蠔站 (將軍澳中心) (已結業)

本来book咗台9位，同事食lunch。到步后要求我地分开坐，扰攘一轮先肯泊埋两张四人台，声称系唔想我地用晒啲细台... 期间店员态度奇差，入座后连餐牌都唔俾，中间又对我地作出奇怪指令，例如如何摆放餐具之类，语气犹如教官。落单后，发觉其中一个餐系得3个供应（我地order咗6个）， 据称当时啱啱开午市... 餐到后，发现每碗白饭得半碗，经查询后证实原来唔够白饭，正煲紧饭。食物当中，等咗好耐嘅烧鸡，只有外皮有孜然粉灼烧嘅味道，鸡肉本身淡而无味，最多只有雪藏味，怀疑系白烚完烧干啲皮就上菜，极度业余求其，货不对版。 餐饮点咗6杯热咖啡，全部都室温状态，怀疑落咗冻奶，又或者用未滚嘅水冲，经查询后，店员回应是否需要微波炉加热，令众人都哑口无言。我地同事全部都斯斯文文，无提出过任何无理要求，但却遭受奇怪嘅服务态度。我地亦唔明白打开门做生意，好似要同客过唔去系咩心态。劝喻想选择呢间餐厅嘅朋友要小心。