東海薈 · 拉斐特 (青衣城1)

营业中

休息中

青衣城呢间「东海荟•拉斐特」有别传统中菜厅，由于系婚宴场地设计，所以装潢比普通酒楼靓得多，地方够大，楼底够高，枱与枱之间距离合适，感觉非常宽敞，系吋金呎土嘅香港底下，唔洗逼住坐都真系唔易。价钱合理，另外晚市仲有超过一半菜式有八八折优惠，认真系几抵嘅，呢个价钱屋邨酒楼都差唔多。百味豆腐: 脆炸口腐加上七味粉，外脆内滑，几香口惹味。海蛯汁波士顿龙虾: 所谓海蛯汁类似稠密少少嘅上汤汁，鲜甜但又唔会太浓烈而盖过龙虾嘅鲜味。龙虾新鲜，肉质爽实，滑嫩多汁。清蒸游水海星斑: 星斑非常新鲜，重约1斤，肥美厚肉，少骨，其肉质十分细嫩，但夹起唔会散开，加蒸鱼豉油原汁原味，味道鲜甜。脆皮炸子鸡 (半只): 鸡皮香脆，鸡肉亦非常嫩滑，肉汁丰富，鸡件本身有调过味，唔太需要蘸酱食。虎乳菌翡翠炒带子: 虎乳菌质感较结实，听讲药用价值蛮高，系养生之选。带子肉质非常细嫩，味道鲜甜。羊肚菌杞子浸菜苗: 羊肚菌算系比较贵嘅菌类，味道清香甜美，质感爽嫩有咬劲。另外，鱼上汤够清甜，浸过嘅小白菜都够味。原个蛋黄寿桃包: 见有唔少人点呢个寿桃包，内含原只蛋黄及莲蓉馅，食落唔会太甜太腻，但都几饱肚，二人分享一个就差唔多。