Pho Bar (已結業)

今日收工同🐢🍯去食晚餐，好耐冇食过越南嘢，听到有介绍话呢间几好食，所以今晚就黎试吓啦。我自己就买咗个生熟牛肉「面」。呢个「面」嘅特别之处系佢唔系真正嘅「面」，佢其实系翠玉瓜，切成丝扮成嘅面。绝对系低卡路里，OL减肥之选。翠玉瓜丝口感好爽脆，唔会因为切左丝而一煮就淋晒，反而索晒啲汤，好入味。佢个牛肉系美国肥牛，牛味好浓，而且有口感。另外，佢个汤底好清甜，唔会太咸，但系味精多左小小。🐢🍯嗌左个至尊河粉。呢个至尊实在不得了，佢除咗有生熟牛肉之外，仲有入口即溶嘅牛腩，超级入味边弹牙嘅牛丸片，好爽脆嘅牛栢叶同好弹牙嘅札肉。佢个河粉好弹牙，而且好索汤，够晒味。我地睇到餐牌上见到有个小食叫做「爆炸鸡」，好奇心驱使下我哋就嗌咗嚟试吓。其实佢系炸鸡嚟，啲鸡球本身腌左都好够味，炸粉唔会厚，炸到好脆但比较干身。佢除咗跟一个普通沙律酱之外，仲有两个唔同嘅千岛酱，一个甜啲，一个比较酸啲。另外🐢🍯一见到盐味薯条真系好兴奋，所以我哋都嗌咗嚟试吓。佢面头仲有紫菜，都炸到外脆内软，唔错。佢同样都有三个酱，只系沙律酱变成茄汁。