唔少人放假都会过大海觅食，而家唔使过海都食到澳门人气美食喇！「叠记咖喱」喺澳门有近80年历史，系当地着名嘅老字号咖喱店。最近开到嚟香港，除咗保留最原始嘅祖传秘方同招牌款式外，仲有好多香港店限定美食，近近哋都食到澳门风味啦。
「叠记咖喱」1947年开业，起初由第一代两夫妇挑起扁担喺街边贩卖咖喱牛腩河；到60年代推起木头车摆档，继第二代接手先正式喺澳门大马路落脚开创始店。手艺至今已经传承到第三代，店主放弃飞机师嘅高薪厚职接手家族生意，为嘅系保留每代人嘅心血同始终如一嘅味道。
【必食！招牌辛辣甘甜咖喱汁】
嚟到一定要试吓呢度嘅鲜炒咖喱同传统橡筋面，前者要喺原始咖喱胆定期加入过百种香料熬制，味道香浓；而后者嘅「橡筋面」其实系澳门老一辈经常食嘅传统面饼，凭住弹牙烟韧口感因而命名，坊间好少食到㗎～
咖喱牛腩面($43)
识食一定系食招牌名物——咖喱牛腩面!!! 咖喱牛腩会先炆后炒，完美逼出牛油香同时更入味，再加入新鲜滚起嘅面饼同牛骨汤底，最后按个人嗜辣程度滴上灵魂辣酱，真系一上枱已经闻到咖喱香。建议口感控可以拣橡筋粗面，特别Q弹有咬口㗎！而牛腩软腍重牛味，牛魔王favourite。
咖喱牛腩饭($48)
饭桶一样有得拣！咖喱酱汁本身已经好佐饭，加埋啖啖肉嘅软腍牛腩，真系好食到汁都捞埋。
牛三代面($63)
想食得丰富啲嘅话，推介呢款牛三代！一口气食匀咖喱牛腩、牛筋同鲜牛肉，每款分量都几多，牛筋煮到软化滑嫩，食起嚟带少少黏口胶质，感觉有满满嘅胶原蛋白!! 鲜牛肉大大嚿够弹牙，一次过满足晒三个愿望啊！
饺饺面($55)
店主喺设计餐牌上融入港式车仔面特色，客人可以自由配搭36款配料、自选6款面底同6款酱汁。选择困难可以直接拣餐厅推介配搭，呢款就有鱼片、鱼蛋、水饺同云吞，无论配辣酱定清汤都好满足。
【开胃特色小食】
萝卜牛杂($88)
香港有唔少牛杂Fans，呢度处理牛杂嘅技巧纯熟，会将佢哋彻底清洗干净、闢走腥味，食落无乜内脏腥味㗎。部位主要有牛肠、牛肺、牛肚同金钱肚，食落鲜味突出而且分量慷慨，配埋吸满汤汁嘅萝卜好惹味。
澳门特式猪扒包($38)
澳门名物都带到嚟香港～呢款香港店限定小食可以单点或下午茶套餐($38起包饮品)。猪仔包搽上薄薄一层牛油，烘到外层脆卜卜，中间夹住块猪扒肉质软腍，一啖咬落口层次丰富！
咖喱鱼蛋($15/10粒)
新店注入唔少香港本地元素，可以舒服坐定定咁食咖喱鱼蛋啦。鱼蛋胀卜卜富鱼肉味，店家特调嘅秘制辣酱惹味又带刺激感，不断有口水分泌超爽啊。
叠记咖喱
地址: 太子花园街224号地下A号舖
电话: 21160463