靠得住粥麵小館 (奧海城二期)

营业中

休息中

之前偶然经过呢间靠得住已食过一次佢既粥，而且入到去先知系米芝莲推介，而且个粥底系绵啲同埋浓厚啲，所以今日见饿饿地又咁啱行过就入去食个午饭。今次点左个鱼片滑牛肉粥，加左个炸云吞之外再叫多个陈醋春耳试下。佢会收3蚊茶钱，但个茶系苹果红茶，都几香甜几特别，好过成日饮淡香片咁闷。先上来个陈醋春耳，个汁果然几重醋味，不过都几惹味，但个木耳一啲都唔爽，应该煮过龙了，又厚但又淋，可惜！鱼片牛肉粥黎既份量系刚好一人份，配料都好多，食每一啖都毕到牛肉或鱼，啲牛肉大大块同够滑、鱼片都几香而冇骨。但今次个粥底比上次时食就咸左啲，冇上次第一次食咁惊喜。虽然应该冇咩味精，食完未致于口渴，但食到底唔系咁热时就觉得口味越来越咸了⋯最后黎既炸云吞有四粒，份量都合理、炸得唔太油，云吞肉有虾有猪肉，都几爽，都唔错。整体黎讲今次呢餐既感受冇上一次黎食咁好，当然佢既粥底点都比出面既连锁粥店好食得多，但以佢呢个价钱同埋米芝莲推介之名就有少少失望。希望佢今日只系一时失手，或者都要谂下点样去令水准维持同保持稳定了。