時新漢堡飽 (已結業)

朋友推薦來吃，今日就來試試，叫了双層漢堡包，炸薯條同凍利賓納。薯條夠熱同脆，即叫即整。而漢堡未如想像中好，漢堡味道係新鮮，惟個人口味覺得配了醬汁未算很好，利賓納也比較淡。

以前去親紅館睇演唱會，一定會預早小小時間，行去以前嘅舊店買時新漢堡，自從搬左去黄埔後，就再無食過，今日去黄埔一定要再試下新店比以前舊店乾淨左靚咗可惜佢地仍然係半開放式廚房，所以全間店嘅油煙味非常勁最後我叫左下午茶餐，加左$10變雙層漢堡，凍飲要加$5雙層漢堡+蛋+芝士漢堡都幾有肉味同咬口，其實最特別係佢嘅自家醬，酸酸甜甜，幾開胃其實我覺得呢間好主要係食兒時嘅味度，回憶總是美好同無價的，所以每次食都覺得好好食但值得一提係佢杯凍檸茶，我雖然叫左少甜，但佢杯茶真係淡而無味，完全無紅茶味，似飲檸水經開呢頭都會再食下，但只限漢堡

呢間港式漢堡包，相信好多人都識，以前係舊鋪食過幾次，都覺得好好食，好有香港風味！我今日先第一次去新鋪食，環境翻新，味道依舊☺️🎊下午茶餐🎊【單層漢堡芝士蛋包+炸薯條（細）】$42（加+$10轉雙層）漢堡包真係冇得頂🤤🤤漢堡係鮮牛肉，食得出係自製嘅，好juicy ，但芝士味唔算好濃，最正係秘製沙津醬，酸酸甜甜，懷舊嘅味道，惹味十足😋 【炸雞髀+炸薯條（細）】$41雞髀外皮炸得好脆，肉質鮮嫩，一切開有唔少汁流出嚟，個人覺得可以再濃味少少，同埋偏油🤭🧆小食【黃金脆雞粒】$16有成12粒，重要幾大粒，味道都唔錯嘅，如果可以再脆d就好喇！✅總評：（5分為滿分）環境：3/5味道：4/5性價比：4/5推薦度：4/5

早年經朋友介紹食過一次時新就愛上佢嘅港式漢堡包嘅味道，但自從搬去後一直都唔知佢地址，終於有一日俾我發現到時新個新地址，架要立即去食下個漢堡包啦止下癮，咁去到嗰陣時大概6:30啦，人流都唔算太多，可能因為重早嘅關係。雙層漢堡+芝士蛋我一見果包諗住試下一啖咬落去，但真係太過厚，只係咬到3份一，漢堡扒咬落好juicy ,最正係自家製嘅沙律🥗醬，兒時的味道立即湧現在口中，加埋蛋及芝士直頭係人間美食極品😄。炸雞🍗脾我見隔離枱隻雞髀🍗賣想好吸引，即刻買一隻試吓，外皮炸得香脆，一🔪開啲肉汁流晒來，真係外脆內軟。炸雞翼麥生係雞翼控，一見到雞翼就必定會叫的，雞翼炸得外皮勁脆,加埋自家製沙律醬及黑椒汁，正脆雞粒一口一個size 啱啱好

難得嚟黃埔探索下有咩好嘢食，就試吓好耐好耐都冇食嘅時新漢堡啦，其實鋪頭搬咗之後都冇再食過啦，聽講呢間漢堡店係好多理工大學學生嘅回憶。由於我哋已經食飽咗飯，呢個係下午茶所以淨係叫咗芝士蛋漢堡(單層)，價值$29，即叫即整係一路以嚟嘅賣點，呢個漢堡包最好食嘅一定係嗰塊漢堡啦，自家製喎出面冇可能食到呢個水準🥰😻💕，仲有佢塊蛋都值得一讚嘅，因為蛋白邊係金黃色，煎到脆香，有金邊😋，熱辣辣，加上半溶嘅芝士同埋少少沙律醬🤤🤤🤤不得了，太好味啦🥰必食之選😊😎如果你無食過時新漢堡，唔好話你食過漢堡🤣神級嘅地位喺 irreplaceable 👍🏼誠意推介👍🏼 炸雞脾🍗，$29，就普通咗啲，可能好食嘅雞髀太多選擇啦，呢度都係食返漢堡啦☺️

再一次光顧時新只係為了尋找童年的時和支持小店，漢堡飽和薯條也能保持水準。今次見到有我的最愛洋葱圈一定要點一碟食下..... 伏咗，唔知是否我年紀開始大，覺得非常油吃了一口已經不太敢吃另一口所以味道如何真的不太知道。總括而言叫漢堡飽同薯條就可以了。

人人都話正嘅漢堡飽店，真係要試吓啦！🔸雙層漢堡芝士蛋包 $37 (3.3/5)港式漢堡包，味道港式，熱辣辣，好有懷舊風味！不過牛肉扒就冇乜牛味，又唔算硬身嘅🤧，有少少失望💔🔸炸雞全翼兩隻 $27 (3.2/5)隻雞翼唔係好入味，不過勝在夠脆，炸到又香又脆，加番少少分😆🔸炸洋蔥圈 $30 (2.8/5)佢係用新鮮洋蔥造成，不過佢太油啦，食完之後成口油，同個樣相差有啲遠🤣

早餐黃埔花園的時新漢堡我覺得呢間好味過蕪湖街嗰間呢間裝修平實，開放式廚房，油煙味，令我想起舊舖蕪湖街的裝修走品牌路線呢間漢堡扒無咁咸唔知點解早餐套餐有羅宋湯，好難飲，全茄膏味

今日左個早餐+親子餐早餐：漢堡包（加左十蚊轉雙層）+羅宋湯+ 凍檸茶親子餐 ：漢堡包x2 + 雞全翼x2 + 薯條另外單叫左個洋蔥圈1. 漢堡包系之前個味道？太耐忘了，但肉汁女都夠，沙律醬的份量合適，唔搶味，配合到，個包暖暖地。外賣食就唔適合了2. 羅宋湯一個字，Hea. 見到有料的，都林的，但可能無落肉或太少帶唔起個味，唔難飲的。3. 炸全翼入味的，個味道都好好，唯一都系凍啊，啲野普遍都係唔夠熱啊，搞到啲嘢食減分。同埋個油溫控制得唔好，眼見成只碟都係油4.薯條個薯條夠粗夠厚，但係炸得唔夠透啊，仲要凍埋，個油溫控制得唔好啊，好浪費啊，個底子好好，但技術跟唔到5.洋蔥圈夠大個，個粉又岩岩厚薄，脆口的，賣樣都好靚仔。問題都系凍啊，我系後加單點的，一拿到手已經食，炸野凍左真係無曬feel整體俾差真係好Mean, 但只可以講 fair 最後系花絮時間，同老公同時各自拿起只翼，但又不其然各自放低隻中譯留俾個仔，呢啲就係父母嘅愛🥰

自從紅磡橋底嗰間舊店執左之後都好耐冇食過港式漢堡包喇！比起以前，我更喜歡而家嘅時新漢堡包😋 因為主觀地唔鍾意食洋蔥... 但以前漢堡牛肉打左洋蔥喺入面，而家就冇😆雙層漢堡配芝士 洋蔥圈漢堡包暖暖地，個包外烘到少少硬，不過入面都仲係軟身嘅！牛肉都幾Juicy, 配埋自家製沙律醬，甜甜地，超正呀！朋友話洋蔥圈炸到好香口好味👍🏻單層漢堡配蛋芝士 薯條如果普通食量，單層漢堡包配埋薯條野飲都足夠～ Juicy牛肉配埋蛋同芝士夾埋一齊簡直係絕配！超好食！！芝士溶溶地，好惹味😋一定要試吓時新醬！！有驚喜

1️⃣ 單層漢堡包配芝士+蛋 $29 (7/10)揀左牛肉漢堡同自家嘅時新醬🥳醬汁令到成個漢堡好好味，加咗幾重口感😍加埋煎到少少燶嘅蛋，蛋黃少少流心但又唔怕流晒出嚟，增添咗好多口感👍🏻牛肉漢堡幾足料，雖然無得同100蚊嘅漢堡包比，但呢個價錢黎講真係算高cp🥰2️⃣鮮炸洋蔥圈 $30 (6/10)有少少失望，洋蔥圈偏厚，食落洋蔥味唔太多🥺不過炸份一啲都唔厚👍🏻哩個價錢，算係久違地食下洋蔥圈都唔錯😋

🍔 芝士蛋雙層芝士漢堡 HK$37香港風味雙層漢堡，然後加咗芝士同蛋。漢堡扒食得出係自家製，幾有咬口，唔會太鹹但感覺細塊咗少少。佢漢堡包類原本就配咗佢個時新秘製沙律醬，沙律醬味道唔好好鹹好甜。芝士唔係Cheddar Cheese，所以芝士味道唔重。整體個包味道唔會食完好鹹好溜，但無乜驚喜，而且個包唔算特別大個。.🧅 鮮炸洋蔥圈 HK$30份量正常，雖然佢炸得黎唔係好金黃色個種，但勝在夠脆身。--📌 免加一服務費

嗰日咁啱依家黃埔所以決定食返個漢堡包，咁啱黃埔有一間非常懷舊嘅漢堡餐廳，梗係要去試吓啦。漢堡厚身，咬落好多肉汁，包非常軟熟，配埋一杯凍冰冰嘅可樂，呢個配搭一流。

最近成日出開去咁岩又有想試既漢堡包，呢次黎左近黃埔既呢間鋪試下。我去到岩岩過左早餐，所以我叫左個單層漢堡同凍奶茶當食早餐。當日我剛到時只有一枱，人不太多。坐左一陣即有得食，漢包既包皮係有微微焗熱左少少，外面少少脆又夠軟熟，漢堡扒就比較細塊，配埋佢地本身既沙律醬，塊扒係好食。如果比我再叫多次，我諗我會試下其他醬同埋轉做雙層再加番隻蛋！不過份量同埋價錢就真係唔係幾值呢個價，如行開見到既話會再食既。完。

時新漢堡包以前叫時新快餐店，有勁多年歷史，舊舖喺紅磡站落紅磡條天橋嘅橋底，早幾年時新兩兄弟分道揚鑣各有各做，分咗兩間舖，今次我哋路過黃埔新天地，入去時新食個包先！ 😋 漢堡芝士包 $26 一個單層芝士包24蚊，26蚊可以喺芝士、蛋同火腿入面加一樣，29蚊就可以加兩樣。包入面用咗時新醬，即係佢哋嘅秘製沙律醬。漢堡扒係純牛肉，會爆啲肉汁出嚟嘅，因為每個包每塊扒都係即刻整！配埋酸酸甜甜嘅時新醬非常非常夾，不過小編表示後悔無加蛋，加埋仲正！ ⭐️評分⭐️（5⭐️為滿分）味道 ⭐️⭐️⭐️⭐️⭐️ 環境 ⭐️⭐️⭐️⭐️ 抵食 ⭐️⭐️⭐️⭐️