夏天想望吓天、望吓海，又唔想去郊外一身汗，不如拣间海边餐厅凉住冷气睇靓景啦。喺将军澳海傍嘅“The Hunter”有室内/户外座位，海洋主题装潢好似去咗外国咁。
呢度本身主打熟成牛扒，坐室内会见到厨房玻璃后嘅熟成牛扒柜摆满牛肉，仲发现入面大部分都系外籍厨师嚟。佢哋会用西班牙名牌烧烤炉Josper Grill炭烧牛扒，用真炭烧特别香㗎!!
想嚟锯扒，2024年8月推出嘅「限定夏日套餐」只要+$100就可升级追加干式熟成M2+肉眼 配薯条，CP值几高。套餐仲有连枝番茄、西瓜、柚子鱼子酱等清爽食材入馔，同出面个海景好夹啊。
“The Hunter” 限定夏日套餐
安达鲁西亚冻汤(Andalusian Gazpacho)
源自西班牙南部嘅番茄冻汤，系当地夏天几常见嘅开胃菜，味道酸甜爽口。平时会配面包或蔬菜，今次大厨就直接于汤中放入蟹肉沙律，爆多蟹肉连冻汤一齐食几正。
连枝番茄片(Tomato Carpaccio)
平时好少见番茄做主角嘅料理，因为撑得起一道菜嘅连枝番茄(Heirloom Tomato) 真系好罕有。呢种传统番茄品种已经有过百年历史，从未经现代改良，所以系番茄元祖味嚟㗎!! 番茄上面加咗酸种包粒粒，多咗种轻韧口感几特别。
另一道冷盘就有黄鳍金枪鱼，用西班牙迷你罗马生菜包住食，伴冰上枱好透心凉啊。
海胆天使面(Uni Angel Hair)
夏天唔想食得大负担，呢道海胆天使面就轻盈地满足喇。作为义大利面中最幼嘅天使面，口感柔软顺滑，可以轻易连埋海胆一齐食，加埋柚子鱼子酱确实一绝。
开心果提拉米苏(Pistachio Tiramisu)
身为Tiramisu粉丝，见到咁大杯Tiramisu真系好开心!! 质地好绵滑亦唔会太甜，上面铺满咖啡粉同开心果碎几有层次。
THE HUNTER
地址: 将军澳唐贤街29号蓝塘傲地下11号舖
电话: 23300204