棟記飯店

营业中

休息中

上環區唔熟路，同幾個朋友做完活動都成10點，附近食肆都收唔多收曬。其中一個朋友建議去熟食市場，睇下有無野食。好好彩 ，行到樓下見到營業時間收凌晨2點。上去到成個場都仲好多人，等左20分鐘終於有位坐，因為只見兩個姐姐做野，最後我地坐左20分鐘，都係完全無人理，最後我地自己動手執枱，再舉手，先有人幫我地落單。（我都明白佢地人手唔夠，所以我地都盡量唔麻煩佢地。）之後大約又等左半個鐘，終於上菜啦。我地叫左6個餸，最後差唔多要1個鐘到先上曬，我地好體諒，不過如果趕時間或者無耐性既朋友就真係要考慮下，最後好彩趕到尾班車返屋企。整體食物其實唔差 可能因為人多，所以上菜先咁慢啦，或者下次揀平日，再試下唔知會唔會速度可以好點😂😂

今日大食系上環有嘢做，心思思掛住瑞記嘅西多士同埋樽仔奶茶，所以特登去到上環街市諗住幾大都食番個西多士先返屋企hea 點知，唔知係唔係因為假期嘅關係，上環街市好多食店都閂晒門，當然瑞記都系其中一間喇<鮮茄肉片飯$39> (好味:2.5/5) (抵食:3/5)肉片份量都算幾大，有成十幾片，味道偏冰鮮味，三十幾蚊一個頹飯唔好要求咁多鮮茄方面，大食好覺得蕃茄太生，可以煮耐少少好咬D，同埋個汁偏甜，可以落少D糖總括而言，四十蚊一個頹飯，可以食到好飽，但質素呢家野唔好要求咁多

打工仔食晏時間有限，一小時午飯時間分秒必爭。由辦公室衝到上環街市，12:35坐底叫快餐，飲品3分鐘到，十分好。但一碟炒烏冬等足30分鐘！過了20分鐘開始追問店員阿姐。一句句答你會跟會追。但答完就去第二張檯落單，完全冇視你追單要求！猶如乞丐懇求有心人真的幫你追單！ 最終等了30分鐘終於上檯，碟嘢暖的，應該放了半小時掛。味道偏咸，油多。如果閣下揀得係度食，祝君好運，沒漏單應該會好得多掛。。。。。十分不愉快經歷！！永久blacklist!

有個朋友話未去過香港嘅街市食飯喎! 好啦, 同你去下啦! 今晚例湯- 西洋菜紅蘿蔔湯星洲炒米.... 一睇就知我朋友唔係香港人...魚頭煲- 呢個煲都好多配料, 有冬菇, 火腩... 鼓油皇大蝦- 好香呀, 唔落手食都唔得蒜蓉炒油麥菜- 呢碟係唯一食得最多嘅, 菜嘛叫左咁多, 埋單都係300幾兩個人叫左咁多野, 梗係食唔晒啦! 魚頭同炒米都攞左番屋企! 第二日都仲係咁好食!

今日中午係中上環做嘢，一到食飯時間……嘩，間間都好鬼多人，排哂隊，見上環街市上面有熟食檔，一於嚟個平靚正午餐。突然想食炒粉麵，行咗個圈見呢間有肉絲炒麵，連飲品都係39蚊……更係即刻坐低，地方大真係搵位容易好多。嚟啦嚟啦……脆脆肉絲炒麵……加熱咖啡我通常都會落辣椒醬，但係更係試咗原味先，味道唔錯，麵好脆，又大碟，加埋肉絲芽菜，濕度剛好。好快咁又可以醫肚完，繼續工作……原來凍飲唔駛加錢，今時今日真係少有，讚

好難食既西炒飯，真係好失望上網睇到話上環街市好多好野食平野食於是來到求其選左一間，呢間棟記，叫左個西炒飯$39蚊碟飯無獲氣，之後完全無西炒飯有既茄汁味，蕃茄係有既，但係好乾，真係好難食唔會有下次，下次再來上環街市唔會再食呢一間野，會食第2間不過連凍飲價錢唔算貴

如要講去街市熟食中心或大牌檔食飯，我會去深水埗「愛文生」，貴咗好多的北角「東寶小館」，仲有上灣街市熟食中心的「棟記」。 對上一次來「棟記」，剛好一年前，叫到成枱餸，人均才 $100 有找。又有三免：免開瓶費、免切餅費、免加一，真係可以想食乜就嗌乜，唔使點睇價錢。 今回叫的與上次有唔同，沒有刻意分辦，只是隨心叫。椒鹽系炸物走唔甩啦，上次的「椒鹽三寶」是椒鹽鮮魷、椒鹽豆腐同椒鹽腰果。。。避免腰果再升呢都叫做「寶」，所以分開叫： 「椒鹽鮮魷」堅酥香脆，水凖 keep 到。「椒鹽豆腐」就太淡喇，在圓枱上轉了十幾個圈，仍然無人再夾，陰公豬。。。 「西檸雞」，調味不錯。呢味係我讀大學時，同班莊友食飯必叫的餸，都係出街先會食，自己好少整： 「西蘭花炒蝦球」，蝦球走完油後仍爽彈，走油功夫靚： 「豉油皇鵝腸」，無上次咁鹹，叫做過過口癮： 熟我的朋友都知我麻麻地吃魚肚羹。「海鮮魚肚羹」，齋睇無食： 第一次叫「咕嚕肉」，是否有些失手？！肉太硬，沒掛汁，似隔夜翻炒，有 D 失色： 反而「欖菜四季豆」鑊氣仲正，欖菜炒得超香，這個推薦！ 上次食過的「鹽焗元朗烏頭魚」$99，賣哂，唯

食晚餐啦～兩人三個菜，還是慣例點了海鮮小炒來這裡吃過很多次了，海鮮OK新鮮，價錢公道，魚湯超大一份，料足再加了一份啫啫雞，不過整個鍋煲溫度不夠，味道不是特別突出⋯有點小小失望

上環揾食雖冇中環咁難，但都有唔少餐廳都需要排隊，上環市政大廈就就o岩晒，唔駛排隊、經濟實惠，又多選擇。行晒成層可能都唔知食邊間好?! 我同朋友結果去呢棟記，之前都幫親過好幾次，佢呢間坐位夠多，而且呢間熱飲同凍飲係同價，因應朋友係凍飲粉絲。我點左味菜排骨炒河配熱奶茶。可能我唔多鍾意食醃菜，我覺得味菜味道怪怪地，我真係唔多喜歡。排骨醃味尚算入味，用豉汁配以青椒炒，夠晒鑊氣，以濕炒河黎睇算唔錯。熱奶茶香滑，大排檔水準。當日朋友o既凍飲太多冰了，結果幫我加"料"，話是日天氣熱，加左幾粒冰比我消暑。總之，唔駛等位，一坐低好快有得食，味道OK，經濟實惠，可以下次再幫親。

時間尚早, 炸炸臨行去上環街市熟食中心霸個靚位一個人食低叫兩樣野食, 當然唔少得就係啤酒喇! 一坐低, 冰凍青島一入口, 爽晒! 再慢慢睇餐牌, 食物種類唔算超級多, 但係好多唔同類型的煮法 (點樣煮魚好/點樣煮菜好)已經寫晒喺menu上面, 一目了然~ 先點一個送酒小菜先 - 尖椒炒豬肚粉腸~加左豆豉炒, 夠晒惹味! 豬肚爽, 粉腸香~ 但其實最精神嘅係尖椒, 微辣惹味, 送酒一流!第二個餸係招牌菜 - 脆皮豬手~原隻上...伙記好好人幫幫我開左去, 方便食用~ 講返個皮先, 其實就唔係太脆, 所以有少少失望...幸好豬手肉質嫩滑, 又夠入味, 扳回一城! 個醬都幾特別, 甜甜地有少少薑味可以去除油膩, 唔錯!只係得一個人叫唔到咁多野食, 下次一大班人再黎試過!

今次又要品嚐一下平民飯堂，它沒有豪裝、更沒有華麗佈景，更更沒有別緻的粉飾……它就是位於上環市政大厦二樓的棟記飯店，朋友一吹鷄，八方雲集，聚埋吹下水，有時出來宴會不一定為了吃，更深層意義是互相支持下，勉勵下，共同抵抗生活上無奈及壓迫感！以下會逐一品評價下:1) 德國豬手: 略咸，肉偏乾，欠缺汁感，皮也厚，要用力斯開2. 霸王鷄: 鷄是冰鲜，鷄味不濃，肉沾了醬油還可以3. 鼓椒抄硯: ok ,但硯不算大，肉自然细，汁ok4.蒸魚: 魚不太鲜，略嫌失手，是魚種問題，不太爽口5.京都骨: 全場最好，入味，啖啖肉，快活過神仙6.西芹炒魚片: 有65分，炒得也香口，魚片可切得薄些努力！！加油！可能當晚跑夜馬，所以水準仍浮動！

棟記都算係我由細到大都會嚟嘅街市食堂。通常都係食佢條烏頭，必吃之選。不過今日天氣凍就試下佢個$348嘅枝竹羊腩煲，一路食都ok gei, 跟碟生菜，烚下烚下。點知一夾舊蘿蔔上嚟。。。佢甘嘅味。我唔信唔信都成舊食咗，以為係呢邊皮厚啫。點知我呀爸一試都話叔叔到。。。同個落單講，佢話可能浸太耐，會同老闆講。甘老豆撈哂d怪味蘿蔔上嚟。。。個煲得返幾舊肉，甘我菜王嚟嫁麻。。。無菜點得。甘諗住叫老闆你壞了蘿蔔可否換番啲菜畀我。佢徒手拎咗舊入口，話無嘢呀，係甘。 好啦。。。甘你慣左，我無法。下次唔嚟囉！！！！！！死死氣叫咗d菜，又俾$48

平安夜當日在上環文娛廣場開工，收工之後就到附近的地方與好友來個即興的晚餐，在開工時跟工作上認識多時的前輩交談知道呢間棟記的鹽焗烏頭好好食，所以抱住一試的精神上來食野~~~鹽焗烏頭唔點汁已經夠好食，唔會感覺到鯹味，個汁感覺太咸，如果個汁冇咁咸會更好食雜菜海鮮煲，望落去感覺好大份，真係正到不得了，味道跟去鴻星冇分別~~~西檸雞食落去感覺幾好，好食過石塘咀熟食檔果間~~~ 近年因為跟好友周圍食，開始喜歡到不同的熟食市場用餐，感受小店的風味，聖誕節只是商品化的節日，唔想食太貴的聖誕大餐，去小店食特色小菜都是個不錯的選擇=]

係...又係打邊爐😅😅可能你會話唔厭架咩？小妹實在太鍾意既關係，真係唔會！😂😂今次去到上環熟食檔食嘢，原本想食小菜，不過見有人打邊邊，迅間被🔥著🙈🙈。大排檔姐姐好好人，好耐心講解有咩正嘢（老實講咁nice既係大排檔真係未見過😂）原本想試下魽魚煲，可惜賣晒，姐姐推解美國🇺🇸肥牛煲，話個個客人食過都話正！📌美國肥牛煲🅗🅚$❷⓿❽果然好介紹，d肥牛係雪花❄️❄️，肥瘦分佈得宜，而且切得好薄，只要放入湯中數秒，再點一點辣椒🌶️豉油，牛肉入口融化，肉味香濃！🉐️🉐️ 另外，呢度真係無偷雞，牛肉黎到成座小山丘咁，而下面係完全無墊過任何菜等，係名副其實肥牛山👍🏻👍🏻性價比超高！📌煲裡就真係清湯，如果想食濃郁湯底既朋友可能唔arm，不過我就覺得清如水既湯底唔會蓋過牛肉本身既鮮味啦！都幾好！湯裡有大量既白蘿蔔、腐竹、豆腐卜等，另外都包一籃唐生菜，咁樣食肉獸都有d菜食下平衡一下。📌啪青瓜 🅗🅚$❸❽姐姐推介既另一樣係啪青瓜，有好濃既醋香味，但一點都唔辣，青瓜清甜，打邊爐食一流，可以去一下躁膩既感覺！📌大樽裝可樂 355ᴹᴸ好耐都無見過大支裝可樂，拾回童年回憶！滿足既一餐，為星期五帶來happy ending啊！

舊同事的聚餐同事介紹話呢間正野，果然冇錯必點：鹽焗烏頭同炸豬手我最愛個炸豬手😋魯得入味又炸得夠酥脆鹽焗烏頭好食過平時打冷鋪食個d另外仲叫左豉椒鵝腸，椒鹽鮮尤........etc.服務值得一提，有個靚女waitress 幫我地落單😇，我地話轉枱又拿拿淋幫我地拎野會再去