近期大家都迷「黑白大厨」，都想飞去韩国试下佢哋的手势，不过小编发现喺香港都有间好出色的韩国菜餐厅「釜山商会」，主理人喺呢位Oppa由釜山远赴香港，喺尖沙咀韩国街开设「釜山商会」。
「釜山商会」门口唯美蓝色霓虹灯。
佢嘅故事要数到Oppa出世之年—1990年。当年Oppa嫲嫲喺釜山家乡以自家手艺开咗一间汤饭小馆，招牌猪肉汤饭深受街坊喜爱。嫲嫲将秘诀传授妈妈后，再将猪骨浓汤延伸至猪肉汤面，以釜山人喜爱嘅素面配上新鲜大葱、肉汤及柔软猪肉一同享用。
澳洲学厨 多国烹饪经验包括
唔经唔觉，呢道猪肉汤成为Oppa家传名物，亦系「釜山商会」嘅招牌料理，大家去尖沙咀就食到啦。Oppa入厨之路由嫲嫲启发，却于澳洲付诸实行。2012年Oppa只带一把刀，踏上澳洲冒险之旅学习西餐。眨眼12年于各种厨房工作，包括英国米芝莲餐厅。
Oppa由外国学厨回流，于韩国破格地开设英国料理餐馆引嚟回响。(SBS电视台画面)
多国烹饪经验令Oppa喺韩国、新加坡成功经营英国、日本、韩国料理餐厅。当中，英国餐馆更为韩国人带嚟惊喜，因为当地好少食到外国料理，此举亦吸引韩国电视台采访Oppa掌厨故事同分享技巧㗎。
用心钻研多国厨艺亦无忘初心，继续传承家乡釜山料理。(SBS电视台画面)
独特创新 酱油虾奶油义大利面
2024年甫到香港，Oppa就被香港茶餐厅深深吸引，多国料理兼容并包，互相融合却又发展出独特风味，对入厨嘅佢好大启发。茶餐厅嘅汤通心粉就系例子之一，原来Oppa喺外国都未食过呢种煮法，估唔到效果咁好食。
Oppa受茶餐厅多元兼容特色启发，以汤通心粉为灵感创作酱油虾奶油义大利面。
酱油虾好弹牙，兼富咸鲜发酵及酒香嘅深邃感。绵滑柔和嘅纽西兰奶油，恰好平衡咸香相当惊喜。
同时令佢反思嚟到香港之后点创作? 于是以汤通心粉为灵感，创作呢款独特料理—酱油虾奶油义大利面。将韩国厨师发酵嘅酱油虾；加上纽西兰新鲜乳制品，缔造柔滑咸香层次，一尝融合西方及东洋元素嘅煮法。
韩国拌饭食法又系另一种风味。紫菜增加层次咬口，米饭则牢牢锁住奶油酱汁更满足。
「釜山商会」有咩食?
「釜山商会」之取名，系Oppa对釜山及商业寄望。因为1960年时，好多企业家聚集釜山小餐馆分享生意抱负，自然而然地形成海云台猪肉汤饭一条街。
每枱都有鸭仔纸巾盒好可爱，座位阔落舒服。
一坐低就有6款免费韩国前菜，每3至4个月会转换款式保持新鲜感。
呢度唔只食到Oppa嫲嫲家传至今嘅釜山猪肉汤饭、釜山猪肉汤面，同场酱油蟹亦依当地人做法，用高浓度釜山烧酒醃制逼出独特蟹香。而最吸睛系3款滚住食嘅锅物，今个秋冬好似韩国人咁边饮烧酒、边食热辣辣锅物，正啊。
韩国人喺秋冬好钟意食锅物，呢度都有3款锅物拣㗎。
【嫲嫲家传秘方】
釜山猪肉汤面
第一眼见到咁浓厚嘅猪骨白汤，真系几有惊喜。依嫲嫲家传秘方用猪骨熬煮72小时先做到咁白身。而且贯彻釜山料理嘅简约传统，配料主要系猪肉同釜山人钟意嘅白素面，滑嘟嘟素面好挂汤，每啖都食到猪肉浓香啊。
釜山猪肉汤面。浓郁白汤底系用猪骨熬煮72小时而成。
睇吓汤身几浓郁。
釜山地道白素面，柔软挂汤。
釜山猪肉汤饭
另一款釜山猪肉汤饭都系自家浓骨汤做主角，唔同之处系用石锅呈上。Oppa提到石锅食法系由爸爸嗰代延续落嚟，因为上一代时期嘅釜山处于备战状态，釜山男人连饮食文化都man啲，习惯一边饮酒、一边食饭，一饮可能就几个钟喇，所以会用石锅上keep住温度。
釜山猪肉汤饭，因为历史原因以石锅呈上。
嚟到Oppa呢一代，虽然无咗咁man嘅习惯，但佢哋都好钟意热辣辣嘅石锅饭㗎，有时亦会当作解酒料理。嚟到不妨用味蕾感受吓釜山历史延续落嚟嘅料理啦。
【釜山风味酱油蟹】
除咗Oppa来港创作嘅酱油虾奶油义大利面，当然唔少得酱油蟹!! 特地用釜山烧酒醃制酱油蟹，因酒精浓度特高，强烈酒味更逼出蟹香，比平时更富酒香鲜味㗎。
酱油蟹用釜山烧酒醃制，高酒精特点突出蟹香。
酱油蟹好爆膏。
用蟹盖将蟹膏、白饭、紫菜捞匀食，又系另一种风味。
【3款打卡锅物】
「釜山商会」有好多打卡料理，当中必食Oppa设计兼叠到塔咁高嘅龙头山塔辣猪骨锅。仲有滚住食嘅炸酱面试过未? 份量爆满3个人食都得啊，即睇详情～
龙头山塔辣猪骨锅
店家以「釜山龙头山塔」为灵感，将猪肋骨叠到塔咁高，「塔顶」仲有一大球特制辣酱，将辣酱捞入浓郁高汤滚住食，辣得几过瘾。
龙头山塔辣猪骨锅。以「釜山龙头山塔」为灵感，将猪肋骨叠到塔咁高。
见到猪肋骨叠到咁高唔知点入手……Oppa就话有3种食法，可以拎起猪肋骨捲拉丝乾酪等等。
猪肋骨有3种食法，捲住拉丝乾酪系食法之一，正啊。
海鲜炸酱面
真系未食过有炉滚住嘅炸酱面，目测有两个面超大份，上面仲有5只大虾、八爪鱼、蔬菜，3个人share都好够啊!! 上枱之后等炸酱汁慢慢滚起，边滚边食几有气氛㖞。
好少见滚住食嘅海鲜炸酱面。
南浦洞特色炖煮拼盘
选择困难咩都想食，拣炖煮拼盘就啱喇。集合人气配料—八爪鱼、大虾、五花肉、粉丝等，加埋韩式辣汤热住食，好有风味。
南浦洞特色炖煮拼盘，集合人气配料—八爪鱼、大虾、五花肉、粉丝等。
八爪鱼好大只Q弹啊。
五花肉煮到好软嫩，辣辣哋又有油香。
【探索釜山国际市场】
釜山国际市场拥悠久历史，场内过百摊档售卖各类海鲜、特产、食材，富浓厚地道气氛。Oppa话开店之初，受釜山国际市场食材获灵感，设计咗一系列地道料理。
庆尚道冷面
其中一款受启发料理，就有呢道韩国冷面。汤头都系用猪骨熬制，但大大缩短熬煮时间，恰好熬出猪肉香又令汤身清彻轻爽，好突出到釜山素面嘅柔软口感。
庆尚道冷面，缩短熬煮时间令汤身清彻。
釜山猪肉拌面
釜山料理简约直接，反而更突出食材、辣酱同素面味道口感。好似呢道拌面，食之前将韩式辣酱拌匀，辣味恰好又唔会抢咗猪肉、白泡菜同紫菜味，而且72小时慢煮猪肉又好软腍，好钟意呢种简单地道嘅风味。
釜山猪肉拌面。配料简约直接，味道更有层次。
辣味恰好又唔会抢咗猪肉、白泡菜同紫菜味。
【肉控福音】
韩国菜包肉(Ssambap)、炸鸡都系啖啖肉大满足！「釜山商会」呢度都有得食㗎。
釜山白切肉
唔讲唔知，原来釜山人好少落盐，反而用醃咸虾带出咸味。所以呢道釜山白切肉有两种食法，放上醃咸虾、蒜头系釜山地道食法；用韩式辣酱就系韩国普遍食法，睇吓自己钟意咩口味喇。
釜山白切肉有两种食法。
(左) 放上醃咸虾、蒜头系釜山地道食法。
(右) 用韩式辣酱系韩国普遍食法。
罐头市场风味炸鸡
究竟咩系罐头市场呢? 原来系釜山国际市场前身，因为以前生活较穷困，市场都系卖罐头为主而得名。呢款炸鸡就系当时做法，所以酱汁味道、鸡件切法都会粗犷啲，你又食唔食得出个分别呢?
罐头市场风味炸鸡。沿用釜山旧时做法，酱汁味道、鸡件切法都会粗犷啲。
可以自己淋上酱汁。
釜山商会
地址: 尖沙咀金巴利道79-81号金栢阁地下A-C号舖
电话: 37584517