青藏牛肉麵 (已結業)

是夜随机喺网上搜寻附近有咩推介小店，而一向钟意食牛肉面嘅版主好自然俾「青藏牛肉面」呢几只字吸引咗，见评分又唔差，即管嚟到锦屏街呢条北角嘅隐藏小巷试一试。未去过青藏，唔知何谓「青藏高原」风味，不过一入门的确传嚟阵阵孜然嘅香气，可能就系所谓高原嘅味道。睇睇餐牌，犹豫之下想叫价钱贵啲嘅羊肉扁面 - 可惜唔知系咪夜已深，要乜无乜 🙉唯有叫返牛肉拉面先试试佢。一上枱，好似唔驶钱咁多嘅芫茜䓤呈现眼前，对于钟食多青嘅我自不然觉得正。其中一样出色嘅系，汤嘅热度真系满分，直至食完成碗都仍然系热度十足。汤头似一般牛骨汤味，尚算青甜，而中间仲夹杂小小羊肉膻味，相信唔食羊嘅都可以接受，但钟羊嘅难免觉得唔够喉！牛肉份量算多，食就一定食得饱，不过肉味自然都系一般，加上热汤嘅关系，唔驶一阵牛肉就变得过熟而有𡁻头。拉面挂汤还可以，只系面质软淋，完全无爽口弹牙嘅感觉，可以话系扣最大分数。好彩，萝卜又救返碗面少少。其实未煮得入味，好彩本身萝卜够甜，亦煮得够淋身，又加返少少分。$39 食碗面，又无太大追求，个人觉得食吓无妨。有人话店完态度差，的确系无乜礼貌，不过街坊生意，食客又似系习以为常，所以都无谓过份追求喇👍🏻