翠華餐廳 (海趣坊) (已結業)

翠華這個香港地道連鎖茶餐廳一定無人不曉，但各人喜愛的食物各有不同，這次就由我分享我的必吃之選吧！懶洋洋的星期六一醒過來便是十一點正，可恨的是吃不到期待了一星期的休閒早餐，馬死下地走，就吃個豐富的午餐吧。在商場走著就被翠華的餐牌吸收過去，餐牌上正正是他們引以為傲的海南雞飯餐！大家可能一直以為翠華有名的只有早餐的沙嗲牛肉麵，爆脆奶油豬，其實這個海南雞飯也不瀨！海南雞十分嫩滑，雞油飯非常吃，最重要的是配料兩個醬汁，把海南雞好吃程度推至天上，十分推介。

今日天氣凍冰冰又係藉口落街食個豐盛早餐，開個靚頭Good Morning 🌞要咗個D餐五香肉丁公仔麵配菠菜炒蛋、牛油豬仔、飲熱檸蜜茶❤️五香肉丁都好多份量，唔會好似有時其他茶餐廳得嗰兩三粒小家到死🤦‍♀️不過公仔麵稍微煮得耐咗⋯麵太軟身菠菜炒蛋一如既往咁好味，又唔會太鹹，炒蛋煮得剛剛好，我鍾意佢加啲菠菜喺炒蛋入面，令到份早餐「感覺」健康啲🤣豬仔熱辣辣，卜卜脆，無得輸😝本身我想叫熱菜蜜，不過原來翠華係無熱菜蜜🤦‍♀️侍應姐姐推薦我飲熱檸蜜水/熱檸蜜茶❤️真係無咩聽過熱檸蜜茶，即刻整杯黎試吓先😊最正係唔洗另外加錢❤️原理就係熱檸茶加上蜂蜜，又幾滋潤喎，呢幾日天氣凍飲就最適合不過👍

海翠有好多間食店，想食平民化茶餐其實可以行多兩步去兆禧餐廳又或者去新新地開既文華，價錢都叫大眾化。但係如果你想你既晚餐食d水準正常但係坐得舒服既餐廳，我會推薦翠華。翠華勝在地方夠大位置夠多，而且勁愛咖哩既我認為翠華既咖哩係十分唔錯的！佢既咖哩係港式咖哩，唔好期望佢有咩異國風味，係無既！不過佢既咖哩係濃郁的，不是稀稀的感覺。加上三件大小適中又夠腍既牛脷..真係好好味。但海南雞飯就一般，係好一般，雞都叫正常，不過唔係滑！配既湯係蕃茄薯仔湯..有點特別！不過講到價錢，就真係唔抵！因為覺得佢偏貴..無野飲兩樣野夾埋$136，不過一早預左，想坐得舒服都ok啦！

呢間舖頭嘅員工服務態度算好， 最起碼唔會西聲黑面！ 食品嘅質素中規中矩，但係勝在餐廳夠大，坐得舒服！ 價錢就真係唔平嘅，不過環境坐得舒服都值回票價嘅。 希望佢啲食物嘅水準可以再提高啲，咁樣可以吸引到更多嘅客人。

閒日想食早餐，一定會揀翠華，雖然啲人話翠華上市後愈做愈差，又話只做大陸人生意，其實都唔係嘅，我覺得佢個炒蛋炒得好有heart，起碼唔會係好熟嗰隻，真係滑蛋先囉！另外佢個通粉湯底都幾正，濃得嚟唔係重味精嗰隻，飲得落口嘅都唔錯。我叫A餐，再轉炒蛋，佢都肯轉俾我，如果出面啲茶餐廳，就未必俾你轉喇，所以不得不讚一下啲侍應姐姐。不過相信只限於早餐，我覺得唔錯。曾經食過午市嘅飯，一般貨色，價錢仲要有返咁上下。

屯門最有禮的翠華，因為通常屯門區嘅餐廳或者快餐店，啲職員普遍都冇乜禮貌，一係就好似譚仔咁，講嘢都未講得正。不過最開心係見到，有大集團肯訓練員工，以禮待人，之前食過大興翠華，好似係股東唔同，所以服務同食品質素都有少少分別。B沙嗲牛肉公仔麵餐，比起出面啲翠華，需要少少時間，先送到，可能即叫即整關係，亦都係好食嘅原因，所以有時去食嘢，我都唔想一叫就到，好明顯係唔新鮮。今次呢個沙嗲牛肉公仔麵，牛肉都好嫩滑，沙爹味夠濃，豬仔包新鮮熱辣，非常鬆脆，炒蛋有蛋味，一定好過屯門碼頭其他食肆，值得下次再嚟

今日終於記得起身同阿爸去食早餐，點知上去嗰間茶餐廳實在太多人，所以今日就去咗翠華食早餐。因為我唔係好肚餓，所以叫咗個雪菜肉絲蝦米湯米粉加個豬仔包同一個咖啡34蚊，豬仔包都有兩個都算分量好多，而且牛油都好多 ，十分好味，之後不久咖啡就到，咖啡味道偏淡，但係話可接受。米粉黎到但蝦米得兩粒 ，肉絲係一大舊 ，係凍嘅， 所以要撈勻佢食先至會比較好 。但係啲肉絲都係一舊分吾開。只可講整體分量夠，而且加咗辣椒醬之後好味好多。 或者可能因為份量都算多價錢還可接受，所以其實我哋屋企樓下翠華長期都會人排隊。ps:爸爸炒蛋的確吾錯好味道。

早幾日想食翠華，諗住打電話去外賣自取，叫了一碟唦嗲牛肉炒河、豬扒飽。熱線中心話15分鐘可以取，我便準時到達及付錢。去到佢地話又話要等等先有，好丫唔梗要我等陣。等咗幾分鐘，佢地先同我講個餐牌改咗，依家嘅豬扒飽係大嘅，要另外加$11先得。買一個豬扒飽都攪到轉來轉去，同埋到依家先至同個客講，我已經覺得翠華好唔專業。好啦，我照俾差價$11，我俾咗張$100，我收銀員竟然找得$81俾我，又錯(應該要找$89)，加減數都唔識，總之樣樣都錯。一肚氣拎個外賣返上樓，發現個河粉係一點鑊氣都無不特止，仲要係凍與暖暖地之間，個脆皮豬扒飽d皮係超淋又凍冰冰，總之難食到嘔。總之，呢間翠華係全港最差最差，大家千萬不要再幫襯。

我一直以來都是長期的翠華捧塲客, 但這間翠華餐廳，每次去都總會領人失望--冷凍又唔脆的奶油脆豬包、煎燶了的牛肩扒、超鹹的羅宋湯底螺絲粉、煮燶了湯底的螺絲粉，而不是濃湯底，冇蜜糖味的桔仔蜜、稀稀的蛋白杏仁茶 ……，一句講晒食物係勁差、差、差……！仲要係啲侍應企晒喺度傾偈，叫極都冇人落單，好奇怪，大部份侍應會背向客人，落單時態度呆滯/黑口黑臉！叫人拿杯水也十分困難，叫了多次都冇拿來，最終都係要自己行去攞！唉！今時今日，咁嘅食物同服務質素，是否等執笠呀？

翠華早餐其實不算太貴，可是近來質素開始下降，以往去任何一間，食物質素及質量都穩定，但今天食個早餐已覺得不同了。我點了個早餐，有沙爹牛肉麵、炒蛋、鮮油豬及茶走少甜。沙爹牛肉麵：味道雖然保持到，牛肉及麵質都不錯，可是份量和以前比較明顯少了很多。炒蛋、鮮油豬：炒蛋味道一般，出面好多餐廳還炒得好食，太過濕，味道較淡。鮮油豬味道不錯，但可是份量太少了。茶走少甜：以往水準和質量都是最穩定，可是今早看到奶茶不到杯的刻度，茶味太淡，沒有甘香的味道，差了很多。

這家茶餐廳加價後第一次黎食，服務無改善，唔夠細心，仍然十問九唔應用，唔會像其他地道茶餐廳主動給碗筷和水。食物方面仍能保持水準，但價錢加幅偏多，每樣食物都加了4至5蚊。魚蛋片頭河 配熱奶茶 $39湯底算幾鮮甜，唔似味精湯， 魚蛋片頭和魚蛋都好彈牙，河粉份量都足夠。其實奶茶唔好飲，奶和茶既比例不恰當，出面好多餐廳沖得好過這裡。蛋撻$6剛剛新鮮出爐，酥皮烤到好香脆鬆化，裡面既蛋好香好細滑。炒貴刁 $65炒得好乾身，好有鑊氣又唔油，河粉好彈牙，用料十足，有蝦和牛柳絲，再配上肉鬆和芽菜，口感豐富整體食物質素ok，但價錢真係偏貴，和服務態度有很大既進步空間。 

本來想帶著大小兩隻寶貝往稻香吃小菜的，怎知一堆人在等位，結果來了這裡。對了，翠華的晚市是不設小菜的。因為小寶貝有點累，寶貝爸爸又說隨便點就好，結果叫了一客秘製無骨海南雞飯、一個美極生炒牛肉飯，連同兩杯飲品，埋單$165。那個生炒牛肉飯份量比我想像中多，賣相可以，看來並不油膩，味道不過不失。不過那個所謂秘製海南雞飯........價錢雖比前幾天在海南少爺吃的便宜三分一，不過，似乎都不及格：湯：花生眉豆雞腳湯，頗足料，熱度也足夠，例湯吧﹖油飯：看來比較油潤，但味道偏淡無骨雞：雞肉份量也是很少，只是不過不失而已然後那個沾醬....黑醬油太甜、那個顏色奇怪的辣醬，該是將辣醬和薑蓉混在一起吧，完全想不出有甚麼秘製的地方，酸菜沒有吃看來，真的沒有刻意再來的誘因。