鴻星中菜 (已結業)

最近做紧超值原只鲍鱼，鸡炖翅，松叶蟹拑全包宴，重话有七五折，咁又去试下啰。一向都知鸿星啲嘢偏咸味/味精重，今次都叫定师傅走味精，点知张单真系mark住"无味精"，咁即系话有其他客都觉得佢地味精重啦！出街食饭都唔可以要求咁高下下讲健康，但落少啲无咁咸都无坏啫！我有friend同有亲戚食过将军澳个间分别透唔到气同头痛，你话味精有几重喇！原盅鸡炖凤尾鲍翅 - 我谂呢味无得走味精，一早煲定家嘛！我唔怕味精嘅，梗系觉得味浓啦！不过唔系盅盅翅都有咁大块架，我阿妈块细啲。京酱爆雪花蚌 - 虽然走味精，但反而味道啱啱好，啲蚌爽身又唔腥，其实师傅手势都几好啫，唔驶落咁咸嘅。百花炸酿松叶蟹拑 - 有原只蟹肉拑，但大只啲会好啲。有啲沙律几好味。原只鲍鱼花菇翡翠 - 鲍鱼爽脆，冬菇算厚肉。脆皮黄油鸡 - 一般啦！虾子烤烩伊面 - 最抵赞嘅一味，炒得爽身不油腻，虾子香，面质唔硬又唔太"林"。精美甜品系喳咋，一般啦！一家四口有电视睇环境舒适酒楼晚饭有鲍有翅都系$500，算系咁啦！