旺角天台酒吧餐厅“Reflect”位于12楼顶层，一出𨋢就有个靓靓镜面墙呼应店名Reflect(反射)。呢度由10年经验墨西哥大厨主理，创作多款party vibe又精致嘅墨西哥菜，最近仲新推出抵食2人套餐，$688可以由餐汤食到落主菜同肉食，包保满腹而归!!!
户外位大到可以包场开party或举办轻婚礼，仲有好多梳化位坐得舒服。难得旺角有个咁开扬天台同朋友边饮cocktail、边食墨西哥菜啊。
墨式粟米饼汤Tortilla Soup ($68)
惹味开胃前菜由呢道酸酸辣辣嘅番茄汤展开，饮落质感好rich，加埋脆卜卜嘅粟米片有双重层次。
【墨西哥粟米片多重食法】
焗玉米片Nachos ($128)
墨西哥菜嘅灵魂食材—粟米饼，煮法千变万化。最为人熟悉一定系Nachos喇～粟米片焗到脆卜卜，再加上杰克同车打乾酪，两款唔同咸香嘅乾酪撞出层次感。记住每啖都蘸齐碎牛肉、牛油果蓉同番茄啊，夹埋一齐食劲丰富(仲好邪恶𠻹!!!)，同朋友叫一份开心share就正喇～
鸡肉乾酪馅饼Quesadilla ($128)
而Quesadilla就系粟米饼夹馅而成，软身又带咬口。内馅塞满乾酪同鸡肉(另有葱+牛肉馅选择)，加埋酸酸甜甜莎莎酱+牛油果酱，馅酱绵密好有幸福感，仲有啲外酥内嫩口感㗎。
鸡肉脆皮玉米饼Chicken Tacos ($188)
钟意脆脆粟米饼嘅话，可以拣Tacos。每份大约手掌咁大，超脆粟米饼包住满泻嘅馅料好吸引。而且啱啱好可以一啖食到，唔怕食到好狠狈，用嚟送酒都一流㗎。内馅选择有鸡肉、蘑菇、牛肉，一班人仲可以叫「夹饼派对」食匀三款味𠻹～
辣鸡肉馅饼Chicken Enchilada ($198)
地道墨西哥料理Enchilada就最大份量!! 卖相同手拎粟米饼唔同，反而将几份捲饼包住鸡/牛肉馅料、牛油果酱、莎莎酱，最后淋上酸奶油酱。一刀切开见到满满鸡肉，有种食紧升级版千层意粉嘅感觉。
鸡肉墨西哥烤肉Chicken Fajitas ($208)
仲有仲有，就算想自己包捲饼都得㗎!! Fajitas系列嘅酱汁、粟米饼同鸡肉内馅会分开上枱，自己想夹几多馅、几多酱都得，用餐体验十足。烤肉仲系用铸铁镬热辣辣上，香喷喷出晒烟，睇见都流晒口水啊！
香辣肉酱配玉米饼Chili Con Carne ($168)
粟米饼嘅配搭真系多到你唔信，简单啲配香辣肉酱、酸奶油都好好食!! 肉酱系用墨西哥香草炖牛肉煮制，直接用脆粟米片舀满肉酱，好快就成碟清晒啦！
【2人套餐】墨西哥x西式fusion
选择困难症嘅话，索性拣2人套餐只系$688咋。主厨特别设计墨西哥x西式fusion菜式，由餐汤、主食(5选1)、肉食(3选1)到饮品都安排好晒啦。
主食推介 | Scallop Linguine (+$40)
主食5选1之一嘅带子扁意粉，海胆汁够浓郁做到挂汁效果，配埋带子双重鲜味劲吸引。
肉食推介 | Pork Loin Chop
肉食3选1就有加拿大保湿猪鞍，出名软嫩湿润。食之前用刀一切到底嘅手感就知几嫩喇。食落猪味浓零羶味，配埋烤焗甜薯、特色阿根廷香草酱，有种温软甜蜜感觉，约会晚餐必食。
【其他高质菜式推介】
除咗一系列墨西哥粟米片同2人套餐外，呢度仲有好多嘢食㗎～
好似呢道美国斧头扒足足1.5kg-1.8kg，好钟意上枱嗰阵已经切好晒，见到入面仲系好粉嫩，饮吓酒又拮件牛扒食几爽。
薄饼 | Seafood Pizza
自家制墨西哥辣椒酱，就系呢个薄饼嘅灵魂！辛辣浓郁，新鲜海鲜都唔少㗎，食到啖啖八爪鱼、蚬肉等，嗰种弹牙口感同一般雪藏海鲜完全唔同。
分享 | Beef Tartare
“Reflect”亦有好多佐酒小食，好似cocktail party常见嘅牛肉他他。拎起脆脆法包放上精制牛肉他他、巴马臣乾酪又脆又软绵绵，就算女仔直接用手拎起食都好优雅。
甜品 | Chocolate Tart
呢度嘅自家制甜品即叫即制，好似呢款流心朱古力挞上枱嗰阵仲好热㗎。切开流出浓浓朱古力浆好有仪式感，配埋草莓冰淇淋解腻啱啱好。
甜品 | Apple Crumble Tart
另一款自家制甜品就有苹果金宝挞，香甜苹果肉同脆脆已经有双重口感，今次放埋入挞皮仲多咗种松脆感好正。
【旺角饮酒热点】自家品牌希腊红/白酒
“Reflect”有个大天台坐得舒服，真系未试过望住旺角夜空饮酒呀。佢哋仲推出希腊提子酿造嘅3款红/白酒，酒身比较dry并富独特提子香。
好啱配主菜饮，唔会遮咗牛扒、海鲜味，又可以平衡整体口感，可以提升成个用餐体验。
饮酒食生蠔优惠！
凡惠顾任何酒类1支，即享$48/6只生蠔 |
法国生蠔新鲜肥美，好夹干爽嘅“Reflect”希腊提子酿造白酒。
一班人share可以嗌乾酪火腿拼盘，有康提乾酪、义大利巴马火腿、黑胡椒肠。
除咗红/白酒、啤酒外，驻场调酒师设计咗多款IGable鸡尾酒。好似泡泡烟嘅Fruity Garden(水果花园)、超梦幻还原阿拉丁神灯嘅Aladin(阿拉丁)都好惊喜。
Fruity Garden(水果花园)好唯美，一戳开透明泡泡即弥漫仙气，一定要准备影story呀。Fruity Garden有多种口味选择—草莓／黑莓／芒果，再混合伏特加、橙、菠萝、桃子调制。
Aladin(阿拉丁)
完美还原阿拉丁神灯，入面系Rum、椰子、菠萝、柑橘调配嘅神秘蓝色酒，斟酒嗰刻好梦幻!!
Pirates Daily(海盗日常)
电影世界中，海盗都会豪迈拎住木桶大啖大啖饮酒，而家都可以试吓呢种畅快感觉喇。木桶杯入面系Dark Rum、花生、坚果、奶油、柑橘调配鸡尾酒，独特果仁味几惊喜。
Xipe Totec
充满神秘气氛嘅Xipe Totec，以杜松子酒、茉莉花茶、梨、薑组成，完美结合柔和香辛味道。
Espíritu
好少见用Espresso咖啡整嘅鸡尾酒，仲系撞上Jack Daniels威士忌、橙汁、菠萝汁。强烈威士忌酒味中，隐约渗出咖啡味几惊喜。
REFLECT Restaurant & Bar
地址: 旺角西洋菜南街74-84号旺角城市中心12楼
电话: 94029697