香港仔茶餐廳 (已結業)

好耐都冇食个打冷啦, 今日趁人多, 朋友带咗我地去湾仔打冷。餐厅系传统茶记格局, 价钱算大众化, 我地有成六个人, 所以叫咗好多嘢食。先黎潮式乌头, 系冻食嘅一道菜, 鱼食落鲜甜, 配埋酸汁食一流。 之后系卤水拼盘, 眼见都起码有六七样嘢, 墨鱼, 红肠, 大肠, 鹅片等等, 老板仲教我地点少少辣汁食会更加野味, 一个字正!由于在坐好多人钟意食鹅片, 所以我地另外亦叫左一碟剩鹅片, 啖啖肉之余, 卤水腌得啱啱好, 唔会话太咸果只, 唔够几分钟就俾我地班食货KO左。再黎有牛腩同韭菜猪红, 两样嘢都系大大份, 啱哂几个人分, 牛腩食落口感同味道都very good, 属水准之作。 韭菜猪红同样出色, 难得韭菜唔老, 所以我地中间再加多左碟剩韭菜开心share。至于送啤酒嘅小食, 当然唔少得椒盐鱿鱼啦, 今次叫左个椒盐鱿鱼同九肚鱼双拼, 同样大大份, 两样嘢都炸到金黄甘香。食到依度, 其实都饱左大半, 不过冇饭同冇面不欢嘅朋友, 亦自动波咁叫左个扬洲炒饭同星洲炒河, 两碟小炒都镬气十足, 不过可能真系叫得太多嘢, 所以最后都食唔晒, 个个都捧住个肚走人, 所以下次再嚟要再节制下啦。