淂記 (已結業)

为食兵团近日发现利园三期地牢原来有间中菜馆「淂记」，某网购平台会员可专享晚市七折优惠，闲日黄昏四点至八点仲有欢乐酒酒饮，收工可以直落唔洗转场，蕃薯uncle吹鸡即有十人附和，私人饮食助理当然系立即登记做会员啦！经商场内嘅正门进入餐厅，食客必先行落多级楼梯。小肥会建议大家从新宁道入口搭䢂落去，安全方便得多。「淂记」室内面积坚大，除咗私人厢房之外，用餐大堂都分好几区，洋式嘅装潢及合拼式餐枱似系咖啡厅多啲。酒鬼们五点钟先喺高半层嘅酒吧区畅饮欢乐头轮。主饮品牌共有九页。人多最抵就系点选指定樽装红酒或白酒，因为打完八折仲送两客酒吧欢聚小食。小食最平都要$68/客，即系悭多百几蚊㗎！脆脆薯条（$68）：粗粗肥肥嘅薯条新鲜炸出，外脆内腍。椒盐鱿鱼须（$68）：小食层炸皮就好香脆，无奈鱿鱼须本身偏韧，牙力唔够的话唔好乱咁试。干煸猪大肠（$68）：食落麻多过辣嘅猪大肠仍有少少餲味，个人并不推介。晚市散点餐牌共有十页之多，中英对照，并附插彩图，简单易明。茶位费$20/位；前菜$22/碟。每个位都有齐备嘅自用餐具。马兰头百页千卷（$80）：以百页包卷住嘅马兰头清新爽嫩，一口一件极易入口，完全唔会食得好遴迍。