印度风味结合英国经典有咩新火花? 以印度文中的“Sepoy”(意指印度士兵)为名嘅餐厅—“Sepoy Mess”风格独特，店内挂满手枪，不过唔使惊真身只系火机(笑)，但依然冲撃视觉，玩味甚浓。
“Sepoy Mess”灵感来自英国殖民时期嘅印度，当时英属印度军队食堂(印度称军队食堂为“Mess”) 要满足两国军人口腹，于是以印度食材及香料煮制，同时大幅减低辣度并加入英国风味，做出迎合每个人口味嘅料理，可谓由时代造就与别不同嘅英式印度菜。
店家墙壁更挂有当时英属印度军队真实相片，由印度博物馆慷慨提供。身处香港可以味蕾、环境感受当时军队气氛，系几特别嘅体验。
Arancini Tikka Chaat
呢度小食就将印度经典Tikka，结合欧洲菜Arancini。Tikka以香料、奶酪混合而成，大受印度人喜爱；Arancini传统以义大利米搓圆炸成米波波，外脆内软。
“Sepoy Mess”设计嘅Arancini Tikka Chaat，就一反传统变成香脆土豆波波。内馅富印度特色，有满满柔滑布里乾酪、鹰嘴豆马萨拉、酸梅酱、薄荷酱。两国饮食文化于口中爆发，相当过瘾。
Masala Garden Salad
呢道沙律灵魂系印度常见嘅薄荷酱，将成熟番茄、青瓜、印度洋葱混入新鲜芫荽。清爽微辛，食到印度食材嘅层次又轻盈得多。
Crispy Chicken Burger
“Sepoy Mess”融合印英料理，理所当然地有馅饼(Wraps)同汉堡包啦。相信好多人都系第一次喺印度餐厅食汉堡，入面嗰块汉堡扒真系最惊喜。全因鸡髀肉用咗香料醃制，淡雅香料味道会慢慢渗出嚟，再配搭熟悉嘅番茄、洋葱、车打乾酪。明明口感系汉堡，但味道又好似系印度菜嘅感觉几奇妙。
Keema Masala Tacos
欧美周围都食到嘅Tacos，馅料变成好香嘅羊肉碎，加埋传统香料、番茄、新鲜香草做出清爽口感。羊肉分量好多，真系啖啖都系爆汁羊肉。
Tenderloin Skewers
呢度好多串烧都用咗印度香料醃，同平时串烧风味好唔同。牛柳串烧更另加芥末油、生薑、大蒜，未食已经闻到好香啦。
Afghani Ribs&Chips
相信好少人食过阿富汗羊肋排，24小时慢煮羊肋排以芳香印度香料、芫荽、薑、大蒜醃制。羊肉好嫩，直接拎住嚟食一咬就得。虽然香料众多，但味道唔会好浓烈，有种柔和异国风味嘅感觉。
Mains & Curry
略嫌羊肋排唔够啖啖肉，呢道羊膝一定满足到你!! 羊膝肉事先浸泡喺印度克什米尔地区嘅酱汁。当地以丰富香料、奶制品为主，可以想像味道偏向浓郁奶香。最后加上甜中带辣嘅茴香籽，香味独特，好值得大家一试。
Royal Hyderabadi Biryani
如果要数呢度嘅招牌料理，不得不提Royal Hyderabadi Biryani。受印度海德拉巴(Hyderabad)嘅悠久传统启发，加入藏红花突出香味，以味蕾感受当地文化。
Royal Hyderabadi Biryani有羊肉$238、蔬菜$178、鸭肉$248选择。羊肉会用骨熬煮，增强风味；鸭肉则以洋葱、番茄慢炖，味道较为温和。
Sticky Toffee Pudding
太妃糖布甸系英国甜点，典雅摆盘亦相当有英式气派。呢度会即席淋上咖啡，以甘苦平衡香甜，有种奢华而内敛感觉。
Sepoy Mess
地址: 尖沙咀柯士甸道西1号ELEMENTS圆方3楼R008号舖
电话: 23300316