Steak Bar (已結業)

今次中午去咗铜锣湾食牛扒，系好多身边嘅朋友食完推介我去嘅，午餐时间去到都唔使点排队，坐低睇咗一阵餐牌就叫咗石烧薄切牛肉同澳洲谷饲肉眼扒。首先嚟咗啲头盘嘅沙律同埋豆腐沙律菜新鲜爽口，有少少醋，加车厘茄，食咗份外开胃。另豆腐嫩滑清新，加上少少芝麻酱同葱花，点缀左平淡无味嘅佢。系好好嘅一道前菜。之后，套餐加配嘅小食薯条都黎啦每一条都好粗炸到金黄色，咬落去外面松脆内里软绵绵，加上小小盐同胡椒，十分惹味，令人食唔停口。讲左咁耐终于黎到主菜啦，我就集中讲下自己食嘅澳洲谷饲肉眼扒啦，牛扒好大块亦都好厚身，表面煎到深啡色得黎又唔会㶶，未上台已经闻到香味。用刀轻轻就已经可以切开牛扒，里面呈现粉红色，仲有唔少肉汁流出黎，细细口食一啖，感觉到肉质软腍腍得黎仍然保持到小小肉嘅弹性，食落有好重嘅牛肉味，由于系肉眼，脂肪比较上无咁多，食多几啖都唔会觉得油腻。最后跟餐仲附上一碗白饭，用靓牛排黎送饭，可能大家会觉得有D奢侈，其实系最适合不过，白饭清淡，同牛油同肉汁混和埋一齐食可以更凸出牛扒嘅肉香，令我地可以更清楚品尝到牛扒应有嘅味道。以一个午餐来讲唔算平，但食物嘅品质高，所以都算值得嘅。