真味鮮廚

营业中

休息中

由於今日係本人嘅表姐生日同表姨甥滿月嘅大日子，而我們又約咗傍晚先去表姐屋企慶祝，所以喺下午嗰陣我們約咗姨媽去「真味鮮廚」飲下午茶！我們叫咗蜜汁叉燒腸嘅腸粉好軟滑彈牙，叉燒沾滿香甜嘅蜜汁，味道好惹味！原籠蔗糖馬拉糕嘅質感相當香滑鬆軟，蔗糖嘅味道好清甜芳香，而且甜度適中，唔會太甜！翡翠筍蝦餃皇嘅餃皮好煙韌薄身，蝦肉相當爽甜彈牙，再加埋啲翡翠筍令到口感更加爽脆！醬汁蒸鳳爪嘅質感好腍身，而且醃得好入味！原隻鮮蝦燒賣皇真係有原隻鮮蝦放喺頂層，唔會祇係得切成粒狀嘅蝦肉，底層嘅豬肉肉質好爽滑彈牙，而且肉汁超多！鮮竹牛肉球嘅肉質好嫩滑多汁，牛肉味相當香濃，芫茜嘅味道好清香！剁椒蒸魚雲嘅魚雲係新鮮即劏，所以肉質非常鮮甜嫩滑，加埋啲香辣嘅剁椒醬令到味道更加惹味！菜遠肉片炒麵嘅炒麵炸得好脆卜卜，菜遠亦好青嫩無根，而最值得推介嘅係肉片唔係平日食開嘅普通肉片，而係豚肉片，肉質相當爽口軟滑！

是日俾朋友叫咗出來食宵夜，皆因明日是公眾假期所以食夜D都冇所謂，唔驚冇精神上班，今次去咗呢間位於旺角酒樓食。話明食宵夜梗係食D抵食夾大件，種類幾多選擇價錢又幾平，先來點咗小時食係石榴海蜇花，石榴酸甜海蜇爽口加埋木耳爽嫩，配埋麻辣醬汁一齊食另些刺激再來係金牌宵夜組合，又分有4道菜式，先來係脆皮燒腩仔，腩仔肉半肥瘦（例），加上豬皮燒得香脆，入口適中。四川口水雞（半隻），面層灑上花生碎粒伴皮旦，未食已聞香辣味道，雞肉嫩滑點埋醬汁非常香辣蒜茸粉絲蒸蟶子，蒜茸灑滿蟶子面上，雖然細條D但都幾爽口鮮甜蒜茸粉絲蒸元貝，元貝厚厚嘅肉，份量都算大隻，入口尚算合格，不過蒸耐過淋咗D冇咁彈牙最後2味餸分別係依然脆皮燒鵝同鮮腐竹珍菌浸時蔬，燒鵝肉質肥美嫩滑，鵝皮香脆，食埋個時蔬就中和番之前油膩，整體食物平均價錢超值，食到超飽

放工同媽媽食飯，當然要揀中菜啦！（都唔明，佢自己都係煮中菜，出街都要食中菜，唔悶咩？）頭盤揀左皮蛋豆腐，唔會唔好味囉，開盒豆腐+1隻皮蛋，再加芝麻醬！我都5分鐘整好啦，欠少少誠意！我媽最愛食燒鵝！今次叫左半隻，即燒的，味道唔錯不過，隔離台碟例牌好似頭頭尾尾堆疊而成，就唔係咁理想啦！建議大家黎食，都好似我哋咁叫半隻會比較化算、保險！龍躉兩味：蒸班頭腩，味道唔錯，魚係新鮮的！至怕兩味俾啲死魚黎食～～所以新鮮是好重要，而且蒸魚無得呃加埋絲絲陳皮香，唔錯！龍躉兩味之蜜糖豆炒斑腩，不過不失，正常水平！整體而言，係酒樓環境有啲噪雜，但晚飯質素、價錢，是可以滿足老人家的好選擇！

有次星期五晚市八時半訂了大枱諗住食蒸氣火鑊，準時齊人未有枱，話前一枱未食完無枱，不過就食完架喇。點知等到九點都話未得，我地見到枱客仲喺度慢慢食緊，真喺一肚火！一心成班朋友十二人都等左咁耐，都等多佢一陣。點知九點半都仲未有枱，見我地話走就話有枱。入到去得張八人枱，話坐迫啲就得架喇，真喺比佢吹漲。最終都只有拉隊轉地方食！

今日下午我們同表姐一家飲完茶之後一齊行咗一陣街，覺得好攰所以無出去食晚飯，所以我們去咗旺角金鷄廣場嘅「真味鮮廚」買外賣自取返屋企食！我們買咗等人餐前小吃：惹味鴨舌嘅質感好爽滑，而且好入味！引人飯聚組合：薑蔥焗本灣肉蟹嘅蟹肉好鮮甜嫩滑，薑蔥汁嘅味道調教得非常惹味，而且唔會過鹹！鮮露芛鮮白雲耳炒百合嘅露芛同雲耳相當爽脆，百合嘅味道好清甜！名爐即燒乳豬拼盆嘅乳豬燒得外皮非常卜卜脆，肉質好嫩滑，叉燒嘅肉質超鬆化軟滑，蜜汁嘅味道相當香甜！四川辣鷄煲嘅味道真係好辣，但辣得嚟係好惹味，令人覺得就算辣到爆，都忍著繼續再食嘅感覺！拔絲咕嚕肉嘅外層炸粉唔會好厚身，肉質好鬆軟！上湯蒜子浸冰菜好清甜爽脆！上湯蝦球伊麵嘅伊麵好爽滑煙韌，蝦球好爽口彈牙！

今日我們繼續同爹哋嘅生日慶祝活動，所以我們今晚去咗旺角金鷄廣場嘅「真味鮮廚」食晚飯！我們叫咗個「超值全包宴」：上湯蟹肉蝦球伊麵嘅蝦球好爽甜彈牙，伊麵嘅麵質好爽滑，唔會好諗身！鴻運金豬全體嘅皮燒得相當香脆，肉質好鬆軟！百合秋葵炒蚌柳嘅蚌柳好鮮甜爽脆，再配埋香甜嘅百合同炒過嘅秋葵，平日食秋葵通常都係生食或涼拌，但呢個係炒過，所以質感會比平日食開嘅生食比較軟滑腍身！炸香茅蝦餅炸得好金黃香脆，外層嘅炸粉唔算好厚身，蝦肉嘅肉質相當爽甜彈牙，而且有好芳香嘅香茅味，感覺好清香！花膠螺頭湯嘅湯底味道好濃郁，湯料亦好豐富！清蒸沙巴龍躉真係好新鮮，肉質好結實彈牙！瑤柱枝竹浸菜苗嘅菜苗係冰菜，質感好青嫩無根！招牌燒鵝皇好肥美大隻，而且燒得相當香脆，肉質亦好鬆軟！歡樂大蟠桃有兩款味道，有蓮蓉同奶黃，而且仲會用唔同顏色紙嚟畀人客方便選擇自己鍾意食嘅味道！另外我們再叫咗個瑤柱蛋白炒飯，炒得非常乾身同粒粒分明，而且好夠鑊氣！

今晚我們行過旺角金鷄廣場見到之前嘅「海港燒鵝海鮮酒家」重新裝修後轉咗「真味鮮廚」，所以我們就決定入去食晚飯！入到去見到店內嘅環境裝修比以前光猛咗，坐位與坐位之間都幾寬敞，感覺都幾舒服，唔會有好逼嘅感覺！我們叫咗個海南椰子鷄鍋四人全包餐：海南椰子鷄鍋「走地鷄一隻」嘅湯底味道好清甜，令到所有食材嘅味道更加鮮甜，走地鷄嘅肉質好鬆軟！三式刺身拼盤嘅刺身好新鮮，特別係三文魚嘅肉質相當肥美甘香！手切安格斯肥牛嘅肉質非常嫩滑，肉味相當濃郁，而且入口即溶，所以我們再叫多一碟嚟食！黑蒜豚肉丸嘅質感好鬆軟，黑蒜嘅味道好香濃！鮮甜螺盞超爽甜彈牙，味道好鮮甜！自家製水餃皇嘅餃皮相當軟滑薄身，餡料好豐富，而且都幾大粒！唐生菜清洗得好乾淨衛生，完全唔會有爛嘅菜葉！讚崎烏冬嘅麵質極之煙韌彈牙！仲有一渣清甜嘅自家製竹蔗水！呢個套餐有咁多嘢食都祇係$498，真係超級抵食呀！