酥妃皇后 (已結業)

最近几次嚟东港城发现开咗一间都几多人排队嘅"酥妃皇后",睇佢门面好似走高档路线咁,主打都系卖牛角酥同埋鲜奶蛋挞,所以一心就谂住带阿肥过嚟试下,因为佢系牛角酥嘅粉丝,无论去到边间面包舖,佢都会买牛角酥。 我哋大约晏昼三点零嚟到,见到都系有一炸人喺度排队买,连阿肥都觉得好惊奇,心谂一定系好东西,咁我哋都冲埋去排啦,阿肥了解完有咩食之后,佢叫咗一个原味牛角酥+一个酥皮鲜奶蛋挞。而我就拣咗特别啲嘅菠萝牛角酥包+一个焦糖酥甩。 见个卖相都好吸引,满心期待,第一口咬咗个菠萝牛角包先,嗯......好普通咋㖞,菠萝皮唔脆,牛角包唔酥亦唔香......仲要$18蚊一个...有啲贵㖞... 食完个淡味再试下个焦糖酥甩,反而我钟意呢个多啲,个皮比较酥化,焦糖味都好重,个样就系冬甩咁中间有个窿,不过都系细细粒就要$12蚊一个,本人就觉得系高档嘅价钱,平民嘅味道喇。 而我见阿肥食完个牛角包,都一样系失望嘅表情,到佢食个鲜奶挞嘅时候,仲见佢hold都hold唔住,烂鬼哂......但问佢味道如何,佢都话还可以嘅,但唔明白点解咁多人排队买啰