卓越餅家

营业中

休息中

老式餅店,我淨係買過佢的砵仔糕離食,啡色同白色都有試過,啡色個庶糖好香, 豆的軟硬剛好,唔係好甜, 口感爽爽地, 唔係好黐牙, 而且食完個口唔會酸.白色個椰汁味都香的, 但唔算好重味.我個人推介啡色.

呢間麵包小店位處於十三街旁邊，牛棚對面，相信平時都不會太多客人光顧。它是非常舊式那種麵包店，內裏是焗爐及工場，門口有個阿姐幫你拿取你想要的麵包，沒有得走入舖頭那一種。糖東甩看來將新鮮出爐，忍唔住即刻試兩啖，質地還算不錯，不過糖不算太多，較健康，不過味道就冇咁甜囉。雞尾包反而唔錯，質地都結實，內裏椰絲份量又剛剛好。另外菠蘿包的質地亦都相當結實，的確貫徹了傳統麵包結實，不吃空氣麵包的原則，頂上的皮亦不容易剝落，算是不錯的。不過始終地點唔方便，我亦不是本區街坊，其實如果唔係去牛棚參觀，很少會專程來到這邊。

工作中同事口痕，買咗蛋撻同我分享，店面好舊式中式麵包店，白底紅字，店後係廚房，店外放咗蒸爐同好多金屬焗盤，背心膠袋簡單袋好！佢比咗一個我食！蛋撻（$6/2個）：一個薄蛋撻紙兜，賣相一般，蛋漿雖然金黃，但好扁，只有一個蛋撻皮嘅一半，咬落曲奇皮幾香脆，而且香牛油味，但中央嘅蛋漿一啲都唔嫩口，太乾又實，竟然係有少少彈牙添，質地完全唔啱！味道其實唔算太甜，但整體唔好味！蛋撻真係唔好味，我希望佢係一時失手！

在馬頭角道的卓越餅家，只見一阿姐負責店面工作，一大叔則在店內廚房忙個不停，懷疑乃夫妻檔也。傳統舊式餅店，沒甚裝潢可言，穩穩當當，為附近街坊，每日提供新鮮即製的價廉飽肚麵包。蛋撻$3.5一個， 應該剛出爐不久，放在掌心仍帶微溫熱。鵝黃蛋漿晶瑩剔透，如含苞待放的青澀少女，煞是誘人！咬下，蛋漿香濃幼滑，蛋味突出，惜酥皮稱不上十分香脆可口。砵仔糕$3.5一件，面層鋪滿軟腍香甜的紅豆，砵仔糕甜度適中，質感香軟具咬口，未算極品，但水準也算不錯。

2008年12月3號 - 上午8點左右今日行去碼頭經過卓越餅家。 就去試試他們的蛋撻la。 因為末試過。 用5蚊買左兩個都算OK la。試試先。 Um。 都好好wor。 開頭不發覺個皮是酥皮的。 但是咬落就感覺到它脆脆的皮。 而個蛋好好吃呀。 好滑&爽口。 好好味呀!衛生方面就OK。 有蓋蓋著。

本來巳經食飽早餐，行過見地有新鮮出爐麵包，口痕食番個，話要雞尾包俾個$5佢找，找番$2，咦！心諗都唔平。睇真D原來係$3兩個包，依家仲有咁平，真估唔到，味道仲好好添。一間幾唔起眼小鋪，應該有好多年歷史，隱身響土瓜灣十三街，行過都唔知係寶，有個阿伯裏面麵包，阿婆就負責賣，唔知仲可以做幾多年呢？

嘴饞。記得上次話過要試吓佢哋嘅蛋撻及雞批，今次坐言起行....雞批size頗袖珍，一口一個。咪睇佢細細個，用料卻係頗足，可以食到細件雞肉，而唔係只得一pat糊，難得...蛋撻酥皮頗鬆化，蛋漿夠厚，又係足料之作...講味道，比起附近嘅白宮好得多....更佳嘅選擇....

呢度係繼白宮後另一買麵包之選...位置就响平時等巴士嘅地方對面，方便之極...一睇就知歷史悠久，仲有個老師傅負責所有出爐麵包...簡簡單單一個雞尾，新鮮出爐，熱辣辣，點難食都有個譜...仲要係兩大洋一個，平到震...見到出爐蛋撻好吸引，下次試埋再話個你聽...

樓下的麵包店,睇個樣起碼仲老過我.差不多與十三街共存亡,唔好睇外表up蹋,其實不知幾好生意,整個區域吃麵包蛋糕,除白宮外,就到佢.最受歡迎的,就是賣$5三隻的蛋撻.晨早流流三隻到肚,事後非常精神.老實講,酥皮唔夠鬆化,但個蛋漿很香.拉上補下,扯成平手.當然,還有今日在泰昌也吃不多的- 人情味.