雲桂香米線專門店

营业中

休息中

經常經過都見到好多人喺門口等，就同老婆去試下，放工就去拎飛，見到門口好多人，以為要等好耐，但不出5分鐘，一下子就入晒所有人，原來入面有好多檯都未有人，唔知係唔係要做個勢比人以為真係好受歡迎呢。坐低睇完餐牌就叫人落單港式米線小辣+豬大腸+豬紅+豬潤，加凍檸茶湯底味道幾好，胡椒味都算香，配料份量好足，豬大腸有口感夠彈牙，豬紅都夠味，但係就只得4粒，而豬潤就比較差，唔起沙，入口感覺唔似豬潤。杯凍檸茶冰塊唔夠，攪多幾吓已經融晒，個杯野仲係暖既，要叫店員另外比多杯冰塊先得，個店員好funny，一路唱歌一路拎比我。小鍋米線中小辣+豬軟骨+墨魚丸同樣配料好足，夠辣，豬軟骨得1舊加2小粒，亦一啲軟骨都無，只係肉，食豬軟骨就係想食啲軟骨之麻，而墨魚丸就只有3粒，口感好差，一啲都唔彈牙，實的的，唔係眼見到都唔會相信佢係墨魚丸。總結係，港式胡椒湯味係好既，小鍋湯就一般，墨丸豬軟骨豬潤就最差，豬大腸最欣賞，下次都係去返譚X啦。

老實講將軍澳一路都係得果2間譚字頭既連鎖米線鋪，有時想食米線都係簡阿哥，今次終於有吾同口味既米線可以簡啦～今次係第二次食呢間雲桂香，上次去食果陣岩岩開左無耐，所以感覺上好似好多野都好亂，今次感覺好多野上曬軌道，所以感覺順利自然，等位都吾會話等好耐，我一黎到就先係門口禁好飛再等我朋友黎，都係等左吾洗半個鐘就入到去。入面位置相對黎講會比較密集一點點，但是每張檯都有隔板分隔，落單叫店員速度也不錯，老實講真係好多人黎食，所以店員都好忙，但是服務態度都吾錯呢～我今次都係叫返豬軟骨同海帶，麻酸小辣，食落好好味，好難忍住吾飲湯😂😂😂豬軟骨好軟滑，食落好正，有一定脂肪既感覺，份量也好足夠，海帶都好好食，好啦～其實我好鐘意呢個配搭😂😂😂朋友叫既清湯吾辣睇落好清😂😂但是佢既薯粉都吾錯，吾會話好硬好難消化。我今次仲叫左個蒜泥白肉，佢呢個蒜泥白肉夾住青瓜既配搭吾錯，白肉畢竟係有點脂肪感，配搭清爽既青瓜一齊食又係吾錯既配搭。

明明叫左走芽菜， 返到去打開個盒時 發現成扎芽菜係度😑😑叫小食嘅時候 想轉款阿姐話好忙啊而家 下次先再轉啦🙄其他分店好食啲 呢間既味道太咸啦可一不可再啊 .........

位於寶琳的連鎖米線店，近日新開的，經過總是座無虛席，多人等候，大概是附近都沒有米線店吧。過了繁忙時間過來，人流漸少。湯麵底：小鍋米線辣度：中小餸款：豬大腸、豬潤、雞絲本身的小鍋已經有些配料，再加上點了3款餸，很豐富且飽肚。米線掛湯，香辣過癮，大量的雞絲，肉質粗糙。嗜辣的下次要一試大辣。豬潤及豬大腸很多片，很韌口，咬得口腔有點累。風味小食：口水雞普遍常見常吃到的四川涼菜，雞件連皮嫩滑。麻辣汁是精華所在，惹味帶蒜的味道，層次豐富，香辣帶麻。

雲桂香米線 雲桂香都算係香港嘅連鎖米線餐廳，喺唔同地方都有分店。 米線可以自由配搭， 揀咗想要嘅湯底之後，再另外加配料。有超過10款唔同嘅湯底，有辣有唔辣！最後揀咗招牌小窩米線明火烹調配有芽菜、酸菜、韭菜、蔥、芫荽可以自行選擇配料。湯底有少少酸，識落幾開胃。小鍋米線 (唔辣、竹笙、米線) $28+9小鍋米線 (微辣、豬軟骨、米線) $28+9配料嘅份量都算多，竹笙同豬軟骨都見到好多舊，米線唔會太淋。呢個價錢來講已經算唔錯。醬拌皮蛋 $20醬料唔係好辣，少少麻，會食上癮嘅小食凍檸茶+$7熱華田+$6📍 雲桂香米線專門店 (新都城中心) (將軍澳)將軍澳貿業路8號新都城中心1期地下G105-G106號舖

今日想食下米線🍜之類的食物，經過家附近的雲桂香，佢3月份才新開張，有時經開都會見多人幫襯，可能我早食關係, 見都有坐位，咁等我又試下新鋪味道如何先得。#鮮魚湯米線配黃花魚魚湯米線夠晒大碗有份量嘅，原條黃花魚上另上，免給湯浸到脆皮淋晒日👏，黃金色的外皮好香脆，魚肉就都算新鮮，加$9/$7可配搭自己喜愛的食物，抵食！#麻辣雲耳成日都想食麻辣，呢間個麻都夠，有陳醋在內，有齊麻酸辣的感覺。#雲桂香 #米線

米線一向係香港人最愛，配搭住辛辣湯底同埋唔同嘅餸菜，就已經係一味簡單嘅逸品。呢間連鎖式米線，聽就聽得多，難得喺將軍澳開分店，當然要一戰。小鍋米線，$28。呢個絕對係鎮店之寶，個人推介麻酸辣湯底，個人認為呢度嘅酸辣湯唔算太辣，有信心嘅朋友起碼要喺中辣起跳，湯頭配有大量肉碎，可見足料。餸菜方面我就揀咗腩肉同埋鮮竹龍蝦卷。腩肉甜甜地鹹鹹地，同米線十分夾，米線嘅軟硬度都算適中，值得一讚，反之龍蝦卷普普通通。

坐底食野 入去坐底無人理 無人執枱 叫落單扮睇你唔到 叫左一個就話等陣 兜口兜面叫佢另轉頭執枱 我話叫你落單你就執枱 之後佢大叫落單無人理 我行出去個收銀叫佢 你地唔做生意就講 叫極無人落單想點

星期日間間食肆都人山人海，難得新都城新開呢間雲桂香係唔使等位👍即刻入去嘆番個下午茶😋小鍋米線+豬扒～湯底勁好味，有好多配料，豬扒葉得勁入味又鬆化👍👍港式米線+腩肉～呢個湯底冇乜味，腩肉又少😟

唔知由幾時開始，#小秘書 愛上咗 #湯米線，由最初只係識欣賞 #港式 嘅口味嘅我，漸漸發覺原來 #雲南、#四川... 嘅酸同麻都唔錯吖😉 呢晚做完嘢得我一支公，諗住清清地食個 #炒麵、#白粥 做 #晚餐，點知比我望到對面新開咗間專食 #米線 嘅 #雲桂香 ... 自自然然就被吸引咗過去😅 見到門口成棚人喺度等位，原來個個都成雙成對👉🏻👈🏻 原來單身都有單身嘅好，等唔夠5分鐘我就有位喇✌🏻餐廳雖然係新裝修，不過嗰種逼夾嘅情況令人咋舌😕 二人枱中間仲要豎起塊膠板，當烏低食麵嘅時候，個頭頂幾乎要撞到前面塊板🤣 夾喺中間嘅我，同左右兩枱嘅食客都唔知有冇一尺嘅距離😅 加上班 #員工 喺小店裡面不停 #穿梭、#大叫大嘈... 坐唔夠3分鐘已經感覺到非常有壓力🤯 所以都係快快食完，早走早著😅我叫咗碟 #醬伴皮蛋，個 #醬汁 同啲 #炸蒜蓉 加起嚟都幾惹味😅 不過可惜啲 #皮蛋 唔靚、口感太乾... 有啲浪費🤭 好在個 #腩肉小窩米線 都仲保持到水準，不過如果個湯底可以再辣少少就更加好喇🤤 經過此役，我諗我都係鍾意啲比較慢活嘅運作模式... 要食米線嘅，就轉買 #外賣 吧啦👉🏻👈🏻

叫左個雲桂米線轉水晶粉酸辣小辣（$64）簡單形容冇辣味 、冇酸味。佢就係用滾水恰熟個水晶粉，之後用番個滾水做湯底、再加一舀開稀左既酸辣湯底。真係難食到講粗口。小食方面 我叫左個皮蛋，我覺得ok既。冇咩問題，可以叫黎食下。再加一個炸雲吞，炸雲吞好大隻既，好多餡，個皮係煙un的，不是脆的！一般般可接受！繼續杯凍檸茶係幫我走左甜既。um..冇錯，我今日黎養生既。不要浪費食物，我努力食哂d面，嗯..冇事既 我唔會再黎姐！

幾間雲桂都食過 新開去試下 伙計個個好似無靈魂甘 湯ok既豬腸都可以 皮蛋可以豬皮勁多毛 魚春卷嘩垃圾到呢 隔離左右都食到黑面服務就真係好唔掂 唔知跟鵝頸橋係咪同集團 應該都唔會再幫襯

本人其實好鍾意食小窩米線，但可惜將軍澳區只有來來去去果兩間集團米線。今日行過發現竟然開咗雲貴香，當然急不及待一試。等咗大概10分鐘就安排到位置入去坐，唔知係咪因為試業關係，店員未係好熟習流程，啲碗就收晒啦，但張枱就未抹，坐一陣見佢幫隔離枱抹嘅時候，就叫佢過嚟幫我抹一抹，但上一手留喺度啲嘢佢又冇執走，同佢講咗張單張唔係我嘅佢都係冇拎走。下午茶凍飲只係加$3，我就叫咗一碗墨魚頭、竹笙、韭菜小窩米線（小辣）。米線好快就黎到，我就覺得小辣唔係好夠辣，之後發現原來有中小辣，下次再試一試。見到佢餐牌仲有涼拌米線，如果天氣再熱啲嘅時候食perfect。總括嚟講，餐廳食物水準唔錯，店員嘅服務有進步空間，其實疫情期間清潔真係要做好啲。

新開張黎幫襯下，食過荃灣店旺角店幾次，俾我印象係幾好，抱住期待嘅心情去食，結果令人太失望😞叫左碗小鍋水晶粉+滷水豬大腸+羅白，另外仲叫左豬頸肉小菜「$42」🤷🏻‍♀️我叫小辣嘅外賣拎走，但係翻到去打開見到一層好厚嘅紅油，試左啖湯超級無敵淡，直頭係冇味，冇辣冇酸冇咸，d芽菜仲要係臭嘅☹️食到好嬲，豬大腸仲要好硬，咬極都咬唔開，份量仲好少，好似食左4舊左右冇喇⋯⋯羅白同豬頸肉就正正常常！雖然係試業中第二日姐，但係水準差太遠喇，希望遲啲會跟進翻好啲質素😞