巴蜀麻辣米綫 (已搬遷) 新店位置

從紅磡搬遷到大角咀，對小弟而言，地點上的確冇之前咁就腳；但為左一再品嚐愛好的麻辣米線，今日把心一橫，lunch老遠都要走一趟！到左大角咀後差點迷路，但幸好終於揾到。環境方面，以往在紅磡的擠迫局面，今天不再了.......地方大左、光猛左，亦衛生左，過往數張圓枱已變成清一色方枱，在舖內並列兩行。食物方面，點左蒙古香草烤雞翼 ── 非常熨口，表皮烤到少許黐牙；內裡肉汁及水份夠，有d似係烤之前用水煮過的原故。總之味道及各方面都不俗！另外，當然就係麻辣米線啦！ 個湯底味道依舊良好，好重香料味，米線質感韌韌地夠咬口，依然唔會浸浸下就發到漲曬。一貫的，點翻燕肉餃，味道OK！以前在紅磡，午市都會送一杯豆漿.......今次我見佢上左碗米線但無跟豆漿，於是就問下店員，點知原來無再做呢個優惠﹝除非係學生，而且叫兩餸或以上米線﹞。另外，價錢亦加左少許，可能係舖租貴過之前.....不過，其間同個店員傾開偈，佢知道我地係舊客又專程過黎，於是就送左兩杯豆漿畀我地，哈哈！有機會都會再去！