皇甘栗鮮炒乾果專門店

营业中

休息中

超級多人排隊，等咗差唔多20分鐘先有得食，叫咗杯裝，雪糕球size係正常！🍦脆開心果 雪糕/ 追加時令雪糕一球 $68like 社交平台可以減$3！有啲貴Gelato 價錢，栗子幾清新有栗子嘅香味，仲有啲栗子粒粒幾有咬口，雪糕嘅質地係似冰咁嗰種唔算太滑！開心果味雪糕係淡淡嘅開心果味，主要開心果味來由開心果粒🤣如果冇咗開心果粒又真係會好淡！推薦指數: 8/10味道唔錯，值得一試嘅，不過價錢比較貴！

同男朋友專登入大埔搵黎食，見社交平台多人討論，心思思。叫左兩個口味，一個脆脆開心果，一個脆脆榛子。哇，好味！😋我地兩個一致認同開心果好正好正好正🙌榛子味好似啖啖繽紛樂，都好味好香濃。兩個口味都冇油溢味，好香，好濃，一啖接一啖，停唔到口。口感好creamy，同時久唔久又食到脆脆，食到底都仲有雪糕，最底仲有朱古力，正👍🏼好滿足！我地兩個企係店舖入面食，因為唔算太多人。但見住keep住有人入黎買雪糕食。見到唔少人買pack好左既杯裝番屋企同家人分享。不過見價錢都唔平嫁。我會再專登去買黎食👍🏼

娘親問我為什麼近來沒有寫食評，好的…我就寫雪糕。😂受到面書群組荼毒，近月我對開心果雪糕產生濃厚興趣，10月頭在西九龍中心吃過一杯華而不實的，之後死心不息想再找一個更好味的。😛然而今天終於找到了，開心果雪糕加上滿滿的開心果碎果實，還有朱古力窩夫雪糕筒的襯托，開心果味道和口感雙重夾擊，這雪糕可以用精彩來形容。😋雖然吃得出用料不及上次西九龍中心的那個高級，但這雪糕反而令我的嘴饞感得到雙重的滿足，今次這個雪糕完勝！✌🏻

難得過去大埔就緊係去試下，之前都好多人介紹。食佐話梅味雪糕🍦有驚喜！真係有話梅肉係入面，但都唔會好酸！好好食走嗰陣仲買佐啲零食😂✌🏻琥珀合桃，蒜香豬肉乾，黑芝麻酥呢3樣係我最推薦。

專登去大埔食雪糕，有驚喜！開心果味係超級多開心果粒話梅味居然係有大大舊話梅肉！酸酸甜甜真係好好味！培茶我就覺得偏苦 最後又食多個話梅味軟雪糕面層有話梅粉 無果肉相比之下 話梅味雪糕球係濃味好多好食好多

食過好幾次，真心大推開心果雪糕。雪糕奶香十吹，重點會食到粒粒開心果仁，難得開心都係靚既，唔會有擺咗好耐既油益味，令我最滿意既其中一點係食到筒底係仲會見到開心果粒，成件事都好令人感動！

近年雪糕店大行其道，各間店舖都有各自的獨特配方，為求在雪糕界佔一席位🍨而這次介紹的皇甘栗就憑著真材實料和獨創口味，在這雪糕競賽中成功跑出🐎———————————————————————開心果 🌟🌟🌟🌟眾多口味中必試的當然包括大熱開心果🔥雪糕本體質感順滑，奶香味重🥛甜度適中，但開心果味就不算特別突出🧐不過店家在雪糕當中混合了大量炒香過的開心果仁🤯果仁非常香脆，帶點鹹味，為雪糕增添開心果香之餘亦令雪糕口感變得豐富😊陳皮🌟🌟🌟🌟🌟陳皮雪糕入口酸甜，陳皮味濃，非常開胃😋而作為一間涼果店的出品，雪糕當中還混合了一粒粒的甘草陳皮，咬口十足，亦令雪糕更添果香😇焙茶 🌟🌟🌟🌟焙茶味十分香濃🍵茶與奶的比例得宜，有少許甘苦味得來奶味又非常突出，相信大部分食客都應該會覺得滿意👍🏻———————————————————————雖然皇甘栗的本業是售賣堅果乾果為主，但其雪糕亦製作得相當出色🥰加上各款口味都以真材實料炮製，絕無欺場🫡難怪會吸引那麼多雪糕控特意來朝聖🙇🏻‍♂️

終於再去大埔皇甘栗🌰！除咗買涼果同零食之外，山長水遠入嚟就係為咗食雪糕🍦。上一次食過脆開心果真係一試難忘，今次encore之外再試多個味，都係好滿意，如果市區有分店就好啦！香蕉焦糖香蕉味同焦糖味都好突出，係同時好清晰咁食到兩個味，唔會覺得是但一個蓋過另一個味，好平衡好夾，👦🏻揀呢個真係有驚喜。香脆開心果店員係即時打碎開心果加入雪糕，然後撈勻再裝起，所以開心果碎係保持到新鮮香脆，而雪糕係好重開心果味，所以每一啖都會食到雪糕同開心果碎。睇Menu佢哋有20幾個口味雪糕，不過每日供應唔一樣，開心果同栗子應該係主打，其他口味可能就要去到先知喇！

一入去已紅驚喜十足,多款涼果､堅果嘅產品,令人花多眼亂!想立即掃貨,雪糕仲有｢雪糕球同軟雪糕之分｣,今次為試開心果,梗係揀雪糕球先,真係即時加勁多開心果落去,啖啖都勁有口感!朋友推介話梅軟雪糕､但軟雪糕同雪糕球拼唔到,咁我第二球就揀雪糕球版嘅話梅雪糕!果然喜出望外,話梅肉又係多到食極都仲有,酸酸味味同開心果相映成趣!連個筒都有四款揀,我揀咗竹炭威化筒!同朋友食完已經想再下次再入大埔食!#UCreator #打卡美食 #相機食先 #夏日肌膚急救法寶 #chill賞遊世界

專程為左開心果雪糕,今次三訪‼️店舖除左賣炒栗子和涼果乾果外,仲有雪糕🍦開心果雪糕$45開心果雪糕配多一球雪糕$62我叫咗開心果配朱古力雪糕有滿滿嘅開心果碎😍再用自家即炒嘅開心果混入開心果雪糕中🍦食落仲有香脆口感,層次豐富,即炒既開心果真係好香,有種鑊氣既香真係食完好開心😆😆至於朱古力雪糕有驚喜🙊Dark chocolate 好香濃🍫*社交平台讚好減$3📍大埔寶鄉街51號B舖⏰9:30 -20:30

係一間涼果店，竟然有咁出色既雪糕🍨🍦⭐️香脆開心果雪糕$45為左唔想同其他味既雪糕溝埋一齊，今次只係揀左單球開心果味。店員會即場將自家鮮制開心果壓碎倒落雪糕到撈勻，濃郁既開心果雪糕加上滿滿既開心果仁碎，口感非常豐富，每啖都食到開心果仁碎，絕對係真材實料。難怪比其他味雪糕貴，但真係值得既😋❕開心果控必食推介❕⭐️話梅雪糕$35見Menu上有兩款話梅味雪糕，一款係雪糕球，另一款係軟雪糕。問過店員兩款既分別係雪糕球款係食到話梅肉，軟雪糕款係將話梅肉混落軟雪糕入邊，二合為一，食唔到話梅肉既。由於覺得好新奇就膽粗粗叫左雪糕球黎試下，雪糕入邊充滿著話梅肉，酸酸甜甜好好食，估唔到咁有驚喜😃⭐️雪糕筒都有四款揀原味窩夫/朱古力窩夫/竹炭威化/威化✨認真有誠意啊✨最後想講，店內每一個店員都好親切又有禮貌，店舖又乾淨衛生👍🏻值得一讚👍🏻

前幾日放假去大埔比賽 特登去埋bookmark左一段時間嘅人氣雪糕店😗餐牌上總共有多達20款口味選擇!!有幾款雪糕(香脆杏仁 栗子軟雪糕…)只會係星期六日先會供應 想食可以到店前先查詢一下～｜脆開心果 栗子雪糕🌰($68)開心果同栗子充滿碎粒 開心果比栗子更出色見到店員即時將碎粒混合雪糕 真材實料雪糕份量比想像多 口感creamy 唔會過甜夏天雪糕溶掉速度較快 建議準備定紙巾🤣｜榴槤雪糕 ($35)榴槤味香濃而清甜 散發強烈榴槤香氣!!!先食其他口味雪糕再食呢款品嚐原汁原味😝竹炭雪糕筒有淡淡黑芝麻味 仲有朱古力醬

今日天氣好好，約左好姐妹去大埔食飯行街，食飽正餐後想食甜品，好姐妹就推介帶左我去墟內一間賣乾果零食的店，原來店內同時有雪糕食～店舖內環境衛生，光線舒服，店員服務良好，雪糕有好多不同口味選擇，仲有幾種雪糕筒揀，我見到有最愛的開心果雪糕就選擇左佢，果然冇揀錯，由第一口至食到雪糕筒底每啖都有好多開心果脆粒粒，好美味好好食：）P.S.開心果雪糕，好食到令我第1次來寫食評記錄吓

天氣越黎越熱❤️‍🔥❤️‍🔥又係食雪糕的時候🍦🍦最近都知道開心果係大熱🥰🥰夜晚食完飯, 經過 @chestnut_king_ltd 皇甘栗鮮炒乾果專門店都仲咁多人排隊🧐🧐我都忍唔住買左個開心果雪糕食 $48😍😍🍦🍦Cone都有4款揀, 都唔錯wo有waffle、竹炭威化、朱古力waffle同埋威化CONE我鍾意食朱古力, 梗係試下開心果雪糕加朱古力WAFFLE🤪🤪開心果雪糕都幾滑身, 唔太甜既仲會食到開心果碎🥰🥰因為有員工會KEEP住係隔離整碎D開心果再加落雪糕度, 呢個都幾加分👍🏻👍🏻👍🏻同埋個朱古力waffle都幾脆😋😋唔算重朱古力味開心果味係大熱之外, 仲有杏仁味、話梅味都比較特別的口味😚😚下次都可以去試下先呢度除左雪糕外, 都仲有好多涼果同埋NUTS賣等雪糕的同時都可以睇下其他產品就算唔即時食, 都可以買雪糕杯返屋企慢慢嘆🤩🤩🤩P.S 價錢唔算係平 但間唔中食下都幾爽♥️

之前已經專誠黎食呢間涼果店嘅雪糕，真係一次難忘，早幾日咁啱經過大埔墟，咁梗係要入去再食雪糕啦。第一杯雪糕嗌咗陳皮口味，上次試咗話梅口味嘅雪糕，所以今次試吓其他涼果嘅口味。呢個陳皮口味嘅雪糕非常特別，食落去有粒粒陳皮，甜得來又有鹹鹹地嘅味道，喜歡食陳皮嘅朋友可以一試。第二杯雪糕就點咗栗子口味，雖然話栗子口味係人氣嘅雪糕，但係食落去就比起其他涼果口味嘅雪糕冇咁特別。有栗子味嘅，但係比想像中更加清淡。呢度嘅雪糕係可以配唔同嘅雪糕筒，我就揀咗朱古力威化糖，威化筒十分香脆，而且厚度適中，所以大家嚟嘅時候都一定要試一試呢度啲威化筒🍦。