影片
佐敦新开呢间素食餐厅 Loft Green Mama (旧名 Loft 206），都新咗一段时间，似乎讲佢嘅素友唔多，有朋友食过就觉得啲嘢食麻麻。咁唔知真汉子食咗有咩评价呢？🤔据我所知呢间餐厅未搬之前系响地下，只得少少地方比人企响度食。而家搬咗上阁楼，变成一间正式餐厅之余，仲有猫猫驻场添，咁大转变，我谂可以重新评估一吓？😊真汉子今次点咗：🇹🇭 素泰式肉碎炒饭 $58好食，炒得唔油，饭又粒粒分明，好香九层塔味而且唔辣。肉碎好好味，而且好真，如果响荤素餐厅食，真系会问佢哋系咪煮错咗（其实我果刻个心坚系好想问 😂）。另外配料有紫椰菜同红椒，好爽口都加分不少。🍏 五蔬汁 $38包括青苹果，青椒，青瓜，凉瓜，西芹。饮落去主要系青苹果汁嘅味，换言之非常清新同易入口。☺️见啲嘢食唔错，又想同啲猫相处多阵，就叫多少少嘢试吓：🍅 清爽梅子醋大蕃茄 $20以为蕃茄已经酸，加咗梅子醋应该都系冇咩分别，系咪有啲多余。估唔到加咗梅子醋嘅蕃茄食落仲更加鲜味，而且作为小食嚟讲够健康。餐牌上有其他小食都好吸引好想试，例如邪恶嘅炸嘢，同埋见到其他客人食嘅素牛肉球。🤤☕ 冻美式咖啡 $28以非专做咖啡嘅餐厅嚟讲算唔错，几有水准呀。💦 以下长文慎入 😆💦如果讲到素食又有猫嘅餐厅，好自然就会同「毛所树树」作出比较啦（下称「毛」），虽然「毛」而家都唔系只卖素食啦。真汉子嘅感觉就系，就算未嚟 Loft 之前，我都麻麻地钟意「毛」，一来佢哋啲猫系缅因猫所以好大只，对唔钟意猫嘅我有啲吓亲；二来佢哋枱与枱之间好迫，加埋猫就仲迫 😂；三来佢哋猫嘅数量多，而且开嘅位置关系（旺区嘅地铺）吸引好多一心为玩猫同打卡嘅客人帮衬。😅而 Loft 呢度感觉好舒服，好似一间好亲切嘅小店，嚟帮衬嘅都系熟客，客人会同猫玩但唔会表现得太疯狂，都系比较斯文（当然可能只系我呢次遇到嘅客人系啦，但始终餐厅上咗楼，冇咁招遥系事实）。呢度嘅猫暂时有三只，一只当时响笼中（我劲远影佢个 friend 果阵佢全程啤实我 🤣），一只正常活跃，一只小猫有啲内向又少少好奇，好可爱。😍我觉得虽然要上楼，但始终系佐敦站一出就到，咁方便又有猫猫驻场嘅餐厅嚟讲，价钱都算抵食。下次经过佐敦想食素可以考虑吓嚟呢间试试。👍🏻
继续阅读