私家廚房 (已結業)

间唔中都会同屋企人出去食饭，唔想次次都食个几间，所以今次就出旺角拣咗间想环境舒服啲食小菜既地方，一家人轻轻松松食餐饭，今次全权由屋企人落单。首先就系脆皮德国咸猪手，皮脆肉嫩大大碟，再点少少酸辣汁，味道啱啱好。接著就系OK汁煎南非大虎虾，个汁酸酸甜甜，虾大大只虾肉爽口弹牙，好开胃会自然想食多几只。然后系笼仔荷叶海龙皇蒸饭，饭上面有鱼虾蟹加少少蒜蓉，但个重点系个饭到，好香口入哂味，唔小心又会想食多碗。再黎既系姜葱焗美国桶蚝，上菜时热辣辣出哂烟，蚝好大只够哂肥美，配合姜葱味无得输，非常满足。之后系生炒骨，味道唔会过份酸甜，好适合送饭。最后就系烧汁脆米安格斯牛粒，一半矮瓜一半牛肉，味道浓沃送饭一流。结论，旺区好选择，适合一家大细去食，好多𩠌式选择，一定有野啱你食。