漁樂 (富泰商場)

营业中

休息中

之前食過一兩次啲海南雞飯都不過不失，今日見佢有晚飯套餐，餐心住一試點知中伏。叫咗一個魚香茄子餐同一個檸檬蒸烏頭餐。唔想講佢啲飯一貫地又硬又乾，魚香茄子同普通茶餐廳分別都唔太大，都係可圈可點。最中伏係個檸檬烏頭，我係一個唔怕食腥味嘅人，但今日條魚一出到嚟已經衝哂啲腥味出嚟，都算啦，叫咗唔同唔食咩。最慘係同行屋企人，食唔到腥味，諗住叫佢畀少少甜酸汁可以掂下沖下啲腥味啦，點知問完一個職員話好啊，佢轉頭叫咗個經驗級咁嘅人嚟又要我講多次要甜酸汁衝下腥味。佢一句埋嚟就話甜酸汁唔跟喎，所以要加錢，話一係畀豉油我。要一碟仔甜酸汁要加錢！！仲要態度唔好，好似食唔到腥味係我問題！條魚已經咸仲話想畀豉油？之後唔想再同佢講嘢，自己加啲辣算數，最後條魚食淨一半。態度差、味道一般，仲要咩都要收錢，今次真係冇下次

旁人見我同一間餐廳寫幾次post ,可能會覺得好奇怪。但如果你住兆康、富泰應該就會身同感受。因為呢到係無野食ga，連外賣都無邊間會送，food panda 選擇唔多，有時仲要忽然取消張單，又要收$20運費。所以點解每星期最少食一次漁樂我通常買外賣一係大快活既焗豬扒飯，一係去漁樂。講份量，大快活係大少少的。今次係漁樂買左流心蛋豬扒飯和魚片河粉。豬扒飯既豬扒唔肥，而且好軟熟，不過就唔夠多汁。魚片河係湯和河粉分開上，咁就唔怕河粉發脹，非常貼心。魚片都爽口彈牙，湯頭好夠味，但太味精，食完會好口渴。我地經常幫襯漁樂，可惜網上外賣平台 唔送，而且唔可以打電話叫外賣然後自取，如果有呢兩個服務就好la。

富泰無咩選擇，暫時呢幾個月新開既漁樂係性價比最高，客人絡繹不絕。最抵食係下午茶，$29-41 連餐飲。我地兩個人叫左三個下午茶餐。分別係紅咖哩手抓餅、雞肉串燒配薯條、香辣肉碎炒金邊粉。紅咖哩手抓餅：好多咖哩汁，但入面只有幾粒茄子🍆，無任何餡料，同埋對我地黎講比較辣（我地唔食得辣）。手抓餅幾香口。雞肉串燒配炸薯條🍟：新鮮即製，香脆熱辣辣。香辣肉碎炒金邊粉：質素ok，但我本身唔鍾意食肉碎，與餐廳無關。

早前富泰商場大裝修進注咗一D新餐廳有翠X、漁樂等鋪頭，富泰之前想食嘢真係無咩選擇，依家叫多一個快餐廳揀，早前都有同朋友食過佢哋下午茶湯河覺得環境同食物都唔錯！今晚去試下佢嘅晚餐，朋友揀咗紅咖哩而我就揀咗通菜炒牛肉套餐，包埋碗肉骨茶同一碗飯，再加$18可以有甜酸無骨鳳爪或炸春卷串燒。個紅咖哩有蝦同好多蜆肉，甜甜地唔太辣，反而個無骨鳳爪仲辣呀！唔食得辣嘅朋友要叫定杯凍飲先好叫呢個小食！通菜炒牛肉係少D牛肉，但味道不錯，兩個人晚餐餸菜放滿一枱$180有找，好滿足！

富泰新開咗漁樂，裝修幾特別最緊要食物OK。係富泰入邊，呢一間算係最高質素。點左香茅豬扒煎焗流心蛋和泰式金邊粉。金邊粉其實都有鑊氣同埋好食，只不過我滿心期待，而結果無我期望咁好，材料亦唔係好夠。反而香茅豬扒就比較好食，我先生已經第二次食，佢每一次都係食呢個。但我就想試新野，所以下次嚟我都會試食其他唔同嘅嘢。

嗌咗一個「招牌」海南雞飯同炒金邊粉，一杯熱咖啡同青檸梳打。海南雞飯食太硬，冇椰香，只是普通的黃飯而已，啲雞都係硬，雖然係去骨海南雞，但啲雞肉本身都硬，上枱時仲係雪櫃攞出嚟嗰隻凍。金邊粉先係最出事嘅一樣嘢，粉又太濕，食落口仲有陣怪味，反正不似一般嘅金邊粉。金邊粉入面有圓形的肉乾，雖不知道是不是正宗，但吃下去有點九唔搭八，像錯配一樣。而且金邊粉用嘅醬汁食落好似茄汁咁樣真係十分奇怪。。飲品都仲算正常，但真的不會再幫襯了，食物不好，價錢也不便宜。

屋企附近開多咗間新餐廳，有多一個選擇。中午經過都幾多人，裝修幾特別，所以我和先生食咗兩個午市套餐，一個係海南雞飯，另一個係流心蛋野菌汁香茅豬扒飯。海南雞飯擺盤都幾靚，以屋村餐廳來講算精緻。雞起晒骨，食的時候好方便。不過雞比較肥，同埋肉雖然嫩，但有少少韌。我先生鍾意食呢個流心蛋野菌汁香茅豬扒飯，初初擔心野菌汁會好辣，但最後發現係唔辣嘅，而且野菌汁加埋流心蛋嘅蛋汁食都幾好味。豬扒亦好入味，唯一美中不足係啲雜菜比較凍，明顯係一早整定。

屋企樓下開了間漁樂，好多人等位，今日就去食個早餐，星期六早上冇人等位，入到去仕應叫我們坐二人枱，我們想坐卡位，但仕應說繁忙時間要坐二人枱，可惜當時冇人等位同好多吉枱。所以我們照坐卡位。其實可以彈性處理！！！叫了兩個早餐，餐飲是奶茶，華田，可是用膠杯上，奶茶味道是好滑，香，華田也夠濃，如果用瓦杯會更加好。餐蛋治烘底，燶左dd，夠熱，餐肉不是厚身，味道好好，麵包夠脆。入面有d牛油，蛋夠滑身。火腿通粉小的，什菌炒蛋，厚多士，多士香同脆，有d牛油唔算多，好味！蛋入面好多什菌，好香好食。火月退通粉，濃湯底，火腿夠多，通粉細細粒唔會煮到過淋。好食！！早餐選擇很多呀！！

貪新鮮第一次去漁樂食，初頭都知屋村既泰國菜唔可以抱好大期望嗌左：馬拉盞炒通菜，泰式香茅椰汁雞湯，泰式青胡椒雞煲，牛肉湯河首先黎左湯先，真係好淡味，顏色睇上去真係好吸引，聞上去冇味，一飲就好失望，同飲水真係冇咩分別好，試下馬拉盞通菜，呢個又掉番轉太咸，遮哂佢本身馬拉盞醬個種味道其實將佢地既味道balance番少少應該兩個都會出色好多之後上埋胡椒雞煲，我知出面食唔可以用健康呢兩個字，但當每一啖食落去都係油既時候，我覺得過份左當然呢個小菜都係好咸，我覺得食完真係好怕鈉係嚴重超標牛肉湯河我覺得係應該會好少少啦，湯係有牛味，唔差，但牛肉太梅，打邊爐既牛肉都好過佢其實樓上既大集團快餐店既小菜都做得好過佢既時候，我相信呢間餐廳唔及早改善，好快冇人去食野當然都要睇埋服務啦，當晚去既時候其實都坐滿哂人，但眼見侍應數目都足夠應付到因為個場其實唔算大，一個侍應大概睇6張台左右，但係佢地都可以漏呢樣漏個樣，仲要用喝番你轉頭既態度去招呼你，我唔介意自己照顧自己出去拎我需要既野但係可唔可以有番少少禮貌呢？ 以咁既質素出咁既價錢，我情願揀樓上個幾間餐廳會好d，起碼好味d，我唔使受氣，價錢合理d當日平均每人要140一

上星期開張，日日都人頭湧湧呀（梗係啦，富泰有幾多野食大家心知肚明）lunch 1點黎，等4張枱左右，去隔離阿信屋轉一圈出黎已經有位。淨係影左午餐餐牌，另一本太多頁懶得影，午餐選擇已經夠晒多！嗌左一個冬蔭公魚片頭金邊粉（$48）、馬來沙嗲焗雞扒飯（$49）、加配黑醬牛油雞翼（$13），套餐包熱飲。上菜真係勁快！！友人話金邊粉唔錯，但我唔記得左影。我自己個焗飯估唔到都唔洗等太耐，嘩，d芝士焗左勁香勁脆仲有拉絲！雞扒都夠滑，又唔係白飯底，沙嗲雞翼都好脆！超邪惡！仲要唔洗加一，實會繼續幫襯