅西班牙火腿墊底，再配搭上溫泉蛋、烤露筍、香煎本菇，既有趣又嶄新嘅組合。淨食以鹹香襯清爽，應該唔錯，不過小弟當晚就用嚟夾法包，火腿、露筍、本菇放晒晌包面，啖啖滋味。
Bone Marrow / Toast / Caper Berries / Parsley / Salt Flakes $125兩截短筒牛骨，配以烘香嘅脆多士，伴菜有水欖及蕃芫茜，全放晌厚身木板上送上枱，賣相立體有亮點。烤烘後嘅牛骨髓確喺脂香豐盈，甘香柔滑，塗多士實屬味美，但講到喺人間極品個人覺得又未免太誇，可能小弟較鍾意鵝肝多士吧。不過切記多吃無益，牛骨髓嘅膽固醇唔輕呀，所謂骨髓特別能夠健骨補鈣，更喺科學依據不足嘅謠傳唔好盡信。
Sides $70伴菜有Garden Salad，Veg of the Day及Starch of the Day，今晚所試到有一門四傑，包括忌廉粟米、芝士通粉、黑松露薯條、脆炸薯角，當中以忌廉粟米最有驚喜，因為除咗粟米粒超甜之外，忌廉汁異常綿滑富奶香。
Rare Breed US Kurobuta Pig Belly & Cheek / Lentils / Granny Smith Apple Slaw $490上面講到個牛骨髓膽固醇高，咁依個美國極黑豬都不惶多讓，腩位部份雖然肥瘦雙間，但肥膏嗰節絕對唔嘢少，還好就喺烹煮不俗，肥肉位入口即溶，可以講油而不膩，而瘦肉位咬落軟腍鬆化。如果你真喺患有肥膏恐懼症，下層有啲臉頰肉部份，相對就無咁油膩。再唔喺，配上酸酸爽爽嘅青蘋果絲，更有效中和油脂感，事後上網翻查何謂「Granny Smith」，啊！原來喺一個青蘋果嘅品種名稱，百多年前由一位叫Maria Ann Smith婆婆培殖出嚟。至於碟底嘅扁豆，雞肋似的！
Dutch Veal Cheek & Sweetbreads / Truffled Orzo / Herb Salad $460相比起碟美國極黑豬，小弟較鍾意荷蘭牛仔臉頰肉、胸肉伴意大利米型意粉，記得第一次接觸米型意粉喺晌銅鑼灣嘅Fiat Caffe，有少少驚為天人嘅感覺，因為大鄉里未試過嘛，外型如米，口感喺意粉，極之有趣，今次仲加上松露醬煮，真喺無得輸。而牛仔臉頰肉及胸肉以真空慢煮烹調，嫩滑富肉汁，配少少火箭菜沙律，口感輕怡咗之餘，帶點點芝麻味嘅火箭菜會產生意外嘅效果。
Australian O'Connor Farm 100% Natural Black Angus 14oz Rib Eye $620晌度食「屠夫切肉」絕不便宜，眼前14安士嘅肉眼扒就盛惠$620，不過依道菜晌切肉系列都未喺最貴。肉眼扒來自澳洲農場嘅100%全天然純黑安格斯牛，餐牌還刻意標明無荷爾蒙添加，無基因改造，無打抗生素，目的就喺想俾大家一個品質保證。肉眼扒炭燒後可能外觀麻麻，但一切開，火喉拿捏準，色澤粉嫩，入口肉質鬆軟，肉味濃郁，外皮帶焦脆，不過部份邊位油脂頗多，但整體實屬高質靚肉，跟扒仲有4種唔同嘅芥末，食肉獸、牛扒粉絲定必對佢好有興趣。
前菜、主菜、扒類都各有特色，尾聲嘅甜品又如何呢？真喺等得人好心急，OK，一口氣4款甜品殺上枱，實在期待。老實講，「屠夫」嘅甜品小弟就覺得定價偏高，問到值唔值，還要睇睇質素喺點先可以下結論。Maple Syrup Tart / Sugar Whipped Cream $80
以楓糖做嘅撻，比想像中無咁甜，而且甜味來得自然，不過整體質感較為濕潤，連帶個撻皮都無咁酥化，賣到$80一客，實在唔太建議點選。
Mango & Passion Fruit Sorbet / Vanilla Scented Berries $80
以芒果及熱情果所做嘅雪葩，無疑晌盛夏嚟享用，實在令人清爽涼快，再伴上帶雲喱拿香嘅雜莓，酸甜醒胃，作為主菜同切肉之間嘅間場，效果仲好呀！
Warm Chocolate & Banana Tart / Brulee Banana / Salted Caramel Ice Cream $120
店中最貴嘅甜品，小弟亦都覺得喺一道好出色嘅甜品。朱古力配香蕉，已有一定嘅叫座力，朱古力香蕉撻，朱古力味頗為香濃，內裡嘅香蕉肉夠熟夠香；而撻旁仲有兩件焦糖香蕉片，焦糖一向都啱晒我啦；而海鹽焦糖雪糕，套用食友一句：「甜中帶鹹，味道非常特別」！
Lemon Cappuccino / Lemon Crouton / Lemon Curd /Almond Crumble / Whipped Cream $90
真喺有幾分似意大利泡沫咖啡，一抹薄薄忌廉之下，有檸檬吉士、檸檬味麵包粒、杏仁金寶脆脆，最驚喜喺令個口感有多層次享受，而檸檬嘅清新香味，又很討人鍾意，值得推介。真喺想即場「安哥」多一客架！
最後，再次多謝食友讓小弟掹車邊嚟到品嚐屠夫所做嘅多款美饌，亦要多謝店家嘅熱情款待，讓小弟跟幾位食友做咗一晚「酒肉朋友」。「屠房」唔一定血淋淋，可以喺令人回味再回味嘅地方！
张贴
