小魚兒 (寶漢大廈) (已結業)

【湾仔区】【小鱼儿】好耐冇同真正哥食饭，佢之前𠮶日凌晨四点仲打嚟揾我解决问题。我就唔识帮人解决问题嘅，有咩叫佢自行了断啦。之但系佢揾得我亦都代表住佢对我嘅信任，今日我想试呢间铜锣湾嘅川菜食肆，就揾埋佢啦。餐厅喺铜锣湾地铁站附近，出口行过去好近。佢系一间气氛相当之好嘅餐厅，黑色为主调嘅装修但系一啲都唔觉得阴暗。既然餐厅名叫做「小鱼儿」，当然要试下佢哋有关「鱼」嘅出品啦。首先就睇中咗佢哋嘅「碳火风味烤鱼」，都有四款鱼可以选择，而烤鱼口味更加有十款味道拣，变化都好多。我哋试咗 $308 嘅「海鲈鱼」，口味就拣咗「黄金蒜香豆花」，懦夫如我就拣呢个「不辣」嘅口味，唔关真正哥事。不过食落都好好食，就算冇出动到餐厅最擅长嘅「麻辣」嘢都好，我都想像到佢哋麻辣嘅出品应该都唔会差，真正哥都话估唔到个蒜香咁正。之后试 $88 嘅「金银蒜烧黄花鱼春」，系我劲中意嘅鱼子加上金银蒜烧出嚟，我觉得超级好食。而饮品方面我哋拣咗 $28 嘅「饮品放题」，选择都非常多，热嘅又有冻嘅又有，仲有两款自家制作茶饮，几好。连埋加一嘅价钱系 $497，以呢个质素嚟讲唔贵。。。（地址：铜锣湾波斯富街24-30号宝汉大厦1楼）#1am