北正宗 (已搬遷) 新店位置

屋企附近开咗间新越南嘢，个名叫“北正宗”，Facebook话系北越正宗菜式。虽然我有啲怕响街食啲好平嘅牛肉，但要知道系咪地道，食鲜牛肉汤河先知。Lunch有set，加钱$10要埋个越南咖啡。一室的蓝浅绿调子、盆栽摆设、木具家私，加上店子啲碗筷器皿简洁干净，非常讨好。个河粉其实唔系好正宗，但整体味道几好。汤底清彻不油腻，但牛味稍淡不过冇味精，加埋啲洋葱、九层塔、青柠汁、辣椒，汤底即时提升；河粉用咗南部嘅幼身粉；而且北部应该较少比九层塔、芽菜做配菜，但要赞的是材料新鲜，浸落汤够香气。牛肉出奇地虽然系切厚片但食落嫩口有牛味。嚿油炸鬼好实唔松化可以唔食。跟餐嘅越南咖啡好仔细咁用滴漏壶，而且店员见到漏完又主动收走，提我用匙羹拌匀啲炼奶先饮。饮落香味浓郁内酸味，不过啲炼奶好甜。虽然唔系正宗北越嘢，不过南越口味始终比较易被港人接受，而且比同区响商场𠮶间水准又高一班，可以再嚟。