宏 (已搬遷) 新店位置

次次行the one都见到呢间「宏」，但佢门面太靓，令我觉得应该会好贵，但今日我决定一探究竟，等我揭开佢嘅神秘面纱。餐厅装修色彩缤纷，另外亦有独特嘅日本风格。女友叫左牛肉寿喜烧，只系$99，个人认为肉分量足够，肉吸收后寿喜烧汁后更惹味。餐厅仲会提供蛋酱，牛肉煮熟后沾上蛋液系日本传统食法，我自己亦钟意呢种食法。另外牛肉寿喜烧餐仲包括细抹茶蛋卷，抹茶味非常香浓，甜而不腻。迷你三彩定食啱晒我咁三心两意既人，一次过满足我三个愿望，包括鳗鱼饭、吞拿鱼碎饭、鸟冬同沙律。先讲鳗鱼饭，鳗鱼烧得香焦，肉质软稔，三扒两拨就食晒。另外，吞拿鱼碎饭既吞拿鱼非常细滑鲜甜，之前未食过呢种口感既吞拿鱼，不过今次之后已经爱上佢。最后海藻乌冬偏向清淡，中和返鳗鱼饭同吞拿鱼碎饭偏向油腻嘅口感。一个细蛋卷当然唔够，所以最后叫咗香蕉焦糖窝夫，卖相非常吸晴，窝夫共有三件，质感外脆内软，仲有一球雪糕，今餐非常满足。最后埋单只系$347，性价比颇高，睇嚟我系尖沙咀揾到我嘅理想饭堂。