唔少游客嚟到香港都会体验吓饮茶文化，讲到怀旧粤式茶楼，一定唔少得有近百年历史嘅莲香楼喇！茶楼翻新后注入好多新元素，好似首设烧味区同手摇茶饮，同时亦保留人气点心、多款怀旧手工菜式、茶盅冲茶文化等等。即使经历结业重开，但系味道依然保持水准，同之前一样㗎～
【自设烧味炉】古法烧制蜜汁叉烧‧潮莲烧鹅
重开后嘅一大亮点就系最近新增嘅烧味区，由茶楼自设烧味炉，自己烧味自己烧，不论堂食或外卖，保证客人可以食到新鲜出炉、香喷喷嘅烧腊系列！
潮莲烧鹅（$168/例牌; $288/半只; $568/全只）
烧鹅最期待就系食到皮脆肉嫩嗰一啖，呢度嘅烧鹅烧到好上色，晶莹金黄脆面睇见已经超有食慾～入口肉质嫩滑juicy，油分十足够香口。钟意啖啖肉嘅话一定要叫上庄 ($168)部位；而食开髀位嘅客人就推介下庄 ($198)喇！
蜜汁叉烧皇（$148/例牌）
好食嘅叉烧其实好有讲究，选用颈肌嘅梅头部位会特别软腍松软，以传统古法烤制，中途搽上麦芽糖同10种秘制香料，令叉烧食起嚟甜甜哋又惹味。
秘制贵妃鸡（$138/半只; $268/全只）
贵妃鸡可以话系白切鸡嘅变奏版，用咗白卤水慢浸至熟透，唔单只将精华渗入肉质，仲做到皮滑肉嫩嘅口感𠻹～
桶子油鸡（$138/半只; $268/全只）
浓浓酱油兼带光泽嘅玫瑰豉油鸡，精髓在于喺卤水酱汁加入玫瑰露酒浸制而成。口感比起其他鸡菜式唔同，外皮更加Q弹滑身，仲食到豉油焦香。
怀旧金钱鸡（$28/件）
金钱鸡就听过喇，你又食过未呢？呢一道传统粤菜烧味因为手工繁琐，所以妨间已经买少见少。师傅需要提前将肥、瘦猪肉同鸡肝醃渍，然后串起慢火香烤，入口外脆内酥、爽口甘香，未食过嘅话可以嚟呢度一试㗎！烧味外卖仲会送樽装茶饮，口味3选1：柠茶、纯茶、奶茶，食住烧味品茶。
【超过30款手摇茶饮】
莲香楼历史悠久，但系都有追赶潮流，搞搞新意思～好似地下新增嘅茶饮部咁，主打6个系列嘅手摇茶饮，分别有云泡、纯茶、柠茶、奶茶、果茶同养生系列。全部茶饮都系用新鲜茶叶冲制，搭配新颖仲好多选择𠻹！饮完想encore嘅话，仲可以单购茶叶，茶控一定会钟意。
浮生若梦（$38/杯）
以法式花茶汤为基底，有明显清澈花香仲带香料感，配搭好新鲜啊。推介可以先分别试吓茶底同表面嘅云泡层，再直接将两者混合一齐饮，会有两种体验㗎～
粉黛蔷薇（$38/杯）
充满浪漫粉色嘅云泡由全脂奶打成，卖相好似白云咁轻盈，饮落有淡淡玫瑰味～以幽香伯爵茶为基调，洒上紫薯碎+玫瑰碎劲靓，买返杯打卡都值啊！
【怀旧点心逐个食】
嚟到茶楼当然要食！点！心！莲香楼多达70款点心都系手工包制，保留咗唔少工艺复杂又将近失传嘅款式，如黑芝麻捲（又称菲林捲）、鹌鹑蛋烧卖、糯米包、千层腐皮夹等，畀上一代怀缅旧时味道嘅同时，下一代又可以认识更多怀旧点心。
鲜猪润烧卖（$35/大点）
大人细路都钟意食烧卖，而猪润因为清洁时间繁复，要彻底洗净先用到，所以令供应嘅地方愈嚟愈少。呢度难得食到，爽口猪润配嫩滑烧卖，口感一流。
古法猪肚烧卖（$35/大点）
同样备料花功夫，不过啱啱出炉嘅猪肚好爽嫩，加埋惹味烧卖一齐食好夹㗎。
雀巢芋角（$35/大点）
每次食芋角都好期待见到鸟巢状嘅炸皮!! 包入新鲜芋头作内馅，高温油炸会令芋头瞬间炸成雀巢状，卖相好靓，食到绵密芋泥，而且无油饐味㗎。
西米焗布甸（$38/特点）
甜品款式层出不穷，但呢款怀旧甜品真系食极唔厌，表面焦香内里软滑，仲带粒粒西米增加咬口，甜而不腻。
【晚市手工菜】
晚市除咗限量供应点心外，亦有唔少手工菜式。功夫菜单由40几年经验嘅师傅掌舵，炮制一系列历史悠久嘅经典粤菜，好多款式都系坊间好难食到～当中师傅推荐口感层次劲丰富嘅「霸王鸭」同「仙鹤神针」，提早3日前预订就食到喇～
莲香正宗霸王鸭
一上枱就畀霸王鸭嘅焦香外皮吸引住!! 呢道菜式系传统广府菜，会先将鸭起骨，再酿入薏米、莲子、冬菇、鸭肉粒、白果、咸蛋黄等食材；然后再上老抽，炸到金黄焦香；最后仲要将成只鸭用陈皮上汤浸足2个钟至腍透先可以上碟，当中嘅功夫同手艺绝对唔简单㗎！
仙鹤神针
咁有气势嘅菜名系引自武侠小说，同时亦系一道历史悠久嘅宫廷菜。制作过程极之考功力，要先将原只乳鸽去骨填肉，再酿入先用上汤炖足2-3日嘅鱼翅炖制，因为手工复杂、用料考究，所以渐渐成为失传味道。正正因为菜式来得不易，所以一人一只啪先够过瘾～
莲香楼
地址: 中环威灵顿街160-164号
电话: 21160670 / 34915855