祥發茶餐小廚

营业中

休息中

祥發茶餐食瑞士雞脾男友話帶我食好西，星期一晚9點去左北角，餐廳都拉左半閂，侍應話如果食雞脾餐就ok，叫做趕到最後last order食雞脾餐！好多選擇，我地叫左二個瑞士餐1）A瑞士雞脾 B黑椒汁雞柳包 熱檸水$362）A瑞士雞脾 B火腿奄列 F生滾鮮豬潤麵 熱檸水$44瑞士雞脾瑞士雞脾都算大隻，另一半話好好味，我就覺一般，汁太甜，肉不算嫩，我都係偏向鼓油王雞脾，火腿奄列火腿奄列都係咁，sofarsogood.黑椒汁雞柳包包上台都仲熱，黑椒汁混有雞柳、蘑菇同洋蔥，都ok，只係餡料吾算多，食包為主。生滾鮮豬潤麵豬潤好食！爽滑彈口，吾鞋口，麵可接受，湯冇乜味。

每次同朋友約北角食飯，一定係黎食呢一間雞髀餐廳🤣我每次嗌都一定係嗌雞髀，同埋佢嘅魚柳包，再加多個迷你飯同飲品，成個set都唔使$50，勁抵食！首先講吓佢嘅雞髀，佢唔算話好入味，但係勝在夠大隻，啲汁仲可以撈埋啲飯一齊食，正呀🤩佢嘅魚柳包一定要試吓，首先係佢個包唔係好乾好硬個種，而佢塊魚柳都唔係話炸得好勁，魚肉分量好足，重點就係佢甜甜地嘅醬，完全提升晒成個包嘅質素最後我就帶埋一個鰻魚芝士飯，唔好睇佢個碗好細，實質入面嘅飯非常之多，芝士亦都唔會好膩，而鰻魚都係厚肉入味，點綴晒成個飯！

每次去北角 都會去食祥發雞脾餐因為呢度嘅瑞士汁雞髀真係好好食今日12:15去到 撞正lunch hour 去到見到餐廳外已經大排長龍果然 呢間餐廳真為好受大家歡迎 👏叫野食 每次都要揀一大輪 因為佢有ABCDE 好多選擇同配搭即係可以雞脾或雞翼 配小食/包類/ 麵/ 飯 岩哂唔同食量既人 主角登場！大大隻瑞士雞脾！我見到我果隻雞脾側邊多左隻雞翼「你隻雞脾細隻左啲 補返度雞翼比你！」今時今日餐廳冇偷功減料 見到啲野食細份左仲會主動補比你 真係好難得 食物味道方面雞脾唔洗講 當然係大力推薦 瑞士汁好濃 又唔會太咸 有小小甜味同姜味 加上雞脾相當入味 真係令人想一食再食今次我揀左炭燒豬頸肉米線 有驚喜！豬頸肉都燒得好香 半肥瘦嘅豬頸肉 加上燒得燶燶地的醬汁 好吃好吃

呢一間瑞士雞髀雞翼茶餐廳真心要推介俾大家👍🏻👍🏻款式多，任君選擇《真係有得揀先至係老闆》雞髀夠大隻，上晒瑞士汁，睇得出都係好入味，見到已經好想食😋😋加上佢可以百搭，任配兩款或三款嘅嘢食👍🏻👍🏻朱古力煉奶多士濃濃既朱古力將醬油再加厚厚的煉奶，朱古力控必試，不過食得多就真係會好溜啦😆•沙嗲牛肉包呢個係本店推介，店長將豬仔包焗到好脆，再加上秘製醬料沙嗲汁，入面嘅牛肉非常足料，一口咬落去啲汁都必晒出嚟，食落口感一流👍🏻同埋價錢一啲都唔貴，加埋餐飲都係＄45，抵食平價之選，同埋一定會揀到你心目中最想食嘅嘢😂😂

呢間位於北角既瑞士雞髀，我久唔久就會專登黎食，因為真係好好味，念念不忘～～除左大大隻既瑞士雞髀煮得夠入味，仲能夠保持嫩滑既肉質，大大啖咬落去夠晒滿足外，呢度係有其他都唔錯既小食，超多款式，唔同既配搭，想食飽啲，食少啲，都可以隨意咁揀，好方便～～我最鐘意order一個瑞士雞髀餐，搭配一個豬扒包，加一小碗飯，今次揀左豬軟骨餐肉蛋飯，如果係炒飯就好喇～～朋友除左必點既瑞士雞髀，就叫左個咖喱魚蛋、豬紅、蘿蔔，同埋一小碗鰻魚餐肉蛋飯～跟餐加$2蚊就可以飲到紅豆冰，正！

朝早返返下工腦入面無啦啦出現左瑞士雞翼既味道然後就好想食瑞士雞翼/豉油雞醒起好耐無去北角食瑞士雞脾雖然少少遠但真係好想食瑞士雞脾個瑞士汁真係好好食一啲都唔慳家，可以每啖都蘸到好多汁仲可以撈埋飯食隻雞脾由北角搭去中環，都仍然好食炭燒豬頸肉餐肉炒蛋飯樣樣都係我鐘意食既嘢個豬頸肉燒得好好食仲好淋飯原本都有汁，但有咁好食既瑞士汁，當然要撈下沙嗲牛肉包都係好足料，不過不及主角雞脾咁出色咁多嘢食加埋杯凍檸茶都只係$48食得好滿足又平

從來都冇試過睇張餐牌睇到頭痛😂😂祥發真係第一間款式同組合多到一個點😅如果你有選擇困難症可能俾一日時間你都未諗好叫d咩😂我揀左個A+B+H餐 @$46有瑞士雞脾/翼+小食+迷你飯餐飲熱咖啡估唔到又唔錯 都幾香濃好過出面好多茶記酸菜炭燒豬軟骨飯話就話迷你飯 但係都有一碗飯既份量😂😂炭燒豬頸肉好明顯冇炭燒過賣相似叉燒😅味道麻麻😯主角瑞士雞脾的確好入味弊在甜得滯 雞脾煮得太耐😧 d雞肉老到呢......招牌美食黎講真係令人跌曬眼鏡😓梅菜扣肉我試左一舊味道正正常常啦西多士 都落左幾多牛油 但炸得唔夠香😯芝士肉醬薯角最尾竟然黎左薯蓉😫味道真係唔多掂 中曬伏 千祈唔好食🙅 雖然選擇多多 但係食物既質素同埋環境唔多掂😱😱 唔會再幫襯😕

男朋友有次帶我黎食依間講真係有d ‘up dup’既茶記食野，但食過一次之後真係難以忘懷，成日都記住佢，今晚男朋友問我食咩，二話不說就話去返祥發食瑞士雞翼！上次見識過佢既A+B+C餐既組合，又繼續令我選擇困難症上身，又想食瑞士雞翼，又想食佢個沙嗲肥牛通菜飯，最尾都係叫左雞翼同黑椒雞絲意粉算。事後先發覺原來舉手不回架！落左單無得再後補，大家要諗清楚至好😭因為佢個意粉份量都幾細下，好似食左空氣咁，但雞翼一如既往咁好味，最中意佢會比好多汁你，用黎撈其他野都正架！男朋友叫左晚餐既鎮江脆排骨飯，偷食左一舊，炸得勁脆口！好好味！之後再叫多個炭燒豬頸肉法包，又係驚喜十足！豬頸肉好爽口，估唔到同沙律醬係咁夾！價錢亦都好實惠，任你點叫，人均消費先50左右，我同男朋友講要多d黎依度食飯

經常係北角覓食 食到都唔知食咩好見到呢間茶餐廳 想食瑞士雞脾餐有得自由配選 我選左瑞士雞脾同西多士店員好細心提醒西多士要趁熱食左先果然熱辣辣好好食瑞士雞脾汁落左八角 好香好甜好好食 簡直想連汁都飲埋

男朋友次次話帶我去食都食唔到，次次經過都無開門，勁sad！好彩前幾日我地出門口之前check清楚，佢有開，就即刻仆黎食啦！初黎報到，一定係要學識睇呢張menu，太多太多選擇啦！男朋友由細食到大就easy job啦，我就睇咗多耐好耐！最後都係跟機叫A+B+M餐！$48，抵到流了眼淚。【A：瑞士汁雞脾】一睇勁吸引，勁深色，一睇就feel到好入味！個汁真係幾出色，勁入味，而且佢連埋汁一齊上，食既時候點埋d汁，真好味！佢唔會係好單純既死甜瑞士汁，食到好足料煮出黎，有淡淡既薑既香味，有層次感，所以係唔會食到一半就比果種死甜搞到d味蕾好攰，勁enjoy～【B：奶油法包】係，我初時睇少咗個包，無影到，得個角仔見到佢 lol但佢好食！佢款款包都係用呢隻法包嫁啦。包好軟熟，熱，夠多奶夠多油，好食既包，就係咁簡單。我食完第一啖之後，就即刻啪晒成個包lu。【M：梅菜扣肉＋半隻鹹蛋飯】細細碗，都好多扣肉，不過不失。大食鬼就岩晒！總結，女孩子一定食唔晒三樣野嫁啦，可以淨係A+B咁樣都好夠食！有時食得太飽反而失去咗食野果種樂趣～

是日在北角出沒，想吃個早飯。在Openrice這裡看到祥發茶餐小廚有不少正評。再看看餐牌，價錢實惠之餘又多選擇，值得一試。在地鐵站步行1分鐘就到，門面樸實無華，但座無虛席。點了A: 瑞士雞脾B: 沙爹牛肉包H: 特濃芝士汁鰻魚餐肉炒蛋飯(迷你)熱飲： 熱檸水(A+B+H+熱飲=$46)瑞士雞脾，果然係人氣之選。嫩滑嘅雞脾，搭配瑞士汁，好味！用刀叉就輕易解決，非常好。沙爹牛肉包，沙爹汁比想象中少，不過餡料十足，可算是誠意之作。特濃芝士汁鰻魚餐肉炒蛋飯，睇個名就知好味道。雖然迷你份量，但非常飽肚。離開餐廳時，已有不少食客等位，不愧為人氣之選！

我和朋友來吃下午茶，看到餐牌下午茶也不貴。店內環境不是很好，不過我們不打算坐很久所以還可以的。看了餐牌下午茶餐＄34 可以選擇3款不同小食和送一杯熱飲☕️（價錢跟那些連鎖餐廳如大家樂，大快活差不多，不過這裏有特色一點）我們叫了炸雞翼，炸魚柳和炸鯪魚球～貌相不特別好不過味道也可以，鬆脆可口，味道不會太喊。炸鯪魚球不會太熱氣（不喜歡食熱氣食物的朋友可以 give it a try!) 瑞士雞脾是這裏的推介食物👍🏻😋多汁好吃這個芝士肉醬薯角不是薯角是薯蓉，價值＄14，不太好吃，a bit expensive~

最愛瑞士汁美食。不要以為像一間普通的茶餐廳這間餐廳的特色就是自己選擇A+B+C食物去拼出你想要的套餐。《瑞士雞髀》出名的瑞士雞脾真是非常棒，雞髀肉很滑，外面的雞皮很入味，真是看到都流口水🤤對於雞皮控的我，一啖都不可以捨棄阿。《瑞士雞翼》雞髀那麼棒，雞翼又怎會差😆雞翼很大隻，完全不是一口就可以吃到的雞翼。《芝士火腿牛角包》已烘熱的牛角包脆到不得了，熱溶芝士，完美的配搭！《沙嗲牛肉包》濃味的沙嗲牛肉配上熱烘烘的包，好味到不可看少！《特濃芝士汁燒鰻魚餐肉炒蛋飯》這個特濃芝士汁，芝士味濃，奶味亦不會過重，適合一班芝士迷。不要以為迷你版就會好少份量，它還有蔬菜在裡面，非常飽肚。《燒鰻魚炒雜菌飯》炒雜菌一向都是我的最愛，還有其他蔬菜也非常新鮮。結賬每人才是49元，超值！

最愛瑞士汁美食。唔好睇佢好似一間普通嘅茶餐廳，我喺北角返工，好多時早餐午餐晚餐都係靠佢。🤩呢間餐廳最大嘅特色就係自己選擇A+B+C食物去拼出你最想要嘅套餐。《瑞士雞髀》出晒名嘅瑞士雞脾真係無得輸，雞髀肉滑已經唔使講，加埋好好味嘅瑞士汁煮咗好耐，外面嘅雞皮已經吸晒你，真係見到都流口水🤤對於雞皮控嘅我，一啖唔可以唒。《瑞士雞翼》雞髀都已經咁出色，雞翼又點會差得去邊度😆雞翼大大隻，完全唔係一口就可以食得唒嘅雞翼。《芝士火腿牛角包》烘熱左嘅牛角包脆到不得了，加埋溶咗嘅芝士，完美的配搭！《沙嗲牛肉包》濃味的沙嗲牛肉配上熱烘烘的包，好味到不可看少！《特濃芝士汁燒鰻魚餐肉炒蛋飯》呢個特濃芝士汁真係唔好講少，芝士味濃奶味亦唔會過重，啱晒一班芝士迷。唔好以為迷你版就會好少份量，佢仲有埋蔬菜係入面，真係識識吓唔知唔覺就會好飽。《燒鰻魚炒雜菌飯》炒雜菌一向都係我最愛，仲有其他蔬菜撈埋一齊非常新鮮。

呢間茶餐廳位於北角七姊妹道，之前都聽過好多朋友講好出名。今次自己去試吓，睇到個Menu就已經有啲頭暈，因為佢好多選擇！今次食咗個滷水雞髀，豬扒包，白汁魚柳天使麵，再加杯凍檸茶。滷水雞髀係佢嘅招牌試過，滷水汁好入味，雞髀亦都好好食，真係名不虛傳！另外豬扒包配沙律醬都好好食，魚柳天使麵亦都唔係好漏，份量啱啱好。杯凍檸茶亦都好好飲，雖然呢個套餐好似好多嘢食，但係佢每樣嘢食都係份量適中，唔會太多，食完之後你會覺得啱啱好夠飽！所以依個茶餐廳好抵食嘅😊