明記黑山羊專門店

营业中

休息中

位於東廣場地面層，美食廣場位置。人流比較多，座位較逼，食個麵就走都唔大問題既，服務有啲急，價錢親民，下午茶會送埋飲品。✨味道69分，環境63分，服務65分。.🔸馳名黑山羊米線($54)配姬松茸蟲草花羊骨湯底，有少少藥膳味加羊味。羊肉羊味濃，有少少羊蘇味，薄得黎唔韌。米線口感唔錯，咬落少少煙韌就唔會太稔。.🔸馳名厚切紅燒牛肉上海麵($54)紅燒牛肉整得好軟熟，牛味好重。湯底都ok，但係配上海麵唔太夾，唔係好吸味。上海麵麵質煮得較稔。

黎到東廣場，呢間聽講食羊食牛都好出名的專門店試下。位置唔洗等，都幾多位。叫左個厚切紅燒牛肉上海面，感覺自己係屋企都煮到呢個質素。湯底都濃，面都正常口感，但如果有期望佢係專門店，厚切牛肉又未有達標。$54一個牛肉面無飲品，不算太抵食。

喺餐牌上面寫咗著名黑山羊米線/新出品羊腩米線 ，我就問職員有咩分別，因為我開頭以為是兩種羊，去解答我就係黑山羊米線仔羊肉片，而羊腩米線就係有皮有骨，因為我本身諗住嗌一款小食叫做滷水豬皮，咁所以喺米線部份嗰度選擇左羊肉片，即係著名黑山羊米線。著名黑山羊米線 - 碗米線嚟到嘅時候第一個感覺就係…無晒食慾，賣相真係好唔靚，碗湯就有一啲藥材嘅味道，我嘗試第一啖湯，雖然佢聞到藥材味道，但係其實佢個湯嘅味道就好淡，真係好清淡，如果連埋米線一齊食，會覺得係水煮米線（唔係辣嗰個水煮，係清水煮嗰個水煮😅）羊肉片講真都幾騷，我開頭以為羊肉片係好似我哋打邊爐嗰啲羊肉片咁薄薄一片，原來唔係，佢係好似一嚿瘦肉切片，都切得幾厚，肉質就有啲硬，唔容易吞嚥需要咀嚼下。台式滷水豬皮 - 好食，開頭以為係豬皮蘿蔔嗰啲豬皮，原來佢係五花腩肉上面嗰塊皮，佢整得唔肥膩，不過當你食第三舊嘅時候，就會覺得好鹹，不過奇蹟出現！我連埋米線一齊食，覺得好好食，Perfect match ! （因為我頭先講過，碗米線淡如水，幫佢配上有少少鹹嘅豬皮嘅時候，就一拍即合。）呢款台式滷水豬皮真係好啱我口味👍🏻

冬天最好就係食羊腩🤤平時都係食開羊腩煲，今次就試下羊腩湯麵～黑山羊腩上海麵- 一碗有5舊羊腩，份量都多，仲要大大舊- 羊腩冇膻味，好易入口，而且唔會太un- 湯底係姫松茸蟲草花羊骨湯，飲落好鮮甜，仲有羊既鮮味👍🏻咖喱羊腩飯- 以碟頭飯方式上- 咖喱同平時食開既無分別✔️建議黎到呢度食湯麵正啲！仲有車仔麵選擇～平日lunchtime多人等位，有機會要同人搭枱。落單上餐時間都快！由點餐到食，都唔需要等太耐時間～

一直想嚟試，一直無時間，觀塘太遠唔就腳，是日放假但又要去觀塘處理工務，完事後即去試；一去到東廣場就聞到陣羊肉味，聞味見鋪，坐低即刻叫左個羊腩上海面，面到試湯，味道挺好，湯底好清有藥材香，羊腩四舊，有咬口，就有肉有皮有骨髓，上海幼面，口感好唔太淋，最怕一早整好果啲，又淋又一pat嘢咁，但份量真心小，價錢小貴，羊腩面加奶茶，承惠$70

東廣場食店林立，見明記幾乎坐滿，質素應有保證，雖然坐位唔寬敞但都算舒適，而且乾淨冇黐笠笠又冇污漬，職員有禮積極。黑山羊米線用松茸姬蟲草花羊骨湯底，好清又帶藥膳同羊肉香味，飲多都唔會口渴同黏口，米線質地比較結實，舖頭有標明係為咗保留米味同埋口感，需要落單時可要求‘淋啲’，但原裝煮法更具特色。鹵水蛋夠入味而且半流心，羊肉偏瘦，帶筋位置相當好食紅燒牛肉米線都係清湯底，照顧返唔食羊嘅客人，米線質地一樣，相對羊肉米線無咁突出，但都屬於好食

.觀塘好多出名良心平價小店💛今日就去左食間食羊既試下.🥢 馳名黑山羊米線 $54本身我唔太鐘意食羊🐏超愛吃羊既友人話呢個羊好好食😋好大陣濃濃既羊羶味 加上啲羊肉超淋好重羊味👍🏻.🥢紅燒上海牛肉麵 $54麵底就相對黎講普通啲🍜牛肉都有牛味 都幾淋身加上個湯底都幾重牛味幾正🐮.我覺得以呢個價錢黎講係幾好食✅平民價加上一碗麵都好飽肚鐘意食羊既朋友真係要試下🤤

話說今日想去Mcdull喺觀塘嘅飯堂「雲南阿老表黑羊湯鍋米線」，間舖頭轉左新嘅位置，近鴻圖道同敬業街交界，其實都幾隔涉。好辛苦咁行到去，點知又摸門釘。行返出去東廣場，點知又比我見到間食羊肉米線嘅舖頭，諗都冇諗就坐低左。我同Mcdull兩個人，叫咗一碗羊肉米線$54同埋一碗羊腩湯飯$64，加一杯凍飲都係$6，價錢真係幾平。點完餐俾咗錢等左一兩分鐘，啲飯同米線就到，好快。喺香港食羊肉米線，我應該就只係食過「雲南阿老表黑羊湯鍋米線」，所以好自然就會拎佢黎比較。依度嘅羊腩，羊肉都俾好足份量，絕對對得住個價錢。羊肉切得比較厚身，比較重肉味，亦都相對較鞋口🤷‍♂️米線幾好食，唔會太淋，啲湯比較鹹。冇比較冇傷害，我都係覺得「雲南阿老表黑羊湯鍋米線」好食啲。羊腩反而真係幾好食，分量真係好多，有肉味，比起好多大排檔叫嘅羊腩煲都好。羊腩排有啲連骨嘅肉仲帶少少肥，加埋少少蔥黎食，真係好好送飯；啲湯都係偏鹹。如果我下次繼續係碰門釘，我都會再嚟呢度食，翻兜會叫羊腩飯/米線。Mcmug綜合評分：6.5/10，可以一試，建議食羊腩湯飯，抵食好食，但千祈唔好飲晒佢啲湯。Mcdull 綜合評分：6/10,羊腩好食

中秋節早收工，所以嚟東廣場買個lunch返屋企食，慶祝一下！嚟到啲姐姐已經好親切咁問想食咩，推介下啲嘢食咁～🤪我用Lingduck落單，套餐會送嘢飲，嘢食仲每樣平1蚊，真係好抵，而且使用方便！ 🦆 我叫咗一個黑山羊湯飯($54)，羊肉嘅份量好多，佢有唔同部份嘅羊 —- 有啲係連住脂肪、肉質夠腍嘅羊肉，顏色比較淺嘅；有啲肉質較結實但羊味就濃好多，顏色比較深色啲。所有羊肉都無乜羶味，好易入口；湯底就有啲似牛腩河嘅湯底，但多咗一份羊肉嘅肉香。🐑 🍚 凍檸茶少甜少冰就正常～ 🍋 炸魚皮(lingduck優惠價$12）份量多，好脆好香口，有魚味，係有小小鹹，但點完湯再配飯食就啱啱好 🐟 🍲 呢間小店羊肉非常出色，價錢親民，係觀塘區嘅回頭之選💛💛💛💛

一個人唔知食乜，見到好似好好味，就坐低左。😋😋諗緊牛定羊，睇左一陣先叫，都無人催竹。最後試左黑山羊米線，$54人，下午茶有凍熱飲品送。😍😍原來佢地啲米線大大張紙寫明係比較爽，但我無睇到，無叫米線淋啲。好味到，我飲晒成碗湯，羊肉唔羶但有羊味。見好多人叫豆腐，下次都試下叫車仔麵先。東廣場好多舖都係先俾錢，姐姐都講得好清楚幾錢，我食完碗麵，慢慢飲埋杯凍檸茶，都無俾人趕，唔明點解有人話佢地服務差。💁🏻‍♀️下午茶抵食又好味😋

係望月訂咗月餅落樓下見到好多間嘢食都好難決定🙈本身我好鍾意食羊，見到呢間黑山羊又記得係黃就一定要打卡啦💛見到舖頭幾full就決定外賣，因為返到屋企都要差唔多九個字就嗌咗個黑山羊湯飯，又加咗蘿蔔同菜脯煎蛋😋比咗錢未夠三分鐘就拎到？？？光速出餐反而讓我有啲擔心⋯⋯同埋得一個大碗仔，好似阿姐話湯同飯係分開㗎？已經一袋裝好我沒諗太多就拎走咗，返屋企好期待咁打開，個碗入邊有羊肉片，有配菜有蘿蔔有菜脯煎蛋但係——沒！有！飯！一粒米都冇！我整個人be like WHAT？？？我按湯飯價錢比錢但湯飯冇飯係乜玩法？個menu度我都沒見到可以叫淨湯，同埋我只係講走餐具，唔該阿姐聽錯以為走飯？？？邊個會叫湯飯走飯啊大佬⋯⋯🙄🙄講返個淨湯，雖然唔係厚切但羊肉量都唔少，亦都好食，蘿蔔夠大舊夠淋夠入味，菜脯煎蛋都係家常味，可能因為黑山羊本身脂肪較少，湯鮮香清爽唔油膩，冇乜羊羶味，整體好飲～黑山羊湯飯 5.0/9蘿蔔7.0/9菜脯煎蛋 6.0/9OVERALL 5.5/9阿姐係門口好熱情招徠，跟住就催落單？其實都有啲負擔😓如果唔係因為黃我又好耐沒食羊我可能唔會幫襯，高峰時段好忙都可以理解，但湯飯冇飯真係有啲離譜喎☹️

💛黃店📜”明記黑山羊專門店 (觀塘)📍地址:觀塘成業街7號東廣場地下G13A&G15號舖🤍分店地區: 觀塘📝評價💬📢 係東廣場有好多野食 要簡間黃店是必須💛自己一個食 車仔麵一定係必選💛💛自己吾係對羊肉特別有興趣 同埋叫肉都會好多食吾曬🙈🙈普通咁叫個3餸都好正💛 幾中意佢款米線🍜好爽口😍😍個口感係我食咁多間米線入面最中意💛👍🏻👍🏻👍🏻👍🏻配料選擇多 仲有芝心獅子狗😍😍好耐冇食過呀🥰店員全部都好熱情好nice!🏵環境指數:⭐️⭐️⭐️🏵味道指數:👅👅👅👅🏵抵食指數：💰💰💰💰🏵回購指數:❤️❤️❤️❤️

因為另一間黑山羊米線執左所以就試下呢間 一入去就已嗌黑山羊米線 凍檸茶啦跟住坐低無一分鐘個姐姐叫我坐個位比佢擺返d野入去但當然唔係好full 一半人都無Ok 我諗住由佢 之後佢好快出左碗米線然後米線一放低個姐姐就拎走我個位既酸菜我o左咀 早唔拎遲唔拎係都要放低左碗米線時加酸菜 好 我都忍住 等佢加完比返我 跟住我開始食左兩啖米線竟然同我收錢 話咩$60??我出聲鬧佢哋我淨係想坐低食碗米線唧食緊野叫個客比錢？到底要我讓幾多次？然後我食到成肚氣比完錢就走 重點係，另一間好食十倍

經過觀塘，諗起黑山羊喺附近，就去試一試最喜歡佢嘅羊肉米線下午茶有嘢飲送米線 - 夠煙，唔會煮到林晒羊肉片- 大約八片，個湯夠熱加送椰菜餃加$12得2隻菜脯煎蛋$12一片第一次食米線可以將成個湯飲曬，真係會好飽。成日都唔使再食嘢

1- 黑山羊羊肉米線 配姬松茸蟲草花羊骨湯底 下午茶送嘢飲 $54羊肉好正， 本小妹覺得呢，食羊肉，要有少少蘇味先好味道的， 呢間嘅羊肉就真係有少少蘇味同肉味很濃，正 湯底係好濃郁嘅羊骨湯味呀， 但真係食唔出有姬松茸蟲草花味道呢個價錢如果午餐冇嘢飲就有少少貴，因為羊肉得嗰幾塊， 杯熱奶茶好飲2- 自選米線三餸 配金華火腿椰子雞湯底 下午茶送嘢飲 $44邊三樣餸唔記得（睇相），叫著2碗，記得嗰幾樣餸味道好一般， 同份量好少， 湯底係食唔出有椰子雞湯味哈哈哈呢個價錢嚟講都頗貴唔知會唔會因為下午茶，所以份量會少啲呢，， 如果午餐係呢個份量嘅話，本小妹一個人食一碗，係得5成飽的