潮味工房

营业中

休息中

12月12日本來諗住去試彩雲商場間孖記厨房，但去到此店門前，望咗一眼肥華及靚媽就没有光顧此店意慾，但個肚又餓，结果就去咗呢間潮味工房醫肚，點咗兩個是日午餐，分別係羗䓤篜滑鷄及蒸鯇魚餐，兩個餐此店都做得非常之好，鷄和魚都蒸得非常嫩滑，加上用蒸魚用嘅豉油，用來撈飯可說美味非常，這兩個家常小菜竟可令無飯㽼嘅肥華食到成碗白飯，再飲埋嗰碗份量不少嘅跟餐例湯，肥華和靚媽都有大滿足感覺，而埋單結賬後，更証實今次唔去孖記，而改到此店食午飯係明智之選👍🤩

平時我同朋友食飯都係出旺角尖沙咀銅鑼灣，好少去啲冇地鐵度嘅地方食嘢。但唯有呢位朋友，佢住喺彩雲邨亦都好少出去市區，冇法啦唯有由彩虹地鐵站行上半山上面。佢話樓下有一間好耐嘅茶餐廳，小本經營一定要支持下，所以我就帶着半中伏嘅心情去試吓啦（其實行上黎已經中晒咁滯）款式都多嘅，有啲似百分百茶餐廳，於是我哋都嗌左雞髀拼炒蛋飯，中伏呢家野就係：避唔到，一齊捱睇幅相應該唔使我講大家都知道結果係點但係我想講有個意外嘅驚喜，佢隻雞髀真係好大份，又厚肉，如果唔食蛋嘅話，淨係雞髀配薯條應該係一個唔錯嘅選擇。強烈建議大家下次食嘅時候記得嗌常餐啊

已經有一段時間沒有到潮味工房， 這間茶餐廳是做街坊生意， 食物質素一向保持水準， 款式又多， 粥粉麵飯樣樣齊， 價錢當然經濟喇。 今次午餐有， 四寶河， 炸魚皮， 沙爹牛肉公仔麵， 牛角包配火腿奄列， 椒鹽豬扒煎蛋飯， 還有茶走， 全部都做得唔錯。 四寶河份量多， 炸魚皮夠鬆脆， 沙爹牛肉公仔麵的牛肉質感嫩口， 椒鹽豬扒煎蛋飯很惹味。其實好多時入茶餐廳食飯都是趕時間， 好多質素都沒有特別， 可以講食得飽就算。但潮味工房每一次都有水準， 值得一讚。👍🏻

因朋友推介，所以同左一個朋友黎彩虹哩間餐廳食佢地嘅招牌菜啦。 咁我地叫左佢個蔥油雞飯同埋雞扒雙蛋飯嘅。 本來都對佢地個招牌菜蔥油雞都幾大期望， 點知一食， 嘩，啲飯硬過石頭，要用水送飯，唔係食唔落口啲雞又普普通通，啲人講到咁好食，完全係強差人意 我以為我個飯係個人問題啦， 點知我朋友都話乾到一個點。幸好個扒係即炸，都算大塊入味嘅。我食到一半已經飲水飲飽左都係快快手走就算囉，完全想blacklist哩間餐廳。食完只係得一個字: 硬!

位於「彩雲商場」三期的港式茶餐廳「潮味工房」，雖然「潮味工房」店舖位置看似頗為方便，很快就可以徒步返回，位於「彩虹港鐵站」隧道出口的西貢小巴站，但是「潮味工房」內置電視機，成為我用餐的最大阻礙。我曾經考慮過在進入「潮味工房」店舖之後，進入樓面暗角位置，坐可以避開電視機的卡位檯櫈，怎料「潮味工房」侍應告訴我，暗角位置的檯櫈因為配合防疫要求而暫時封鎖，剩下座位已經滿座，我只能坐在電視旁邊的卡位。所以我被迫坐在「潮味工房」樓面另一角落，大型電視機底下的卡位餐檯裡面。「潮味工房」電視機當時還在播映新聞報導，而且電視聲音一點也不少，我要等到新聞報導完結之後才能安心食飯。「潮味工房」除了餐廳樓面有一大部會播放新聞報導的電視機之外，「潮味工房」設計出來的晚餐餐牌，對於我這種需要同時享用牛肉加雞肉食品的食客來說，其實沒有獲得任何的方便。因為「潮味工房」晚餐餐牌裡面沒有提供食客，任何可以同時食到牛扒加雞扒，或者牛肉加雞肉的飯類食品，需要分開再點多一款食品，才能同時食到牛肉跟雞肉。恰巧「潮味工房」裡面又有製作潮州粉麵食品的廚房，所以我勉為其難地選擇了，一碗用湯盛載的潮州「牛腩河」，作為我全晚晚餐裡面有關「

去到彩雲村，又去多一次潮味工房。點左兩個餐，一個炸雞髀煎蛋飯，另一個係蔥油雞飯。下午茶時間去食，炸雞髀飯一上枱見到佢脆卜卜出晒煙，一睇就知道馬上炸出來。我就食蔥油雞飯，蔥既香味同雞既香味一齊湧入我個鼻，😂😂😂立刻食指大動🤭。雞有底味又夠滑。不錯不錯，不過個湯就清左少少無乜肉味。

去到彩雲村做野，同事話呢間潮味工房新開試過一次都唔差，本身睇到有梅菜扣肉好想試下，不過上個星期先食過扣肉。睇到頭抽豬軟骨配煎蛋好正咁喎，豬軟骨炆到入晒味、又淋又有咬口。正！佢有配上一個湯不過上面印上了銀龍個公司名😂😂😂

揸車到彩虹街市買打邊爐用品， 之前都有在潮味工房買外賣， 記得上次的咖哩牛腩飯味道唔錯，所以今次再來到這裏吃午餐。 點了一個常餐沙爹牛肉公仔麵配方包和煎蛋$38， 炸醬麵$35， 飲品一杯熱奶茶和一杯凍奶茶$10。炸醬麵～ 有兩個份量可以揀，我點了大碗的， 炸醬麵最重要是醬料酸酸甜甜， 惹味又開胃， 麵的質地煙韌， 但個湯飲落似味精湯， 不過整體上都唔錯。沙爹牛肉公仔麵配方包和煎蛋～ 沙嗲味香濃， 牛肉質地夠淋份量多， 方包和煎蛋沒有特別。飲品都是普通的，但這裏的價格相當便宜， 客路以街坊生意為主， 經過都可以入來試下。

因朋友在我家附近工作，便到我家樓下來個quick lunch，本來朋友推介沙薑雞，但因為今天的午餐沒有，便退而求其次叫了頭抽雞扒雙蛋飯雞扒即炸，又香又大塊，D肉係外脆內軟，而且隻蛋切開後係流心既，不過朋友話D飯硬到喊，佢淨係食哂D雞扒算啦午餐配中湯/飲品，是日中湯係霸王花，夠哂大碗，但我覺得唔係好夠味...而我叫o左個牛雜撈粗，牛雜正常，牛肚都算淋但唔入味，但成個粗麵係咸到一個點...因為肚餓，所以硬住頭皮食...值得一讚既係另外叫果碟生菜好新鮮失望係因為佢好似都係出名牛雜，但牛雜平平無奇,...實在教人失望

呢間潮味工房，以為係剩係食魚蛋粉，原來都仲有常餐，扒飯，咖哩等等。今日清清地叫左個菜肉雲吞魚蛋河+腩汁（$37)湯底唔錯，夠味得黎又唔會太味精，河粉幼身得黎好薄好滑身。菜肉雲吞皮薄，饀料夠多，仲有四粒。魚蛋都好彈口，有魚味，呢度d 粉面好食過街市，以後又多個新選擇。

平日通常唔會去彩雲食嘢，雖然係附近因為無乜特別好食嘅餐廳最近知道嗰邊開咗一間新嘅餐廳呢一日經過又見肚餓，就入去試一試叫咗一個下午茶雪山西多士，加兩蚊有凍飲、仲有紅豆冰揀！我自己好鍾意飲紅豆冰所以就嗌咗紅豆冰幾濃味，唔似某啲茶記會溝好多水喺入面仲要幾多紅豆西多士賣相唔錯，糖漿係獨立包裝乾淨啲唔會搞到周圍都係最重要最重要係呢個西多士係有花生醬餡雖然唔係好濃郁，但味道都足夠滿足到我呢個「花生友」唯獨覺得咁樣分開四份會有啲膩總括嚟講都唔錯，有機會可以試試其他

星期日早晨想有個滿足早餐，相信這是好低層次的要求。前幾日發現新店，當日並未即時試味，心想試水溫當然小本投資由早餐開始。等到今天，看到店內都有客人，應該唔差啩，餐牌上選項算多，但有一部份是潮式粉麵。點了兩個餐，本來想改丁麵，但要加收$6，太過份吧！最後冇加。先來一個菠蘿油，就是這個菠蘿油把我大早的心情破壞了，從未見過咁様衰嘅菠蘿包，應有的脆脆面沒有了，變成頭納一般的一層外皮！一見立即面色一沈，心知中伏了。明顯是放入微波爐加熱後果，入口又濕又油，沒有誠意，之後的牛角麵包是小號的，隻蛋重大過隻牛，唯一可取的是通粉湯底，份量上，其實大碗與細碗份量是相約的。食後感：是日心情遭蹋了！