上品火鍋料理 (已結業)

上品火鍋料理今晚放工同朋友去上品火鍋食晚飯～我哋叫咗個原鍋花睇雞燉翅群鍋，店員幫我哋分，仲好貼心咁發現有一個朋友未到，搵個蓋幫佢蓋住保溫，令佢食到嘅翅仍然係暖暖的～當然，個翅真係十分鮮甜！我哋5個人分，每人可以分到兩碗之後，我哋叫咗幾隻花足蝦享受下！我哋仲叫咗個美國桶蠔同埋花甲雙拼。蠔要注意返自己喜歡嘅熟度，我食嘅第一隻蠔就熟咗少少，而第二隻蠔我注意返個時間，熟度啱啱好！又肥又鮮甜！炸響鈴亦都係值得一讚的！我自己唔中意落響鈴打邊爐，但上品提供埋酸甜醬，咁我就決定試下就咁食啦，點知真係一試難忘！個口感就好似炸餃皮咁樣，甚至比炸餃皮更加脆！另外，安格斯肥牛同新鮮牛柳粒都冇令人失望！牛柳粒更貼心地列明最住烹飪時間，令食客唔需要擔心牛柳粒會太熟太硬嘅問題～跟足4分鐘呢個時間，牛柳粒嘅熟度剛好，入口即化～最令人意外嘅係海鮮拼盤條魚，店員提醒之下先知道原來仲可以另炸，變成另一道炸魚頭！整體嚟講，今次嚟到上品真係感受到好高級嘅享受，環境乾淨，店員服務態度亦都唔錯，一定會推薦朋友再嚟食！