樂園素食

营业中

休息中

「乐园」既前身系「素一」，果阵都好钟意黎食，除左食物款式多，又有清楚标记边啲系vegan之外，最重要就系地方阔落。香港虽然都有好几间素食自助餐，但大部分既座位都好窄，食物摆到密密麻麻，出去拎野食时会撞手撞脚咁。「素一」就完全冇依个问题，坐得好舒服，拎野食都唔会撞到人。「乐园」基本上只系换左个名，装修、食物同营运模式基本上都系同「素一」果阵一样。今次挂住同朋友倾计冇乜点影相，不过都尽量share下啦。一坐低冇耐店员就主动送上炖汤同冰镇咕噜肉。咕噜肉既真身系鸡脾菇，个粉浆冰镇完keep到脆脆地既口感，都几好食，不过份量实在太多，我地三个人都食唔哂依一碟，建议份量可以减至少1/3，如果钟意食先再encore会好啲。自助区分成沙律、炸物、寿司、主食等等，食物种类都真系几多，而且vegan类既都好多！炸莲藕片超好食，辣辣地咁好惹味，完全颠覆左我对莲藕既认知。啲寿司就都系蒟蒻扮鱼生，可以过下口瘾。叉烧都做得几出色，有㶶边，像真度高。整体黎讲食物都唔错，服务亦都几好。夜晚黎都好多人食呀，长做长有绝对冇问题。