彩福欣宴 (已結業)

彩福系全香港唔同地区都有分店，大部份叫彩福皇宴，不过呢间就叫彩福欣宴，虽然唔知点解专登改个唔同既名，但系食物选择大致相同，而且每间既质素都能维持系高水平，而最重要就系非。常。抵。食。豉油皇煎虾 – 虾煎到脆卜卜，又够干身，连壳都可以食埋，豉油味渗晒入虾壳同虾肉，非常香口惹味，虾肉亦都够爽弹，几好食!菠萝咕噜肉 (85) – 先炸后炒，但食落又唔会好油腻，而咕噜肉够脆身，咬落又有肉汁，配埋酸酸甜甜既酱汁，个人黎讲系十分喜爱。西兰花炒带子 (142) – 带子大大粒超肥美厚肉，仲有成差唔多10粒，真心正! 肉质够嫩，食落觉得好新鲜，而西兰花就简单用蒜及彩椒炒，加埋少少蚝油吊味都够晒好食。小炒皇 (90) – 想食菜又唔想太斋就非小炒皇莫属，除左韮菜花外，仲有唔少虾干、虾肉、腰果同彩椒，用料都几丰富，仲有少少辣味，几香口几有镬气!