楓林小館 (已結業)

細個成日同阿爸阿媽去大圍間楓林小館食飯, 今次專登去荃灣諗住試下,真心覺得食物質素同服務態度都好差,價錢又唔算平,去之前見網上評價都係差,諗住去一次懷緬下,最後都係中伏,反而隔離香江花月好似好食好多

好耐冇同媽咪去飲茶，簡左荃灣呢間多好評既試下🤔，book 左位但都等多10mins 左右先入到去，原來入面係比較細，位置上唔太好🙈 因為通道邊都多人走動Menu 得一張款式比較少，所以簡左d 出名既試下，乳鴿份量有d 少又少肉🥺但味道幾好既，仲有比埋手套同濕紙巾幾貼心值得一試係金磚豆腐粒，外脆內軟，仲好香口～食唔停媽咪想試下補身既藥膳湯，一飲係好濃既味道但唔會太苦，腳雞又稔又入味💜✨整體味道都ok 既，可能我太高期望😂

前陣子試過食晚飯, 餐館環境舒適, 蝦多士是出色的. 今次再一次到訪試其點心, 蝦餃皮是有特色的, 味道亦不錯, 棉花雞的“棉花”亦厚身, 連不多中餐館會整的陳村粉點心, 亦有供應. 但小籠包的肉餡真係好奇怪, 又唔似唔熟但就是淋“啤啤”..., 非常淋, 同埋無味的, 愛吃小籠包的我都實在忍唔住放棄了剩餘的肉餡, 還有, 點心份量偏少, 尤其是腸粉, 特別明顯....唯獨紅棗糕相對是大件的, 但味道亦是淡淡的, 總結, 總算叫做試左新嘢

周日去荃灣廣場午膳，大家都想去吃一盅兩件，間間都不用怎樣排隊，楓林小館外面裝修幾別緻，入去試下啲點心。入內就嗅到有藥膳的味道，原來是「藥膳雞腳」，有當歸、川芎白芷、杞子等，湯汁夠味但唔會太濃，腳雞又稔又入味。「原隻大蝦燒賣」爽脆的大蝦，鮮味的燒賣，即叫即包。「咖喱蒸土魷」土魷入味但墊底的蘿蔔稔身但冇乜味。「合桃叉燒酥」外皮鬆化但唔夠熱。「豉油王銀芽炒麵」幼幼的麵條炒得非常爽身唔油膩，再配上韮王銀芽的香味，簡單材料也可做出美食。

是日晚餐！提早做節食中秋節飯，試左楓林小館，點左餐牌中推介的小食小菜，整體碟頭都比較細，燒乳鴿好細隻，好彩夠熱又夠味，生炒骨D排骨好細粒而且味道一般，荔茸香酥鴨層芋頭茸太薄而且鴨肉比較乾，麻麻…… 炒麵及粥反而幾好食，食完成餐飯之後勁口渴，呢間試過就算，無乜想回頭既意慾……

讚1 服務好好 坐得舒服 又唔會限時限刻2 如果真係讚 咁起碼個齋都足料既 生炒骨既汁都調得合格彈1 作為乳鴿名店 皮不脆肉過油係實在要改善 蒸扇貝亦極老 生炒骨既肉好乾 整體上 菜式係唔合格

因為一張食滿$500 減$100 之 coupon 而去試吓平日下午茶，招牌炸乳鴿吾夠熱，伴碟蝦片油冧冧，鮮蝦腐皮卷亦一樣，最離譜係蒜香雞翼應該飛水吾夠，一陣血水古怪味，排骨陳村粉肥膏多過肉，質素不值此價錢，同午市水準為何差咁遠 😫

是日父親節翌日補祝父親節😋早在OpenRice訂座，亦有收到whatsapp確定會出席，但遲到8點才到🤧門口職員一見到我就知係李小姐因為有兩名幼兒，亦準備好bb櫈很窩心啊🥰專人服務叫左4人餐再加龍蝦伊面加兩個炸物食物質素方面，味道OK炸野既油溫要高返少少個蝦片可以一咬就爆油😑蝦片屋企經常炸，未食過炸得咁衰其他食物味道不錯澳洲龍蝦同魚都新鮮，唔腥唔梅由其是乳鴿啊，味道確係唔錯最緊要隻乳鴿唔腥，有啲一食就😅😅😅一食到近骨位就食唔落🤢唔可以損骨套餐個湯。。。自己煲既仲好飲😗

雖然經常光顧荃灣廣場的食店，因為有太多選擇，所以忽略了在L6的楓林小館。今天2022/06/11終於可以一試，未到1200前到達，只有大概一半客人，所以辦妥安心出行便立刻入座，座位之間不會擠迫！招呼的男侍應，知道了什麼茶後，便好快拿了兩個茶壺，一個有香片字樣，一個沒有字牌的。（所以我以為是滾水，雖然檯面已經有一個暖水壺；後來，從沒有字牌的壺，為香片茶壺添水，才發覺是普洱茶，第一個敗筆！）奉上兩個茶壺後，轉頭再上小碟前菜。（卻沒有再理會，我們是否需要傾倒洗杯碟的水，第二個敗筆？）首先從點心單點了四味：紅燒乳鴿（因為是楓林的名物）、黑金蝦餃皇，雞包仔和布拉腸粉。乳鴿ok啦，但唔夠BB鴿咁嫩滑；蝦餃和雞包仔都唔錯，但不知為何那腸粉唔夠熱，差咗少少！同一個男侍應都算醒目，看着我們食完乳鴿，立刻為我們換碟！原本打算再叫折肉泥鯭粥和雞粥（碗上），食完四樣，太座都發覺半飽，所以點了擂沙湯丸，又奇怪菜單明明寫是三隻，上檯竟然是四粒，夠熱又不太甜！埋單時，還有$100現金券，不過下次要先光顧五佰才可使用。

今晚約左好友係荃灣廣埸睇電影，上網揀食店，見到網上評論食物質素不錯，但都見到評論中待應態度差，考慮可能係個人主觀意見，即管試一試，18：30點左四道菜，頭两道未到10分鐘好快就上菜；怎知過了20分另外兩道菜，梅菜扣肉煲及豉汁百花釀豆腐，還未上菜向男待應了解，他說這兩道菜是會較耐的，叫我們等多一陣，如事者又過了15分鐘，前兩道菜已食完，再問1位女待應她都敷衍地說，呢啲餸菜係耐架，但已過了35分鐘，實在不可接受，她話幫忙追追，但仍見她企在原位，未有走進廚房，對於待應馬虎了事，食物再有質素都無用，客人食到一肚氣，影響享用食物心情，不會再有下一次。最後，記起坐底時待應把一碟小吃到枱上，因我們不需要故叫她取回，她說呢啲係佢哋小賬，但不愛吃還要接受，終結換來一個字『等』……

今日母親節，5點半去吃，爆到七彩，第一次點了四個，後來追加兩碗雞粥，結果等了又等，服務員回復我幫你追單啦，廚房正在處理中，然後再等，等了又等，我叫服務員Print Out 張單出來，單係又落，但粥還是沒有上枱，最後服務員前來話雞粥已賣完

回復四人一檯終於可以去飲茶嚟到楓林冇可能唔叫乳鴿啦乳鴿係好味嘅 夠肥美 但蝦片唔夠脆黑麻麻嘅蝦餃令人睇唔真係味皮薄餡靚食落個皮又幾薄 味道都唔錯香芋流沙包一啲都唔流心人地話泥鯭粥好出名 我覺得淡左啲而且唔夠果皮味XO醬炒腸粉勝在熱辣辣 味道一般釀尖椒比想像中厚 冇乜特別腐皮卷個餡好多紅蘿蔔蔥之類生竹牛肉普通棉花雞相對其他點心比較出色魚肚唔會一pat pat 又夠入味蛋煎糯米雞勁大舊 都幾膩咖喱魷魚其貌不揚 但係味道幾好

無意中看到網上預訂的午市優惠券，楓林小館4人套餐有兩隻乳鴿 一共有4款點心可選，加一款主食，我地選了泥蜢粥, 泥蜢拆肉加上果皮。 正好合適現時限聚晚餐禁堂食，中午時間剛剛好。

放假去荃灣飲茶，今次選擇了楓林小館，這間小館歷史悠久， 最出名的是紅燒乳鴿。所以今次十分期待，除了招牌紅燒乳鴿，其他點心水準也不俗。 講到環境， 門口圓拱形的外觀設計， 加上天花板懸掛了三個金色的雀籠和金色的鳳凰屏風， 感覺典雅和富有中國色彩。招牌紅燒乳鴿 ～ 炸得皮脆內軟， 味道香， 肉汁夠， 加埋椒鹽吊味， 肉味更出。招牌雞粥 ～ 雞塊嫩滑，雞油慢慢滲入雞粥，每一啖都有雞香味。椒鹽豆腐 ～ 外脆內軟， 粉漿不厚，豆腐水漾。合桃叉燒酥 ～ 超鬆化的外皮， 香脆的合桃，加上嫩滑的蜜汁叉燒，正！

同屋企人食飯通常鍾意去中菜館～荃灣廣場呢間楓林小館，座位好闊落中式裝修、店內明亮光潔、餐具潔整～職員服務都好好～我哋都好鍾意飲茶，呢度嘅茗茶味道好甘～久沖不淡～招牌燒乳鴿細個去茶樓就已經好鍾意嗌燒乳鴿，見佢招牌梗係叫黎試吓～皮烤脆，肉入味又不乾涸～唔錯～籠仔蒜香蟹飯一整隻蟹，蟹肉蟹膏都好多～蒸到籠仔蛋白飯香噴噴～豉蒜炆頭腩頭腩好入味，魚肉幾滑～配菜苦瓜都好入味無晒苦味～ 菜式較咸，頗岩送飯～甜品 芋香燕蓉椰汁糕好好味，味道清得黎帶甜，又有芋香～