Zanzo (已結業)

星期五晚既大坑好热闹，拣左Zanzo因为唔使等位。入到去先知原来系食串烧。份量偏细，所以咩都试下，叫左好多。竟然全部都唔差，冇一样系唔好食。油甘鱼刺身好肥美又厚切，有一口油既满足感 芝麻酱同刺身有点格格不入，但同伴碟就好夹。带子刺身都鲜甜，但不及油甘鱼出色。烧蕃薯，一粒粒既日本蕃薯，好甜，外面少少㶶，内里湿润，好食。烧羊架，肉质几好，味道差D，带少少膻。明太子酿鸡翼，好多明太子，但味唔够浓。烧饭团都唔错，外面烧得好脆，多返d馅会更好。烧粟米，未食已经闻到好甜粟米味，流哂口水。清酒煮蚬，蚬又肥又鲜甜，但就冇乜清酒味。烧牛舌真系好好食 好香，盐落得恰到好处，少少咸，更惹味。牛舌极爽口炸鸡份量可能系最大。都唔错，鸡肉鲜嫩，味道可口。广岛蚝有两只味，味噌同烧汁。两种都好好食，味噌好特别。蚝好肥好juicy。炒乌冬，有明太子同豚肉，青椒红椒，炒得几好，唔觉油腻，好食但未算好特别。唯独烧茄子普通，冇乜味。整体食物质素一流，卖相䚍又好食 服务好，环境气氛都好relaxing，重有bar枱，适合倾下计饮杯野。唯一系份量细左D，但咁就可以样样都浅尝。