南記粉麵 (謝斐道)

营业中

休息中

作為重口味人士，見到南記有芫荽餐就想食！芫荽米線套餐：芫荽，芫荽，全部都係芫荽。有芫荽湯底+ 一份芫荽+ 3粒芫荽丸+芫荽可樂。湯底比想像中冇咁濃，除非同埋芫荽一齊食，唔會太重口味。米線慢慢浸，食到最後會有少少芫荽味。豆卜更能吸芫荽精華。由於已不停食芫荽，已麻木，芫荽丸味道唔太出，好似豬肉丸咁，少少彈牙，口感幾好。第一次南記炸豬扒，唔錯，可會太乾。至於芫荽可口可樂… 最難飲嘅可樂，兩者一啲都唔夾。寧願默默地飲湯底，好似飲芫荽皮蛋湯咁。整體除咗飲品伏，米線okay，可以一試。

買外賣，試新野，莞茜餐莞茜湯＋丸、豬扒米線、莞茜可樂莞茜味不算太重，而且這個餐沒有最好味的春卷，就是多了莞茜味的米線餐，還有個莞茜可樂，都算幾特別幾好味。喜歡試新野的朋友，應該會有種衝擊的口感

【港仔南記粉麵】香港人必食快餐之選🍜👍每次講起食粉麵一定會諗起南記招牌魚春捲，魚皮餃湯河粉配上碟生菜，健康又美味仲有杯有營養豆漿呢多年來水準依然簡直是窮人恩物呢！！

一場嚟到南記, 梗係試佢聞名中外嘅春卷啦。當日係晚飯時段 , 餐廳採用自助形式經營,先付款後取餐, 慳返唔少人手。我點咗個蕃茄牛腩小鍋酸辣米線, 蕃茄湯底用料好足, 番茄味十分濃烈, 牛腩好淋 配埋佢特有嘅醬汁,味道一流。而係酸辣度方面, 尚算可以接受, 連我平時呢個唔食辣嘅人都食到舐舐脷津津有味,十分正😉而啲春卷都一直保持返原有嘅水準,春庖內裏用料相當足,有蝦、腐皮、魚肉等等等等的材料, 各種材料好似起咗化學作用般結合成了呢個遠近馳名嘅佳餚😁

灣仔謝斐道分店經常出錯外賣，每次早餐叫米粉比公仔面，叫通粉又比公仔面，今次我特登望住個staff叫單，我叫生面佢又叫廚房整公仔麵，我叫嘅係仿鮑片太陽面餐，離開鋪頭前我已經好唔放心，特別打開黎睇下，點知一打開發現佢比左一塊餐肉一隻蛋！完全錯晒！我話佢知，佢隊比廚房再放過d料，點知都係錯嘅，佢拎走塊餐肉，只係放番兩塊火腿落去就比番我！咁仲有兩塊鮑片仲有條腸仔仲有條春卷呢？我問個staff點解次次都錯，望住張單都錯？佢一句唔好意思都冇，就咁話佢後面個廚房係新黎嘅！咁既然佢係新黎又唔識睇字咁點解唔教下佢或者幫佢？

比較喜歡吃南記，由細細個在香港仔已經食佢。獨有嘅春卷不是一般春卷，是用魚肉做的，好大陣鮮魚香，而皮都不是脆的，口感似腐皮但無咁靱，好好食。而湯底都不錯，就咁都好夠味。

平時一題係南記大家都會諗起佢最出名嘅小鍋米線但係最近佢推出左全新嘅早餐餐牌配搭都幾新穎所以今日我就試吓究竟佢嘅水準係點樣我揀咗嘅係皇牌豬扒特色早餐入邊有豬扒火腿茄汁豆太陽蛋腸仔同埋牛油餐包我在加左$6叫埋個蕃茄火腿通佢嘅份量都算幾多幾抵食以50蚊嘅價錢都唔使再可以食到一個好豐富嘅早餐豬扒幾入味，煎得幾香口，肉唔會話太硬太難入口塊豬扒幾厚身，比一般連鎖餐廳店嘅早餐水準高了不少 最特別嘅係火腿通佢嘅蕃茄湯底十分濃味配搭上比米線更加適合稱得上係南記一個令人驚喜嘅新選擇

之前係廣告見到「南記粉麵」出左胡椒豬肚湯底，心入面已經bookmark左一定要食，今日天氣咁岩涼涼地，最岩就係食依碗「胡椒豬肚湯雞翼米線」暖一暖個胃。除左本身啲餸之外，當然要加錢加埋佢地既招牌春卷，麵底我都按照自己個人喜好，轉左做米粉，因為我覺得南記既米粉唔會話煮得太淋，夠硬身😚講返個洗新湯底，開頭食啲米粉嘅時候唔係好覺得好重胡椒味，但飲飲下個湯，就開始食得出一陣陣既胡椒味，唔會話太重味令喉嚨唔舒服。豬肚既份量都唔少，同埋最重要係無怪味，雞翼都唔會話煮到啲肉太淋爛曬咁👍🏻但係，反而覺得今次啲春卷都比較凍，好似放咗好耐咁。另外，跟餐個野飲「香蘭葉桂圓茶」，第一啖已經覺得好香香蘭葉味，加埋桂圓成杯野飲好清新，又唔會太甜👍🏻個人評分（滿分為5）味道：😉😉😉😉環境：😉😉😉員工友善度：😉😉😉😉CP值：😉😉😉😉

住新界平時少食南記 難得想食過快飯又唔想等位 米選擇食南記 但灣仔依間食飯時間長期長籠 就算有位坐都好有壓力 好似好多人望住食飯今日見到有新野仲要$53就有飲品 當然要試吓服務員有提可以將擔擔麵轉米線 值得一讚湯底味濃冇特別之處有明顯花生味 但食完十分口渴 久久不散 🤦🏼‍♀️🤦🏼‍♀️麵份量足夠 飽肚感十足 芒果特飲 冇死甜感有果肉同清爽的茶味 意外的驚喜～

以前舊公司樓下有間南記，基本上早午餐都食南記，本身好鍾意食粉麵所以食極都唔厭，轉咗工少食咗，經過都會入去食下經過灣仔見到有南記又去食下，叫咗個套餐加大腸，飽到上心口雙拼湯河配魚片頭套餐 $47我去南記必食春卷，食過幾間其他連鎖店嘅春卷，都係南記最入味。魚蛋就係次選，大大粒好彈牙，河粉粉量都算多，基本上無魚片頭都夠飽。依個套餐d魚片頭係即炸加撒上椒鹽，勁邪惡但好好味辣爽爽大腸 $24見到爽字以為係炸大腸，原來唔係，爽嘅我估指芽菜，芽菜真係好爽，不過麻辣汁好加分！勁惹味，撈飯更加夾！

我叫左酸辣小鍋米線，我想話d湯淡到好似清湯咁，完全唔係酸辣湯底，好難食，第一次食到咁難食嘅南記酸辣小鍋米線，跟住問經理有冇得濃少少，跟住佢話只可以幫我加辣椒油...跟住分店又完全冇冷氣...

位置就近會展！星期六上午參觀完展覽，跟幾位朋友在會展附近找餐廳食。大家都很久沒有吃南記，於是一致決定食南記！雙拼蕃茄濃湯$51- 我點了春卷、貢丸、魚腐蕃茄湯米線，等候的時間俾一般清湯米線長些少。米線份量都很多，坦白說蕃茄湯底人工味較重，跟新鮮蕃茄不能完全融合，有點兒失望。三個配料之中我喜歡春卷，口感雖然不香脆，但是還爽口彈牙，推介。魚腐煮得發脹，口感不是太好，而且貢丸都是普普通通的質素。

話說我下午5點咁上下去食啦，諗住無乜人，又夠清靜，因為佢好細間。落單個時 個收銀啊姐好似趕住去投胎，我都未講完 佢就岀單，然後態度勁差話我要早d講，佢岀錯單已經唔係第一次！之後一直聽到佢落其他單都係勁差既態度

今天下午2：30到灣仔南記吃麻辣酸菜石斑魚米線$53一碗我係因為睇到佢門口出面幅相先至入去食。雖然我明白廣告相片應該係會比較靚同埋多餸，但係都唔會離譜成咁，淨係睇幅相覺得佢好大碗，點知一個人都唔夠食，唔好講話男人，女人都唔夠食！酸菜絲得幾條，真係幾條可能有四條至五條一件石斑魚都冇一條菇都冇冇芽菜，冇蘿蔔剩係得四隻餃子同埋一條唔知乜嘢啡色嘅米線份量亦都得好少，得一住真係離晒大譜人哋譚仔30幾蚊大大碗，雖然唔應該咁樣比較但係佢咁樣做就係觸犯左標籤說明條例一定唔會再去食！

平時想食粉麵嘅話通常第一時間都會諗起南記粉麵平時我多數會食牛腩大腸酸辣米線要酸唔要辣今日我反而想食下其他牛腩牛丸河粉南記嘅湯底真係好濃佢哋嘅牛腩有少少韌有幾舊冇乜脂肪有d乾全舊都係肉如果可以多d半肥瘦就好啦牛丸有成三粒好抵食味道都好入味亦都好彈牙河粉嘅麵底都好爽彈河粉亦都好多條條分明唔會黐埋一齊今次冇加錢要豆漿雖然係外賣同埋我都隔咗一段時間先食佢嘅河粉都冇索晒啲湯仲有好多湯淨湯底亦都好夠熱唔會好快就凍哂