洋洋小龍蝦餐廳

营业中

休息中

大年初一落街食飯，間間餐廳關門， 平時食開果幾間食肆都初四先啟市， 就試下新餐廳 ，見到洋洋小龍蝦名都幾得意， 又見到有幾多人食緊，就入去試下。叫咗個芙蓉蛋飯，加杯熱檸茶個芙蓉蛋飯，望落都唔錯。其實都個芙蓉蛋飯幾得意，入面唔係洋蔥絲而係加係椰菜絲一齊煎，幾爽口。再飲下杯熱檸茶，茶味都幾香，檸檬又唔會落完熱水變苦，都幾有水準。呢間嘅老闆店員招呼都幾好，應該都係做開街坊生意嘅，大家都會開開心心過傾計，感覺都幾有人情味。

為左保持身心健康，同食更多美食，放工到新蒲崗做運動😆出左一身汗，到附近搵食。洋洋小龍蝦，無小龍蝦賣，轉賣川式碟頭飯，但絕唔係Hea 底，價錢相宜。筆者叫左麻辣班片炒薯粉（小辣）。班片滑有甜味，但無辣味。薯粉吸收左麻辣味，加上薯粉滑溜溜，加上椰菜既清爽，好快就食晒男友叫左麻辣雞扒薯粉（bb 辣），雞扒其實係由雞肶製成，但比較薄身，味道可以。薯粉同樣地好食，唔太食得辣既男友都嘗到麻辣既滋味😋😋走既時候老闆親切道別，食物特別味道都唔錯，幫襯小店都不錯！👍🏻👍🏻

晩上的新蒲崗特別寧靜，見到一間叫洋洋小龍蝦的食店，佢已經冇再賣龍蝦仔，只系賣包凍飲三十蚊有找的碟頭飯，我卻固執地點左要貴d（$41），但坊間較少有的麻辣雞扒炒薯粉，因為通常較見的系湯或撈薯粉，呢度的即叫即炒，都要等十分鐘左右，而且可以自選辣度，雞比扒煎得香口，放在炒薯粉上面，整體水準唔錯的 ！

洋洋小龍蝦都開左幾年，一開張時，主打小龍蝦，個時都食過，係十分惹味，但後來唔知點解冇乜再做龍蝦，做各種碟頭同湯麵，價錢好平，三十蚊有找。已經好耐冇食，行過一時間諗唔到食咩好，就去食下。叫左個麻辣牛肉薯粉，佢人手真係好少，等左好耐先有得食，食既時候，真係好麻辣，但除左辣都冇乜味，湯好淡，牛肉份量不多，但薯粉滑溜，幾好味。總結黎講，麻辣牛肉薯粉就一般，可能炒薯粉會好食啲。甘可能下心血來潮先試下啦。

以前中學雖然係附近，但一直未食過尼間野。聽講炒薯粉相當唔錯，所以過黎試下。叫左個炒薯粉配魚，一來唔想食雞咁飽，二來配魚可以更試到真味，薯粉炒得好入味，望落無色，食落非常麻辣，一下食曬。

聽人介紹呢間小店好好食，特登入到新蒲崗試一試，係外面睇，尼間小店真係裝修比較差，多數都係一啲男人自己係入面食，但一場黎到冇理由走。試左人哋推介嘅炒薯粉，叫咗中辣，一上到台，就知大家無介紹錯，望落去一啲都唔辣，但入口就有一股辣味，仲要非常香，雞扒煎得好香脆，而且份量大，男仔食都食得飽。

其實喱間野開左好多年，一直睇佢門面好似好殘舊咁，所以就無幫襯過。今日午飯時間，個心痕痕地，終於黎試一試。佢主打嘅都係好似茶餐廳咁嘅碟頭飯，雞扒飯、番茄肉片、豆腐班腩嗰啲。價錢好平，廿幾三十蚊就包埋野飲。而我就叫左個生炒牛肉飯。飯係即叫即炒嘅，所以都要等十分鐘左右。飯底炒得好香，粒粒分明，口感好好。另外，精髓在於佢叫牛肉，好嫩好夠味，佢唔係用鬆肉粉乸到無哂口感嘅嗰種嫩，而且調味非常出色，值得一讚👍🏻我身邊嘅人，好多都係叫佢嘅招牌雞扒飯，我諗應該都係一樣咁出色，下次黎到，一定會試

麻辣雞扒炒薯粉司令中學時期就係附近讀書，都算係食曬成個新蒲崗啦，但唔知點解，咁多年都冇諗過食尼間食店喎，可能因為司令麻麻地小龍蝦啦...點知過左咁多年，竟然有大學同學推薦尼間食店，仲要話好好食喎！司令梗係即刻去試啦😋，一入到去，點解間野咁殘舊既，點解入面冇小龍蝦食，唔通去錯左😦？原來唔係去錯，好似係好耐冇賣小龍蝦啦。咪講咁多，直接叫返個麻辣雞扒炒薯粉中辣，一上枱，點解咁淺色架，有冇味架😦？一食，真係嚇親司令喎，不但好濃味，而且好野味，薯粉係扁身個種，唔會要咬好耐先吞到，雞扒係雞脾肉，好大舊，成碟野份量超大！超抵食又好食！

試過好多次，才寫下食評。 地方只是室內大排檔，沒有裝修，幾張摺檯及椅，加一台電視 。令我一試再試的原因只有以下3個賣點 第一賣點：價錢平第二賣點：即炒第三賣點 ：大碟頭試了兩次的廈門炒米，keep住水準，熱辣辣咁上檯-有圖為証 。即叫即炒，濕炒的，還有少少獻汁，不會乾口，大碟頭，份量多，蛋和火腿也不少。加埋杯凍飲只是$30 。

依家乜都貴,夜晚能夠最平26蚊食個飯連飲品,仲要係即做,係邊度搵?今次幫襯麻辣雞扒炒薯粉($39),雞扒係用原隻雞脾起骨,所以每塊雞扒都有一塊細骨連住,即煎夠香脆,配上即炒港式麻辣味炒薯粉,勝在熱辣辣

在這裡，雞扒是不二的主角，其他主食如炒薯粉，米粉，公仔麵更像是可供自由選擇的配料。雞扒烤的香脆可口，讓人直呼過癮。薯粉剛下鍋的時候很熱氣，有點燙口。吃完才覺油膩。

星期日放假，訓醒都三四點，唔想食太飽，因為好快食晚飯，想起依間架雞扒，來一碗雞扒米粉，我逢到必食，因為雞扒好入味，即煎的，煎得香香膿膿的，我本身唔食雞皮，也被它吸引著，食埋，湯底清清，完全唔覺油！可惜涷濘茶永遠係酸的

呢間餐廳其實都唔係好起眼, 而且入到去有小小唔乾淨嘅感覺, 但炒出嚟嘅嘢出奇地好食, 而食得辣嘅人應該會好鍾意!雞扒炒公仔麵(少辣) - 雞扒煎得外香内嫩, 而炒公仔麵加左佢自家制辣醬真係非常惹味!

一向都非常鍾情與麻辣的菜式和碟頭菜式.今日路經新蒲崗見到間叫洋洋小龍蝦既鋪頭,記得好似曾經在報紙上看到這間食肆店如其名專賣小龍蝦的,抱著好奇的心態進去，一入店內看到滿滿都是在食飯的人,我好奇的向老闆問了問是不是有小龍蝦賣，老闆說已經沒賣好多年了，現在跟普通的茶餐廳一樣，我一臉的失望打算離開，老闆突然問是不是想食辣嘢，我說是啊難道有什麼好介紹，老關叫我抬頭看一看這是他們店裏最近的新菜式都是麻辣的有薯粉，公仔面，米粉，一看到麻辣我就試試而且價錢都ok，30幾蚊附送埋凍熱飲品  我坐了下來叫了一份麻辣雞扒炒薯粉，因為看到雞扒的樣子挺吸引的，坐了一會很快就把我的晚餐端到我的桌上，樣子的確吸引而且味道挺香的好了是時候開動了，食下去真的沒有令我失望，薯粉的韌度剛好而且辣的很香對於我這種十分喜好食辣嘢既人真系覺得好特別，不知老闆用什麼的方法炒這碟薯粉，辣的味道很特別也辣得很爽，另外雞扒原來也是這間鋪的招牌菜果然也和外面的雞扒有很大的差別皮脆肉滑和這碟薯粉的搭配實在是十個珍。對於發現到新大陸的我當然不會就此罷休啦，我看到麻辣斑片炒公仔面的相片好像也不錯，就又叫了一份，今次我同老闆話要大辣，老闆很輕佻的

色香味真棒～即炒並不簡單～多快好省啲一餐～全天候廿幾蚊菜單～最愛啖啖肉茄子斑腩～邊度搵咁啲價錢吃晚飯～　p.s. 以前貴價兼無肉食的小龍蝦 (BB龍蝦 inhuman 唷) 已經唔多覺眼